Matthaia Ziak
4 Tichuan, Isua chu Diabola thlêma awm tûrin thlalêrah thlarauva hruaiin a awm a. 2 Ni 40 leh zan 40 chaw a nghei hnuin a ril a lo ṭâm ta a. 3 Tichuan, Thlêmtu chu a lo kal a, a hnênah: “Pathian fapa i nih chuan, hêng lungte hi chawah chang tûrin hrilh rawh,” a ti a. 4 Mahse, ani chuan: “‘Mihring hi chaw chauhvin a nung lo vang a, Jehova* kâa thu tin chhuakin a nung zâwk ang,’ tih ziak a ni,” tiin a chhâng a.
5 A hnuah, Diabola chuan khaw thianghlimah hruai lûtin, biak ina hmun sâng lai berah a dintîr a. 6 A hnênah: “Pathian fapa i nih chuan zuang thla rawh: ‘Nangmah ṭanpui tûrin a vântirhkohte thu a pe ang a, lung i chhuih loh nân an kutin an dâwm ang che,’ tih ziak a ni si a,” a ti a. 7 Isua chuan: “‘I Pathian Jehova* i fiah tûr a ni lo,’ tih ziak a ni ve bawk e,” tiin a chhâng a.
8 Diabola chuan tlâng sâng takah a hruai leh a, khawvêl ram zawng zawng leh a ropuinate a entîr a. 9 Tichuan, a hnênah: “Vawi khat chauh pawh bawkkhupa chibai min bûk chuan, hêng zawng zawng hi ka pe vek ang che,” a ti a. 10 Isua chuan: “Setan, kal bo rawh! ‘I Pathian Jehova* chauh chibai i bûk tûr a ni a, ama rawng chauh i bâwl tûr a ni,’ tih ziak a ni,” tiin a chhâng a. 11 Tichuan, Diabola chuan a kalsan ta a; tin, vântirhkohte lo kalin, Isua rawng an bâwlsak a.
12 Tichuan, Johana an man tih a hriat chuan, chu hmun chu chhuahsanin Galili ramah a kal a. 13 Tin, Nazaret a chhuahsan hnuah, Zebulun leh Naphtali biala dîl kama awm Kapernaum khuaah a awm ta a. 14 Chu chuan zâwlnei Isaia hmanga lo sawi tawh chu a thlen famkimtîr a ni: 15 “Tuipui panna kawng, Jordan Lui râl lehlama awm Zebulun leh Naphtali rama mite leh Galili rama chêng hnam dangte u! 16 Thima ṭhute chuan êng ropui tak an hmu a, thihna hlima ṭhute chungah chuan êng a lo chhuak bawk a,” tih hi. 17 Chumi hun aṭang chuan Isua’n: “Sim rawh u, vân Ram chu a hnai tawh e,” tia sawiin thu a hril ṭan a.
18 Tin, Galili Dîl kama a kal laiin, Petera tia koh Simona leh a unaupa Andria a hmu a, anni chu sangha mantu an ni a, dîlah chuan lên an dêng a. 19 Tichuan, an hnênah: “Mi zui rawh u, mihring mantuah ka siam ang che u,” a ti a. 20 Tin, an lênte chu hnutchhiahin an zui ta nghâl a. 21 Chuta ṭanga a kal hnu chuan, unau dang pahnih Zebedaia fapa Jakoba leh a unaupa Johana a hmu a. An pa Zebedaia hovin lawngah an lênte an lo siam ṭha mêk a; tichuan, anni chu a ko va. 22 Lawng leh an pa chu kalsanin, ani chu an zui ta nghâl a.
23 Tichuan, Galili khaw pum fang chhuakin, an inkhâwmna inahte a zirtîr a, Ram chanchin ṭha hrilin, natna tinrêng leh dam lohna tinrêng neite chu a ti dam a. 24 Suria ram pumah a chungchâng chu a thang chhuak ta a; tichuan, natna chi hrang hrang neite leh hrehawm tuar te, ramhuai man te, phûngzâwl te leh, zengte chu a hnênah an rawn hruai a, ani chuan a lo tidam hlawm a. 25 Chutichuan, Galili ram te, Dekapoli khua te,* Jerusalem khua te, Judai ram te leh, Jordan Lui râl lehlama mipui tam tak chuan ani chu an zui ta a ni.