Matthaia Ziak

3 Chûng hun lai chuan, Baptistu Johana chu Judai ram thlalêrah thu hril tûrin a lo kal a. 2 “Sim rawh u, vân Ram chu a hnai tawh e,” tiin a sawi a. 3 Ani chu zâwlnei Isaia’n: “Thlalêra au râwl chuan: ‘Jehova* kawng sial ula, a kawngte ti ngîl rawh u,’” tia a sawia kha a ni. 4 Johana chuan sanghâwngsei hmula siam thawmhnaw inbelin, savun kâwnghrên a hrêng a. A chaw chu khaukhuap leh ramhnuaia khawizu a ni. 5 Tichuan, Jerusalema mi te, Judai rama mi zawng zawng te leh, Jordan Lui chhehvêl ram zawng zawnga mite chu a thusawi ngaithla tûrin a hnênah an lo kal a. 6 Vântlâng hmaah an sualte an puang a, ani chuan Jordan Luiah a lo baptis* a ni.

7 Pharisai leh Saddukai tam tak baptisma chang tûra an rawn kal a hmuh chuan, an hnênah heti hian a hrilh a ni: “Rûl tûr nei thlahte u, Pathian thinurna tlânsan tûrin tuin nge hrilh che u? 8 In sim tak zet tih in thiltihin lantîr rawh u. 9 ‘Abrahama thlahte kan ni,’ tiin inngai suh u. Ka hrilh a che u, Pathianin hêng lungte aṭang hian Abrahama thlahte a din thei a ni. 10 Thing bul tinah hreipui dah a ni tawh. Tichuan, thing tin rah ṭha chhuah lo apiang chu kih a, meia paih tûr a ni. 11 Kei chuan in sim avângin tuiin ka baptis che u a; nimahsela, ka hnua lo kal tûr erawh chuan thlarau thianghlim leh meiin a baptis ang che u.* Ani chu kei aiin a ropui zâwk a, a pheikhawk phelh tlâk pawh ka ni lo. 12 Buhsî zah faina* kengin a hruih* chu a zâp fai hliau ang a, a buhte chu buh zêmah khungin, a sîte erawh chu mei mit thei lovah a hâl ral ang,” tiin.

13 Tichuan, Isua chu baptisma chang tûrin Galili ram aṭangin Jordan Luiah Johana hnênah a rawn kal a. 14 Mahse, Johana chuan: “Kei hian i mi baptis ka ngai zâwk asin, engvângin nge ka hnêna i lo kal?” tia sawiin lo khap a tum a. 15 Isua chuan a hnênah: “Min khap tum lo hrâm rawh, hetiang kawng hian Pathian ruahmanna zawng zawng kan hlen chhuak thei ang,” tiin a chhâng a. Tichuan, a remti ta a. 16 Isua chu baptisma changa tui ata a rawn chhuah veleh vân a lo inhawng a, Pathian thlarau ṭhuro anga lo chhuka a chunga lo thleng a hmu a. 17 Chu bâkah, vân aṭangin awin: “Ani hi ka Fapa duh tak, min ti lâwm êm êmtu a ni,” tiin a sawi bawk a ni.