Petera Lehkhathawn Pakhatna
1 Kei Petera, Isua Krista tirhkoh hian Pontia ram te, Galatia ram te, Kappadokia ram te, Asia ram te leh, Bithunia ramtea darh ta, mikhual anga châmte hnênah he lehkhathawn hi ka ziak a ni. 2 Thu âwih tûr leh Isua Krista thisena theh a, thlarau thianghlima tih thianghlima awm tûra Pa Pathianin a hriat lâwk ang zêla thlante hnênah chuan:
Khawngaihna nasa tak leh thlamuanna* in chungah tih punin awm rawh se.
3 Pathian, kan Lalpa Isua Krista Pa chu fakin awm rawh se, a zahngaihna nasa tak ang zêla thihna ata Isua Krista thawhlehna hmangin beiseina nung nei tûrin nunna thar min pe* ta si a. 4 Chu nunna thar chu rochan chhe thei lo, bawlhhlawh kai lo leh, chuai thei lo a ni. Chu chu vânah in tân dah ṭhat a ni a, 5 rinna in neih avânga chhandamna hmu tûra Pathianin a thiltihtheihnaa a vênhim nangni tân hian a ni a, chu chhandamna chu hun hnuhnûngah tih lan a ni ang. 6 Chuvâng chuan, lâwmna nasa tak in nei a; amaherawhchu, hun rei lo te chhûng harsatna chi hrang hrang avânga in lungngaih a la ngai rih a ni; 7 Krista Isua lo lan hunah in rinna fiaha awm tawhin chakna te, ropuina te leh, zahawmnate a neihtîr theihna tûr che uin. Chu in rinna chu meia fiah a nih hnu pawha boral thei rangkachak ai pawhin a hlu zâwk daih a ni. 8 Krista chu hmu ngai lo mah ula in hmangaih a. Tûnah hian amah chu hmu lo mah ula a chungah rinna in lantîr a, hlimna nasa tak leh lâwmnain in lo khat a ni, 9 in rinnain a tum ber in chhandamna chu in hmuh avângin.
10 In hnêna pêk Pathian khawngaihna nasa tak chungchâng puangtu zâwlneite chuan, chu chhandamna chanchin chu ṭhahnemngai taka zâwtin an zawng ṭhîn a. 11 Pathianin anni chu Krista’n hrehawm a tuar tûr thu leh a hnua chawimawi a nih tûr thu a thlarau thianghlimin a lo hrilh lâwk tawh a; chuvângin, Krista chunga thil thleng tûr leh a thlen hun tûr chu hriat an tum reng ṭhîn. 12 Pathianin zâwlneite chu mahni tân ni lovin, in tâna rawngbâwl an ni tih a hriattîr a. Chûng zâwlneite chuan in hnêna puan chhuahte hi an ziak a, vân aṭanga tirh chhuah thlarau thianghlim ṭanpuinaa chanchin ṭha hriltute avângin chûngte chu in lo hre ta a ni. Chûng thilte chu vantirhkohte’n hriatthiam an châk ṭhîn hle.
13 Chuvângin, theih tâwp chhuah tûrin in rilru buatsaih ula; ngaihven rengin awm ula; Isua Krista lo lan huna in dawn tûr khawngaihna nasa takah chuan in beiseina nghat rawh u. 14 Tûnah chuan Pathian fa, a thu awihtute in ni tawh a; chuvângin, amah in hriat hmaa châkna ṭha lote thununa in awm ang khân awm tawh lo ula, 15 nangmahni kotu Mi Thianghlima angin, in awm dân zawng zawngah lo thianghlim zâwk rawh u. 16 Pathian Lehkha Thu-ah: “In thianghlim tûr a ni, kei ka thianghlim si a,” tih ziak a ni si a.
17 Mi tin an thil tih ang zêla thlei bîk nei lova rorêlsaktu Pa hnênah thil in dîl a nih chuan, he khawvêla mikhual anga in châm chhûng hian Pathian ṭihin awm rawh u. 18 In pi leh pute’n an hlan chhâwn che u, sâwtna awm lo nun dân lak aṭanga nangmahni chhuah zalêntu* che u chu tangkarua emaw, rangkachak emaw anga thil chhe thei a ni lo tih in hria e. 19 Chu aiin, sawisêl bo leh bawlhhlawh kai lo berâm no thisen ang, Krista thisen hlu taka chhuah zalen in ni zâwk e. 20 Khawvêl* awm hma aṭangin Pathianin Krista chu thlang tawh mah se, hun tâwpahte hian in tân ani chu tih lanin a awm chauh a ni. 21 Amah avângin thihna aṭanga amah kai thotu leh ropuina petu Pathian ringtute in lo ni ta, in rinna leh beiseina chu Pathiana a innghah theihna tûrin.
22 Thutak in zawm avângin tih thianghlim in ni tawh a, vervêkna tel lo unau inhmangaihna in neih tâk avângin thinlung takin inhmangaih tawn rawh u. 23 Chi chhe thei ni lovin, chi chhe thei lo* chatuana nung leh awm reng Pathian thu hmanga nunna thar pêk in ni tawh si a.* 24 Pathian thu chuan, “Mihring zawng zawng* hi hnim ang an ni a, an ropuina zawng zawngte pawh rama pangpâr vul ang a ni, hnim chu a lo vuai a, pangpâr chu a lo ṭîl a; 25 nimahsela, Jehova* thu chu kumkhuain a awm reng a ni,” tiin a sawi si a. Tin, chu thu chu in hnêna puan chhuah chanchin ṭha hi a ni.