Petera Lehkhathawn Pakhatna

2 Chuvângin, sualna zawng zawng te, bumna zawng zawng te, vervêkna zawng zawng te, îtsîkna zawng zawng te leh, sawichhiatna zawng zawngte chu bânsan rawh u. 2 Nausên piang hlimin hnute tui a châk angin, nangni pawh chhandam ni thei khawpa in ṭhan chhoh theihna tûrin hnute tui thianghlim,* Pathian thu chu châk ve rawh u, 3 Lalpa ngilneihna chu in tem tawh si a.

4 Lung nung, mihringte’n an hnâwl; nimahsela, Pathianin a thlan leh a tâna hlu tak hnênah chuan lo kalin, 5 nangmahni ngei hi puithiam thianghlim ni tûrin lung nungte anga Pathian thlarau thianghlim hmanga sak in chu in ni, Isua Krista zâra Pathian pawm tlâk thlarau lam inthawinate in hlan theihna tûrin. 6 Pathian Lehkha Thuin: “Ngai teh u! Zion-ah chuan ka lung thlan, a kila lungphûm hlu tak chu ka phûm e, tu pawh chumia rinna lantîrtu chu a beidawng* ngai lo vang,” tiin a sawi si a.

7 Amah ringtute in nih avângin ani chu in tân a hlu a ni; amah ring lotute tân erawh chuan, “in satute lung duh loh kha a kila lung pawimawh ber a lo ni.” 8 Chu bâkah, “tlûkna lung leh dâlna lungpui” a ni bawk. Pathian thu an âwih loh avângin anni chu an tlu a. Chutiang chu a thleng ang tih sawi lâwk a ni rêng a ni. 9 Nimahsela, nangni chu “mi thlan, puithiam lal, hnam thianghlim leh, rochan bîk” in ni a, a êng ropui taka lût tûra thim ata Ko Chhuaktu che u “nihna ropui tak takte hmun tina puang tûra thlan in ni.” 10 A hma chuan Pathian mite in ni lo va, tûnah erawh chuan in ni ta; a hma chuan Pathianin in chungah zahngaihna a lantîr lo va, tûnah erawh chuan a lantîr ta.

11 Duh takte u, he khawvêlah hian ram dang mite leh mikhual anga châmte in nih angin, nangmahni do ṭhîntu tisa châknate lak aṭanga inthiar fihlîm tûrin ka ngên a che u. 12 Khawvêl mite zînga in awm dân ṭha chu vawng reng rawh u, thil sual titute anga an puh hunah che u, in thil tih ṭhatte an hmu ang a; tichuan, fiahna nîah Pathian an chawimawi thei ang.

13 Lalpa avângin mihringte ruat rorêltute thu âwih rawh u, dinhmun sâng zâwk chelhtu lalte leh, 14 thil sual titute hrem tûr leh thil ṭha titute fak tûra lalin a ruat ram awptute thu pawh âwih rawh u. 15 Hei hi Pathian duh zâwng a ni si a, an hriat loh avânga sawichhetu che u mi âte in thil tih ṭhata ngawihtîr* hi. 16 Mi zalên in ni a; nimahsela, in zalenna chu thil sual tih khuh* nâna hmang lovin, Pathian bâwih nih nân hmang zâwk rawh u. 17 Mi tinrêngte chawimawi ula, unau zawng zawngte hmangaih rawh u; Pathian ṭih ula, lal chu chawimawi rawh u.

18 Chhiahhlawhte chu zah tak chungin an pute lakah intulût rawh se, mi ṭha leh mi nunnêmte* lakah chauh ni lovin, tih lâwm harsate lakah pawh intulût rawh se. 19 Miin Pathian lama chhia leh ṭha hriatna thiang tak a neih avânga, harsatna* leh dik lo taka rorêlna a tawrh hrâm hrâm hian, chu chuan Pathian a ti lâwm a ni. 20 In sual avânga vuak in nih a, chhel taka in tawrh hian hlâwkna eng nge awm? Amaherawhchu, thil ṭha in tih avânga chhel taka hrehawm in tawrh chuan, chu chu Pathian lâwm zâwng tak a ni.

21 A nihna takah chuan, Krista pawh khân in tân a tawrh avângin, chutianga tuar ve tûra koh in ni asin, rinawm taka a hniak in zuina tûrin entawn tûr a hnutchhiah che u kha. 22 Ani chuan thil sual eng mah a ti lo va, bumna thu pawh a sawi hek lo. 23 Hmuhsita a awm laiin a hmusit lêt ve lo va. Hrehawm a tawrh laiin amah ti hrehawmtute chu a vau lo va, fel taka Rorêltu hnênah chuan a inkawltîr zâwk a ni. 24 Sual lama kan thih* theihna tûr leh felna lama kan nun theihna tûrin, ani chuan banah* khân ama taksa ngeiin kan sualte a phur a. “A hliamtea tih damin in awm ta.” 25 Berâm vâk bo ang ni ṭhîn mah ula, tûnah erawh chuan in nunna vêngtu leh enkawltu hnênah in lêt leh tâk hi.