Johana Hnêna Thu Puan Chhuah
17 Thlêng kum pasarih keng vântirhkohte zînga pakhat chu ka hnênah lo kalin, ani chuan: “Lo kal rawh, tui tam tak chunga ṭhu nawhchizuar ropui tak chunga rorêlna lo thleng tûr chu ka hmuhtîr ang che. 2 Leia lalte chuan ani chu nungchang bawlhhlawh* takin an khawsakpui ṭhîn a, leia chêngte chu a nungchang bawlhhlawhna* uaina hrai ruihin an awm ṭhîn,” tiin a sawi a.
3 Tichuan, thlarau thiltihtheihnain ani chuan thlalêrah min hruai a. Tin, Pathian sawichhiatna hmingtea khat lu sarih leh ki sâwm nei sakawlh sen lâr chunga chuang hmeichhe pakhat ka hmu a. 4 Chu hmeichhia chuan puan sen duk leh sen lâr a inbel a, rangkachak te, lung man tam te leh, tuikeplungtein a inchei a, thil tenawmte leh a nungchang bawlhhlawhna* thil thianghlim lotea khat rangkachak no a keng bawk a. 5 A chalah chuan hming mak tak leh hriatthiam har tak: “Babulon Khaw Ropui, nawhchizuarte leh leia thil tenawmte nu,” tih a inziak a. 6 Chu hmeichhia chu mi thianghlimte thisen leh Isua thuhretute thisena a rui ka hmu a.
Amah ka hmuh chuan mak ka ti hle a. 7 Tichuan, vântirhkoh chuan ka hnênah: “Engvângin nge mak i tih? Hmeichhia leh amah phurtu sakawlh lu sarih leh ki sâwm nei chungchâng thurûk chu ka hrilh ang che: 8 Sakawlh i hmuh kha a tîrin a awm a, a hnuah a awm leh ta lo va; nimahsela, leilâwt aṭangin a lo chhuak leh thuai ang a, tih boral a ni ang. Leia chêngte—khawvêl awm ṭan tirh ata nunna bu-a an hming chuang lote—chuan sakawlh a tîra awm, a hnua awm leh ta lo va, lo awm leh tûr chu an hmuh hunah mak an ti ang.
9 “Hemi chungchângah hian finna neih a ngai a ni: Lu sarihte chu hmeichhe ṭhutna tlâng pasarihte an ni. 10 Tin, lal pasarih an awm a: Pangate chu an tlâwm tawh a, pakhat chu a awm mêk a, a dang pakhat erawh chu a la awm lo; amaherawhchu, a lo awm hunah chuan rei lo te chhûng chauh a awm phalsak a ni ang. 11 Sakawlh a tîra awm, a hnua awm leh ta lo kha lal pariatna a ni bawk a, ani chu lal pasarihna aṭanga lo chhuak a ni a, tih boral a ni ang.
12 “Ki sâwm i hmuhte kha lal sâwm, lalram la nei lote an ni a; nimahsela, sakawlh nên dârkâr khat chhûng lal angin thuneihna an dawng ang. 13 Anni chuan ngaihtuahna thuhmun neiin an thiltihtheihna leh thuneihna chu sakawlh hnênah an pe a. 14 Berâm No chu an do vang a; nimahsela, lalpate Lalpa leh lalte Lal a nih avângin, Berâm No chuan anni chu a hneh ang. Chu bâkah, a hnêna awm koh te, thlan te leh, mi rinawmte chuan an hneh bawk ang.”
15 Tin, ani chuan ka hnênah: “Nawhchizuar ṭhutna tui i hmuhte kha mi te, mipui te, hnam te leh, ṭawngte an ni a. 16 Ki sâwm i hmuh leh sakawlh khân nawhchizuar chu huain an sawisa ang a, saruaka siamin a sa an ei ang a, meiin an hâl ral ang. 17 Pathianin a ngaihtuahnate an hlen chhuah theihna tûrin chu chu an thinlungah a dah si a; ni e, Pathian thute a thlen famkim hma loh zawng an ngaihtuahna thuhmun an hlen chhuah theihna tûrin an lalram chu sakawlh hnênah an pe ang. 18 Tin, i hmeichhe hmuh kha khawpui ropui tak nei lalram, leia lalte chunga rorêltu chu a ni,” a ti a.