Kolossa Khuaa Mite Hnêna Lehkhathawn
2 In tân leh Laodikei khuaa awmte tân leh a mi mal taka min la hmu ngai lo* zawng zawngte tâna ka beih nasatzia hi in hriat ka duh a ni. 2 Chu chu an thinlung thlamuana a awm theih nân te, hmangaihnaa inrem taka an inzawm khâwm theih nân te leh, an hriatthiamna fiah leh chiang tak avânga lo awm hausakna zawng zawng an neih theih nânte a ni a. Chutiang chuan, Pathian thurûk thianghlim, Krista hriatna dik tak an nei thei ang. 3 Amahah chuan finna leh hriatna ro zawng zawng uluk taka thuhrûk a ni si a. 4 Tu man thu dik ni âwm taka lang dik si lote hmanga an bum loh nân che u hei hi ka sawi a ni. 5 Taksain in hnênah awm lo mah ila, rilruin in hnênah ka awm a,* fel takin in awm tih leh Krista Isuaa in rinna a nghehzia ka hriat hian ka lâwm a ni.
6 Chuvângin, Lalpa, Krista Isua chu in pawm tawh ang khân, amah nêna inpumkhatin kal zêl ula. 7 Zirtîr in nih tawh ang khân Isuaah chuan ṭha taka zung kai leh amaha sak chhohvin awm ula, rinnaah chuan nghet taka awmin Pathian hnênah lâwmthu sawi ṭhîn rawh u.
8 Khawvêl finna leh bumnaa tu mahin an bâwiha an siam lohna tûr che uin fîmkhur rawh u. Chûng thilte chu Krista zirtîrna ṭanchhan ni lovin, mihringte thurochhiah leh khawvêl thilte* ṭanchhan a ni. 9 Kristaah chuan Pathian mizia zawng zawngte chu a kim vek si a. 10 Chuvângin, sawrkârna leh thuneihna zawng zawng lû Krista avângin eng mah in tlachham lo ve. 11 Kristaa rinna in neih avângin serhtan in ni a; nimahsela, mihringte serhtan anga tan ni lovin, in taksa sual duh zâwng hlîp thla veka tan a ni zâwk. Chu chu Krista zuitute serhtanna chu a ni. 12 A baptismaah chuan a ruala phûmin in awm a; tin, amah nêna in inlaichînna avâng leh thihna ata amah kai thotu Pathian thil tih ropui tak in rinna avângin a ruala kaihthawhin in awm bawk kha.
13 Chu bâkah, in bawhchhiatnate avâng leh in tisa serhtan loh avânga thi ni mah ula, Pathian chuan Krista rualin a ti nung che u a. Ani chuan kan bawhchhiatna zawng zawngahte min ngaidam tak zet a ni. 14 Min dodâltu thupêk chuanna kutziak lehkha chu a nâwt reh ta si a. Chu chu nghaisakna bana* khêngbetin a la bo ta a ni. 15 Nghaisakna ban hmangin sawrkârnate leh thuneihnate a hlîp thla a, mante anga vântlâng hmaa mualpho taka siamin, an lakah hnehna ropui tak a chang tih a lantîr a ni.
16 Chutichuan, ei leh in thu-ah emaw, kût hman thu-ah emaw, thla thar lawm thu-ah emaw, sabbath serh thu-ah emaw tu mahin sawisêl che u suh se. 17 Chûngte chu thil lo thleng tûrte hlimthla a ni a, a tak erawh chu Krista a ni. 18 A dera inngaitlâwmte leh vântirhkoh biak chîngte lakah chuan fîmkhur rawh u, anni chuan in lâwmman dawn tûr an chântîr thei si che u a. Chutiang mite chuan an thil hmuhte chauh vuan tlatin, an ngaihtuahna eng mah lo maite chu an uanpui ṭhîn. 19 Anni chuan ruh chuktuahte leh taksa pum pui châwm a, inrem taka zawm khâwmtu lû* chu nghet takin an vuan lo. Tin, lû chuan Pathian thiltihtheihna hmangin taksa chu a ṭhantîr ṭhîn.
20 Krista ruala thia khawvêl thilte lak aṭanga in zalen tawh si chuan, engvângin nge he khawvêl mite anga in la awm reng a: 21 “Dek suh, tem suh, khawih suh,” tih thupêk hnuaiah hian in la kûn reng? 22 Chûng thilte chu hman hnua ral leh mai ṭhîn, mihringte thupêkte leh zirtîrnate a ni lo vem ni? 23 Chûng thupêkte chuan finna pe angin lang mah se, an taksa châk zâwngte do tûrin mite a ṭanpui lo; mite chuan an duh dânin Pathian biak an thlang a, a dera inngaitlâwmin, mahni taksa an tih hrehawm si a.