Thessalonika Khuaa Mite Hnêna Lehkhathawn Pakhatna
2 Unaute u, kan rawn tlawh che u kha a thlâwn lo tih nangmahni ngeiin chiang takin in hria e. 2 In hriat angin, Philippi khuaah khân hrehawm tuar leh mualpho taka siam kan ni chung pawhin, dodâlna nasa tak kârah Pathian chanchin ṭha hrilh tûr che uin, kan Pathian chuan huaisenna min pe a. 3 Fuihna thu kan sawi kha dik lohna emaw, bawlhhlawhna emaw, bumna emaw aṭanga chhuak a ni lo. 4 Chanchin ṭha kawl tûra Pathian pawm kan hlawh avângin mihring ni lovin, kan thinlung enfiahtu Pathian tih lâwm tumin kan sawi zâwk a ni.
5 A nihna takah chuan, fak derna thu kan sawi ngai lo va, kan nihna dik tak hi duhâmna avângin kan thup ngai hek lo tih in hria e; chu chu Pathian pawhin a hria! 6 Krista tirhkohte kan nih angin phurrit tak ni thei mah ila, mihring lak aṭangin emaw, in lak aṭangin emaw, mi dangte lak aṭangin emaw chawimawina kan zawng hek lo. 7 Chutih ahnêkin, nu nau pawmin a fa duat taka a enkawl angin in zîngah nunnêm takin kan awm zâwk kha. 8 Kan duh tak in lo nih tâk avângin kan ngaina êm êm che u a, Pathian chanchin ṭha chauh ni lovin, kan nunna hial pawh hi in tâna pêk kan huam a ni.
9 Unaute u, kan thawh hahzia leh kan thawhrimzia kha in hria e. Pathian chanchin ṭha in hnêna kan hrilh lai khân, in zînga tu tân mah phurrit kan nih lohna tûrin a chhûn a zânin hna kan thawk a. 10 Nangni ringtute chunga rinawm tak, fel tak leh, sawisêl bova kan awm dân kha a hretute in ni a, Pathian pawhin min hriatpui bawk. 11 Pain a fate chunga a tih angin, in zînga tu pawh fuiha thlamuanin, thurâwn kan pe ṭhîn che u tih in hre chiang hle; 12 a Lalram leh a ropuinaa kotu che u Pathian hming phûa in nun reng theihna tûrin.
13 Hemi avâng hian bâng lovin Pathian hnênah lâwmthu kan sawi ṭhîn, kan hnên aṭanga in hriat Pathian thu in dawn lai khân mihring thu ang ni lovin, a nihna ang taka Pathian thu anga in pawm avâng khân; chu chu nangni ringtutea thawk bawk chu a ni. 14 Unaute u, Judai rama Krista Isua nêna inpumkhat Pathian kohhranho entawntute in nih avângin in rama mite ngei kut in tuar si a, anni pawhin chutiang chuan Judate kut an tuar ve bawk. 15 Chûng Judate chuan Lalpa Isua leh zâwlneite an that a, keini pawh min ti duhdah a ni. Chu mai ni lovin, Pathian an ti lâwm lo va, tu tân mah thil ṭha an ti hek lo. 16 Hnam dangte chhandam an nih theihna tûra an hnêna thu kan hrilh min khap si a. Chutiang chuan an sualte an belhchhah fo ṭhîn. Chuvângin, a tâwpah a thinurna chu an chungah a lo thleng ta a ni.
17 Unaute u, a hmain thinlung lamah ni lovin, taksa lamah nangmahni nên hun rei lo te chhûng kan inṭhen a. Nimahsela, hmuh che u kan châk êm avângin, in hnêna lo kal* tûrin theih tâwp kan chhuah a ni. 18 Chuvâng chuan, in hnêna lo kal kan duh a, kei Paula ngei pawh hian vawi khat chauh ni lovin, vawi hnih lai lo kal ka tum tawh a; mahse, Setana’n kan kawng a dâl a ni. 19 Kan Lalpa Isua lo awm lehna chhûnga a hmaa kan beiseina emaw, kan lâwmna emaw, kan lallukhum chhuan tûr emaw chu eng nge ni? Nangmahni ngei hi in ni lo vem ni? 20 Nangni ngei hi kan ropuina leh kan lâwmna in ni si a.