Philippi Khuaa Mite Hnêna Lehkhathawn
3 A tâwp berah chuan ka unaute u, Lalpaah chuan lâwm zêl rawh u. Thu ngai in hnêna ziah hi ka tân a ninawm lo ve, in himna tûr a ni si a.
2 Uite lakah chuan fîmkhur rawh u; thil sual titute lakah chuan fîmkhur rawh u; tisa ti hrehawmtute lakah chuan fîmkhur rawh u. 3 Keini Pathian thlarau avânga rawngbâwlna thianghlim hlântu te, Krista chhuangtu te leh, tisaa rinna nghat lotute hi serhtan tak tak kan ni a, 4 tu pawhin tisaa rinna nghah chhan tûr a nei a nih chuan, kei pawhin ka nei a ni.
Tin, mi dang tu pawhin tisaa rinna nghah chhan tûr nei nia a inhriat chuan, ka nei tam lehzual a ni: 5 ni riat nîa serh tan, Israela thlah, Benjamina hnama mi, Hebrai nu leh pa lak aṭanga Hebraia piang ka ni a; dân lamah chuan Pharisai ka ni a; 6 ṭhahnemngaih kawngah chuan kohhran ti duhdahtu ka ni a; dân ṭanchhana felna kawngah chuan sawisêl bo ka nihzia ka finfiah tawh. 7 Nimahsela, ka thil ngaihhlut êm êm ṭhinte chu Krista avângin hlutna nei lovah ka ngai a. 8 Chu mai a ni lo, ka Lalpa Krista Isua chungchâng hriatna hlu tak nêna khaikhin chuan, thil zawng zawng hi eng mah lovah ka ngai bawk a ni. Amah avângin engkim ka chân a, chûngte chu bawlhhlawh ang lekah ka ngai si a, Krista ka neih theihna tûr leh, 9 amah nêna pumkhat kan nih theihna tûrin. Ka felna chu Dân zawmna avânga lo awm a ni lo va, Krista rinnaa innghat zâwk a ni, chu felna chu Pathian aṭanga lo chhuak leh rinnaa innghat a ni si a. 10 Ka thiltum chu Krista hriat te, a thawhlehna thiltihtheihna hriat te leh, amah anga tawrhte a ni a, a thih dân anga thih hial pawh ka inhuam a ni, 11 thihna ata thawhlehna hmasa chan theihna hun remchâng ka neih theihna tûrin chutiang chuan ṭhahnemngai takin ka ti a ni.
12 Chu chu ka la dawng lo va, ṭha famkima siam lah ka la ni hek lo; nimahsela, Krista Isua min thlan chhan ngei chu hlen chhuak tûrin theih tâwp ka chhuah zêl zâwk a ni. 13 Unaute u, chu lâwmman chu dawng tawhah ka inngai lo; amaherawhchu, thil chiang tak pakhat a awm: Hnung lama thil awmte chu theihnghilhin, hma lama thil awmte ka ban a, 14 Krista Isua hmanga Pathian chung lam kohna lâwmman dawng tûra ka thiltum hlen tûrin theih tâwp ka chhuah zêl a ni. 15 Chuvângin, keini puitlingte hian chu rilru put hmang chu i nei ang u, tu pawhin ngaihtuahna dang in neih chuan, Pathianin chung lam rilru put hmang chu a la hriattîr ang che u. 16 Eng pawh ni se, hma kan sâwn tawh chin aṭang hian hma i sâwn chhunzawm zêl ang u.
17 Unaute u, inpumkhatin min entawn ula, in tâna entawn tûr kan siam mila nungte chu ngaihven tlat rawh u. 18 Tûn hmaa an chanchin ka sawi ṭhin mi tam tak an awm a; nimahsela, tûnah chuan Krista nghaisakna ban* hmêlmate anga an nun tâk avângin, ṭap chungin an chanchin ka sawi a ni. 19 An tâwpna chu boralna a ni a, an pathian chu an pum a ni a, an ropuina chu an mualphona a ni; tin, an rilruah khawvêl thilte chauh a awm bawk. 20 Keini erawh chu vân khua leh tui kan ni a, vâna awm chhandamtu Lalpa Isua Krista chu nghâkhlel takin kan thlîr a ni. 21 Ani chuan thil engkim a hnuaia awmtîr theitu a thiltihtheihna ropui tak hmangin, kan taksa tlâwm tak hi a taksa ropui tak ang ni tûrin* a ti danglam ang.