Matthaia Ziak

9 Tichuan, lawngah a chuang a, râl lehlama awm a chênna khua Kapernaum chu a thleng ta a. 2 Tin, ngai teh! A hnênah zeng pakhat a mutna chawpin an rawn zâwn a. An rinna a hmuhin, Isua’n zeng hnênah chuan: “Ka fapa, hlau suh! I sualte chu ngaihdam a ni tawh e,” a ti a. 3 Dân hre mi ṭhenkhat chuan: “He pa hian Pathian a sawichhia a ni,” tiin an ngaihtuah a. 4 Isua’n an ngaihtuahnate chu hriain: “Engvângin nge in thinlungah sual lam in ngaihtuah? 5 ‘I sualte chu ngaihdam a ni tawh e,’ tia sawi nge, ‘Tho la kal rawh,’ tia sawi hi awlsam zâwk? 6 Eng pawh ni se, mihring Fapa hian leia sual ngaihdam theihna a nei tih in hriat ka duh a ni,” a ti a. Zeng hnênah chuan: “Tho la, i mutna kha la la, haw tawh rawh,” tiin a hrilh a. 7 Tin, a tho va, a haw ta a. 8 Mipuite’n chu chu an hmuhin an hlau ta hle a, mihringte hnêna chutiang thuneihna petu Pathian chu an chawimawi ta a.

9 Chuta ṭanga a kal lai chuan, chhiah pêkna hmuna lo ṭhu Matthaia chu a hmu a, a hnênah: “Min zui rawh,” a ti a. Ani chu a tho va, a zui ta nghâl a. 10 A hnua ina chaw a ei laiin, chhiahkhawntu tam tak leh mi sual tam tak rawn kalin, Isua leh a zirtîrte bulah chuan chaw an rawn ei ve a. 11 Pharisaite’n chu chu an hmuhin a zirtîrte hnênah: “Engvângin nge in zirtîrtuin chhiahkhawntute leh mi sualte bula chaw a ei?” an ti a. 12 Isua’n an thusawi a hriat chuan an hnênah: “Dam lote’n doctor an mamawh a, mi hrisêlte erawh chuan an mamawh lo. 13 Kal ula: ‘Inthawina ni lovin khawngaihna* ka duh,’ tih awmzia hi va zir rawh u. Mi felte tâna lo kal ka ni lo va, mi sualte simtîr tûr zâwka lo kal ka ni,” a ti a.

14 Tin, Johana zirtîrte a hnênah an lo kal a: “Engvângin nge keini leh Pharisaite’n chaw kan nghei ṭhin laia i zirtîrte’n an nghei ve loh?” tiin an zâwt a. 15 Tin, Isua’n an hnênah: “Mopa* ṭhiante chuan an bula mopa a awm chhûng chuan an sûn a ngai dâwn em ni? Nimahsela, an hnên ata mopa an hruai bo nîte a lo la thleng ang a, chutih hunah chuan chaw an la nghei ang. 16 Tu mahin puan hlui ṭet lai chu puan tharin an bel ngai lo, an belna puan thar chuan puan hlui chu a pawt mar ang a, a ti ṭet nasa lehzual ang. 17 Tu man savun peng* hluiah uain thar an thun ngai hek lo. Chutianga an tih chuan savun peng chu a puak ang a, uainte chu a bua ang a, savun peng chu a chhe mai ang. Nimahsela, uain thar chu savun peng tharah an thun zâwk ṭhîn a; tichuan, a pahnihin a ṭha ve ve ṭhîn,” a ti a.

18 Chûng thute a sawi lai chuan, ngai teh, rorêltu tu emaw rawn kalin chibai a rawn bûk a, a hnênah: “Tûnah chuan ka fanu chu a thi tawh ngei ang; nimahsela, rawn kalin a chungah i kut rawn nghat la, ani chu a nung leh ang,” a ti a.

19 Tichuan, Isua chu a tho va, a zirtîrte nên rorêltu chu an zui ta a. 20 Tin, ngai teh! Thi pût avânga kum 12 chhûng hrehawm lo tuar tawh hmeichhe pakhat chuan hnung lam aṭanga panin, a kawrfual hmâwr chu a dek a. 21 “A kawrfual chauh pawh dek ila, ka dam mai ang,” tiin a ngaihtuah reng ṭhîn a ni. 22 Isua chu a hawi lêt a, ani chu a hmu a: “Ka fanu, hlau suh! I rinnain a ti dam che a ni,” a ti a. Tichuan, hmeichhia chu a dam ta nghâl a.

23 Tin, rorêltu in chu a thleng a, phênglâwng tumtute’n lusûnna hla an lo tum lai leh mipui zi nuaih nuaih chu a hmu a. 24 Isua’n an hnênah: “Chhuak rawh u, hmeichhe naupang hi a thi lo va, a muhîl a ni zâwk e,” a ti a. Anni chuan deusawh takin an nuih a. 25 Mipuite pâwna an chhuah veleh ani chu a lût a, hmeichhe naupang kut chu a vuan a, a lo tho ta a. 26 Chumi ram zawng zawngah chuan a thil tih chungchâng chu a thang chhuak a.

27 Chuta ṭang chuan a kal zêl a, mitdel pahnihin: “Davida Fapa, min khawngaih* rawh,” tia auvin an zui a. 28 Ina a luh hnu chuan mitdelte chu a hnênah an lo kal a, Isua’n an hnênah: “Ka tih dam theih che u in ring em?” tiin a zâwt a. Anni chuan: “Ring e, Lalpa,” tiin an chhâng a. 29 Tichuan, an mitte chu khawihin: “In rin ang ngei chuan in chungah lo thleng rawh se,” a ti a. 30 Tin, an lo hmu thei ta a. Isua chuan: “Tu hnênah mah hrilh suh ang che u,” tiin uluk takin a chah a. 31 Nimahsela, an chhuah hnuin chumi ram chhûng zawng zawngah chuan a chungchâng chu an sawi darh ta tho va.

32 Chûng mite an chhuah hnu chuan, mipuite chuan ramhuai man ṭawng thei lo pakhat a hnênah an rawn hruai a. 33 Ramhuai chu hnawh chhuah a nih hnu chuan ani chu a lo ṭawng ta a. Mipuite chuan mak an ti hle a: “Israel ramah hetiang hi hmuh a la ni ngai lo,” an ti a. 34 Nimahsela, Pharisaite erawh chuan: “Ramhuaite a hnawh chhuah theih chhan chu ramhuai lal vâng a ni,” tiin an sawi thung.

35 Tin, Isua chuan khawpui leh khaw tê zawng zawng chu fang zêlin inkhâwmna inahte a zirtîr a. Ram chanchin ṭha hrilin, natna leh dam lohna tinrêng neite chu a ti dam hlawm a. 36 Mipuite a hmuh chuan, vêngtu nei lo berâm ang maia châwm ṭhat loh leh ngaihthaha an awm avângin a khawngaih ta êm êm a. 37 Tichuan, a zirtîrte hnênah: “Buh seng tûr a tam hle a; nimahsela, a sengtute an tlêm hle. 38 Chuvângin, buh Neitupa hnênah chuan buh sengtu tûrte tîr chhuak tûrin ngên rawh u,” tiin a hrilh a ni.