Thessalonika Khuaa Mite Hnêna Lehkhathawn Pakhatna

1 Kei Paula, Silvana* leh, Timothea te hian Pa, Pathian leh Lalpa Isua Krista nêna inpumkhat Thessalonika khuaa kohhran hnênah he lehkha hi kan thawn a ni:

Khawngaihna nasa tak leh thlamuanna* in hnênah awm rawh se.

2 Kan ṭawngṭainaahte chuan, in vaia hming lamin Pathian hnênah lâwmthu kan sawi fo ṭhîn. 3 Kan Pathian leh Pa hmaa rinawm taka in hnathawh te, hmangaihna avânga in thawhrimna te leh, kan Lalpa Isua Krista in beisei avânga in chhelnate chu kan hre reng ṭhîn. 4 Pathianin a hmangaih unaute u, Pathianin a thlang che u tih kan hria e. 5 In zîngah in tân eng ang mi nge kan nih ṭhin in hriat ang khân, chanchin ṭha kan hrilh kha thu chauhvin in hnênah a thleng lo va, thiltihtheihna leh thlarau thianghlim leh rinngheh tlatna nên a lo thlen zâwk kha. 6 Hrehawm tam tak tuar chunga thlarau thianghlima lâwmna nên thu chu in pawm tâk avângin, keimahni leh Lalpa entawntute in lo ni ta a. 7 Tichuan, Makedonia leh Akaia rama ringtu zawng zawngte tân entawn tûr in lo nih kha.

8 A nihna takah chuan, Jehova* thu chu nangmahni hnên aṭangin Makedonia leh Akaia ramah a thang chhuak chauh pawh ni lovin, Pathian in rinna chu hmun tinah a darh ta a; chuvângin, eng mah kan sawi a ngai tawh lo. 9 Kan inhmuh hmasak ber chungchâng leh, Pathian nung leh dik bâwih ni tûra in milemte kalsana Pathian lam in hawi tâk dânte kha anmahni ngeiin an sawi fo ṭhîn. 10 A Fapa vân aṭanga lo kal tûr chu in nghâk mêk a ni tih pawh an sawi ṭhîn a; ani chu Isua, thihna ata a kaihthawh, thinurna lo thleng tûr laka min chhan chhuaktu tûr chu a ni.