Matthaia Ziak

10 Tichuan, zirtîr 12-te chu a ko khâwm a, ramhuaite hnawh chhuah theihna tûr leh natna leh dam lohna tinrêng an tih dam theihna tûrin thuneihna a pe a.

2 Tirhkoh 12-te hming chu: A hmasa berin Simona, Petera tia an koh leh a unaupa Andria te; Zebedaia fapa Jakoba leh a unaupa Johana te; 3 Philipa leh Bartholomaia te; Thoma leh chhiahkhawntu Matthaia te; Alphaia fapa Jakoba te; Thaddaia te; 4 mi ṭhahnemngai tak Simona te leh, a hnua Isua phatsantu Juda Iskariota te an ni.

5 Isua’n chûng tirhkoh 12-te chu a tîr chhuak a, an hnênah heti hian kaihhruaina a pe a ni: “Hnam dangte kawngah kal suh ula, Samari mite khuaah rêng rêng pawh lût hek suh u. 6 Chu aiin, Israel hnam berâm bote chu zawng zêl zâwk ula. 7 Tin, in kalna apiangah: ‘Vân Ram chu a hnai tawh e,’ tiin hril zêl ang che u. 8 Dam lote ti dam ula, mitthite kai tho ula, phârte ti thianghlim ula, ramhuaite hnawt chhuak ang che u. A thlâwnin in dawng a, a thlâwnin pe ang che u. 9 In kâwnghrênah rangkachak te, tangkarua te, dârte pai suh u. 10 In zinnaah pawh iptê emaw, kawr pahnih* emaw, pheikhawk emaw, tiang emaw keng hek suh ang che u, hnathawktu chu ei tûr hmu tlâk a ni si a.

11 “Khawpuiah emaw, khaw têah emaw in luhna apiangah nangmahni leh in thuchah ken dawngsawng tlâkte chu zawng chhuak ula, in chhuah leh hma loh zawng chutah chuan awm reng ang che u. 12 Ina in luh dâwnin in neitu chu chibai bûk* ula. 13 In neitu chu a dawngsawng tlâk mi a nih chuan in thlamuanna thu chu a chungah thleng sela, a dawngsawng tlâk mi a nih loh erawh chuan in thlamuanna* thu chu in chungah lo lêt leh rawh se. 14 Khawi hmunah pawh nangmahni leh in thuchah ken dawngsawng duh lo an awm a nih chuan, chu in aṭang emaw, khua aṭang emaw chuan chhuak ula, in kephaha vaivut chu thing thla* ang che u. 15 Tih tak meuhvin ka hrilh a che u, Rorêlna Nîah chu khua chuan Sodom leh Gomorra ram aiin a tuar nasa zâwk ang.

16 “Ngai teh u! Chinghne zînga berâm tirh angin ka tirh chhuah che u hi; chuvângin, rûl anga fing, ṭhuro anga pawi sawi lo in nihzia lantîr ang che u. 17 Mihringte lakah chuan fîmkhur rawh u, rorêlna inahte hruai che uin, an inkhâwmna inahte chuan savun hruihrualin an la vua ang che u. 18 Keimah avângin rorêltute leh lalte hmaa hruai in la ni ang, anmahni leh hnam dangte hnêna thu in hrilh theihna tûrin. 19 Nimahsela, chutianga an hruai hunah che u chuan, in thusawi tûr leh sawi dân tûr chu lungkham suh u; chumi hunah chuan in thusawi tûrte chu hriattîr in ni dâwn si a. 20 Thusawitu chu nangmahni chauh in ni dâwn si lo, Pathianin in sawi tûrte chu a hriattîr ang che u. 21 Miin a unaupa a tih hlumtîr ang a, pain a fa a tih hlumtîr ang a, fate’n an nu leh pate dodâlin an la tih hlumtîr ang. 22 Ka hming avângin mi zawng zawng huat in la ni ang; nimahsela, a tâwp thlenga chhel taka tuar apiang chu chhandam an ni ang. 23 Khaw pakhata an tih duhdah hunah che u chuan khaw dangah tlânchhia ang che u; tih tak meuhvin ka hrilh a che u, Israel ram puma thu in hrilh zawh hmain mihring Fapa a lo kal ang.

24 “Zirlai chu a zirtîrtu chungah a awm lo va, chhiahhlawh pawh a pu chungah a awm hek lo. 25 Zirlai a zirtîrtu ang a rawn nih leh chhiahhlawh a pu ang a rawn nih chu a tâwk e. Mite’n chhûngkaw lû ber chu Beelzebula* tia an koh chuan, a chhûngte phei chu an va ko nasa lehzual dâwn êm! 26 Chuvângin, anni chu hlau suh u, lang lo tûra thuhrûk eng mah a awm lo va, thurûk hriat chhuah loh tûr eng mah a awm hek lo. 27 Thima ka hrilh che u hi êngah puang chhuak ula, a rûka ka hrilh che u hi in chung aṭangin tlângaupui ang che u. 28 Taksa ti hluma nunna* ti hlum thei lotu chu hlau suh ula, Gehenna-a* taksa leh nunna ti hlum theitu chu hlau zâwk rawh u. 29 Chawngzawng pahnih pawisa thîr hlutna nei tlêm tak pakhat* lekin an hralh ṭhîn a ni lâwm ni? Nimahsela, an zînga pakhat mah in Pa hriat lohvin leiah a tla lo vang. 30 In samzai zawng zawngte pawh hi chhiar vek a ni asin. 31 Chuvângin, hlau suh u; chawngzawng tam tak aiin in hlu zâwk hle si a.

32 “Tu pawh mite hmaa mi ṭan apiang chu, ka Pa vâna mi hmaah ka ṭan ve ang. 33 Nimahsela, tu pawh mite hmaa mi phat apiang chu, ka Pa vâna mi hmaah ka phat ve ang. 34 Leiah hian remna thlentîr tûra lo kal emaw mi ti suh u; remna thlentîr tûra lo kal ka ni lo va, inṭhen darhna* thlentîr tûra lo kal ka ni zâwk. 35 Mi a pa dotîr tûr te, fanu a nu dotîr tûr te leh, mo a pasala nu dotîr tûrtea lo kal ka ni. 36 Mi a hmêlmate chu ama chhûngkaw zînga mite ngei an ni ang. 37 Tu pawh keimah aia a nu leh a pa emaw, a fate emaw hmangaih zâwktu chu ka mi ni tlâk a ni lo va. 38 Tu pawh nghaisakna bana* hrehawm tawrh inhuama mi zui lo chu ka mi ni tlâk a ni hek lo. 39 Tu pawh a nun chhanhim tum apiang chuan a chân ang a, tu pawh keimah avânga a nun chân apiang chu a nung leh ang.

40 “Tu pawh nangmahni lâwm apiang chu kei mi lâwm an ni a, kei mi lâwm apiang chu mi Tîrtu lâwm an ni. 41 Tu pawh zâwlnei, zâwlnei a nih avânga lo lâwm chuan zâwlneiin a dawn lâwmman ang chu a dawng ang a; tu pawh mi fel, mi fel a nih avânga lo lâwm chuan mi felin a dawn lâwmman ang chu a dawng ang. 42 Tu pawh hêng mi tête zînga mi hi, zirtîr a nih avânga tuisik in tûr no khat lek pawh pe apiang chu, tih tak meuhvin ka hrilh a che u, chu mi chuan a lâwmman dawn tûr chu a chân tawp lo vang,” tiin.