Matthaia Ziak
16 Tichuan, Pharisaite leh Saddukaite’n an rawn pan a, amah fiah nân vân aṭanga chhinchhiahna hmuhtîr tûrin an phût a. 2 Ani erawh chuan an hnênah: “Tlai lam a lo nihin, ‘Khua a ṭha dâwn a ni ang, vân a sen êm mai,’ in ti a. 3 Zîng lamah erawh, ‘Vawiin chu khua a chhiain ruah a sûr dâwn a ni ang, vân sen mah se, chhûm a tam êm mai,’ in ti ṭhîn. Vân awm dân enin khaw awm dân tûr in hre thiam a; nimahsela, hun chhinchhiahna erawh in hre thiam thei si lo. 4 Chhuan sual leh uirê hmangte* chuan chhinchhiahna an zawng reng a; nimahsela, zâwlnei Jona chhinchhiahna chauh lo chu pêk an ni lo vang,” tiin a chhâng a. Tichuan, anni chu a kalsan ta daih a.
5 Tin, zirtîrte chu râl lehlamah an kai a, chhang an ken theihnghilh a. 6 Isua chuan an hnênah: “Invêng ula, Pharisaite leh Saddukaite dawidim lakah chuan fîmkhur rawh u,” a ti a. 7 Anni chuan: “Chhang kan keng hauh si lo va,” tiin an ngaihtuah a. 8 Isua’n chu chu a lo hriatin: “Rinna nei tlêmte u, engvângin nge chhang in ken loh thu in ngaihtuah? 9 Tûn thleng pawhin in la hre thiam na nge? Chhangpêr pangaa patling 5,000 hrai an nih dân leh a bâng nawi bâwmrâng in lâk khâwm zât pawh kha in hre tawh na nge? 10 A nih loh leh, chhangpêr pasariha patling 4,000 hrai an nih dân leh a bâng nawi bâwmrâng lian taka in lâk khâwm zât pawh kha in hre tawh lo vem ni? 11 Engati nge chhang chungchâng ka sawi lo tih in hriatthiam loh? Nimahsela, Pharisaite leh Saddukaite dawidim lakah chuan fîmkhur rawh u,” a ti a. 12 Tichuan, chhang dawidim lakah ni lovin, Pharisaite leh Saddukaite zirtîrna laka fîmkhur tûrin a hrilh a ni tih an hre thiam ta a.
13 Tin, Philipa Kaisari bial a lo thlenin Isua’n a zirtîrte hnênah: “Mihring Fapa hi mite’n tu nge a ni min tih?” tiin a zâwt a. 14 Anni chuan: “Mi ṭhenkhatin ‘Baptistu Johana a ni,’ an ti che a; mi dangte chuan, ‘Elija a ni,’ an ti che a; mi dang lehte chuan, ‘Jeremia emaw, zâwlnei tu emaw a ni,’ an ti che,” tiin an chhâng a. 15 Tichuan an hnênah: “A nih leh, nangni’n tu nge a ni min tih?” tiin a zâwt a. 16 Simon Petera chuan: “Krista, Pathian nung Fapa chu i ni,” tiin a chhâng a. 17 Isua’n a hnênah: “Jona fapa Simon, hlim takin awm rawh, tisa leh thisenin* a hriattîr che a ni si lo, ka Pa vâna miin a hriattîr che a ni zâwk e. 18 Hei hi ka hrilh bawk a che: Petera i ni, he lungpui chungah hian ka kohhran ka din ang a, Thlân* kawngkhârte pawhin chu chu a ngam lo vang. 19 Vân Ram chabite ka pe ang che; tichuan, leia i phuar apiang chu vâna phuar sa a ni ang a, leia i phelh apiang chu vâna phelh sa a ni bawk ang,” a ti a. 20 Tin, zirtîrte chu Krista a nih thu tu mah hrilh lo tûrin ngun takin a hrilh a.
21 Chumi hun aṭang chuan Isua’n a zirtîrte chu Jerusalema a kal tûr thu te, Juda hruaitu te, puithiam lal te leh, dân hre mite hnên aṭanga hrehawm tam tak a tawrh tûr thu te, tih hlum a nih tûr thu te leh, ni thum nîa kaihthawh a nih tûr thute a hrilh ṭan ta a. 22 Petera chuan a hruai hrang a: “Lalpa, chutiang thil chu sawi suh; chûng chu i chungah a thleng tawp lo vang,” tiin a zilh a. 23 Ani erawh chuan Petera chu hnungchhawnin: “Setan, min kalsan rawh! Pathian ngaihtuah dân ni lo va, mihring ngaihtuah dâna i ngaihtuah avângin ka tih tûr ti thei lo tûra min dan i tum a nih hi,” tiin a chhâng a ni.
24 Tichuan, Isua’n a zirtîrte hnênah: “Tu pawhin mi zui a duh chuan mahni tâna nung tawh lovin, a nghaisakna ban* puin mi zui reng rawh se. 25 Tu pawh a nun chhanhim tum apiangin a chân ang a; nimahsela, tu pawh keimah avânga a nun chân apiang chu a nung leh ang. 26 Miin khawvêl hi a pumin nei se, a nun chân si sela, a tân eng hlâwkna nge awm ang? A nih loh leh, miin a nunna aiah eng nge a pêk ang? 27 Mihring Fapa hi a Pa ropuinaa inthuamin a vântirhkohte nên a lo kal ang a; tichuan, mi tinte chu an thil tih ang zêlin ro a rêlsak ang. 28 Tih tak meuhvin ka hrilh a che u, heta ding ṭhenkhat hi mihring Fapa a Lalrama a lo kal an hmuh thlenga thi hauh lo tûr an awm,” a ti a.