Timothea Hnêna Lehkhathawn Pahnihna

4 Pathian hmaah leh Krista Isua, amah leh a Lalram a lo lan huna mitthi leh mi nung rorêlsaktu tûr hmaah tih tak zetin thu ka pe a che: 2 Thu chu hril rawh; hun ṭhaahte leh hun ṭha lovahte pawh ṭhahnemngai takin hril rawh; dawhthei tak leh thiam taka zirtîr chungin an thiam lohna hriattîr la, zilh la, fuih rawh. 3 Zirtîrna ṭha an ngaihthlâk duh loh hun a la thleng dâwn si a, an bengte tiza tûrin* anmahni duh zâwng angin zirtîrtute an la zawng ang a. 4 Thutak ngaihthlâk bânsanin, thawnthu mai maite an ngaithla tawh zâwk ang. 5 Nang erawh chu engkimah ngaihven rengin awm la, chhel takin hrehawm tuar la, chanchin ṭha hriltu hna thawk la,* i rawngbâwlna kha kim takin hlen rawh.

6 Kei zawng in tûr thilhlan anga leihbuakin ka awm tawh si a, ka chhuah hun a thleng dâwn ta. 7 Rinna inbeihna ṭha chu ka bei tawh a, intlânsiaknaah a tâwp thlengin ka tlân tawh a, rinna chu ka vawng reng a ni. 8 Tûn aṭang hian felna lallukhum chu ka tân dah ṭhatin a awm tawh a, chu chu Lalpa, fel taka rorêltu chuan lâwmman atân chumi nîah chuan min pe ang, keimah chauh ni lovin, a lo lan hun nghâkhleltu zawng zawngte pawh a pe bawk ang.

9 Ka hnêna lo kal thuai tum hrâm rawh. 10 Dema chuan he khawvêl* hi a hmangaih avângin min kalsan a, Thessalonika khuaah a kal ta si a; Kreska chu Galatia ramah a kal a, Tita chu Dalmatia ramah a kal bawk a. 11 Luka chauh ka hnênah a awm ta. Marka kha i rualin lo hruai rawh, ani kha rawngbâwlnaah ka tân a ṭangkai si a. 12 Tukika erawh chu Ephesi khuaah ka tîr a ni. 13 I lo kal hunah Troas khuaa Karpa hnêna ka hnutchhiah kawrfual leh lehkhazialte, a bîk takin savun lehkhate kha rawn keng ang che.

14 Dâr chher thiam Aleksandra khân vawi tam tak min ti nâ a, Jehova’n* a thil tihte ang zêlin a rûl ang. 15 Nang pawh a lakah khân invêng ang che, kan thuchah nasa takin a dodâl si a.

16 Ka thiamthu ka sawi hmasak ber ṭum khân, min sawipui tûrin tu mah an lo kal lo, an vaiin min kalsan ta zâwk a—Pathianin an thil tih chu hriatsak reng suh se. 17 Amaherawhchu, keimah avânga thu hrilhna kim taka hlen chhuah a nih theih nân leh, hnam dang zawng zawngin an lo hriat theih nân, Lalpa chu ka bulah dingin thiltihtheihna min pe a; tin, sakeibaknei kâ aṭanga chhan chhuahin ka lo awm ta a ni. 18 Lalpa chuan sual hnathawh tinrêng lak aṭanga min chhan chhuakin, min chhandam ang a, a vân lam Lalramah min hruai ang. A hnênah chatuanin ropuina awm rawh se. Amen.

19 Priskilli leh Akuila kha chibai min bûksak la, Onesiphora leh a chhûngte pawh kha chibai min bûksak ang che.

20 Erasta chu Korinth khuaah a la châm a, Trophima erawh chu Mileti khuaah dam lovin ka kalsan ta a ni. 21 Thlasik hmaa lo thlen tum hrâm ang che.

Eubula’n chibai a bûk che a, Pudea te, Lina te, Klaudii te leh, unau zawng zawngte’n chibai an bûk bawk a che.

22 I rilru put hmang avângin Lalpa chu i hnênah awm rawh se. A khawngaihna nasa tak chu in hnênah awm rawh se.