Ṭhen 5
Zalên Taka Duhthlan Theihna Thilthlâwnpêk Ropui Chu
1, 2. Eng thilthlâwnpêk ropui nge kan nih dân chi khat kha?
PATHIANIN tuarna awm a phalna chhan leh a tih dân tûr hrethiam tûr chuan, min siam dân hi kan hlut a ngai phawt a ni. Taksa leh thluak chauh nêna min siam aia tam hi a ti a. Rilru leh thinlunga thil vei theihna zia bîk neiin min siam bawk a ni.
2 Kan rilru leh thinlunga kan thil vei lo induan dân chabi chu zalên taka duhthlan theihna hi a ni. Pathian chuan chhia leh ṭha hriatnaa duhthlan theihna zalênna kan rilruah hian a tuh a ni. Amah aṭanga thilthlâwnpêk ropui chu a ni teh meuh mai.
Siam Kan Nih Dân
3-5. Zalên taka duhthlan theihna hi engvângin nge kan hlut?
3 Pathianin tuarna awm a phalnaah hian zalên taka duhthlan theihna a tel ve dân i lo ngaihtuah teh ang. A ṭan nân, hei hi han ngaihtuah teh: I tihtûr leh sawi tûr, i ei tûr leh i thawmhnaw inbel tûr, i hnathawh tûr, leh i chênna hmun tûr leh i nun dân tûrahte zalên taka duhthlan theihna i neih kha i hlut em? tih hi. A nih loh leh tuin emaw i nunchhûng engtiklai pawha i thusawi leh chêtzia zawng zawng rêlsak dâwn che sela i duh ang em?
4 Mi ang pangngai tumahin an nun dân kawng zawng zawng thunun zawh sak vek chu an duh lo vang. Engvângin maw? A chhan chu Pathian min siam dân avâng hian a ni. Bible chuan Pathianin mihring chu a ‘anpui leh amah ang takin’ a siam tih min hrilh a, tin, Pathianin chhia leh ṭha hriatna a neihte zînga pakhat chu duhthlan theihna zalênna hi a ni. (Genesis 1:26; Deuteronomy 7:6) Mihring a han siam chuan, chu chhia leh ṭha hriatna ropui tak ang chiah chu a pe ve a—zalên taka duhthlan theihna thilthlâwnpêk chu. Chu chu rorêltu râwng tak takten sal ang maia min enkawl hi beidawnthlâk kan tihna chhan pakhat a ni.
5 Chuvângin zalênna duhna hi thil awm palh a ni lo va, Pathian chu zalênna Pathian a nih avângin. Bible chuan: “Jehova thlarau awmna apiangah chuan zalênna a awm ṭhîn,” a ti a ni. (2 Korinth 3:17) Chuvângin, Pathian chuan kan nih dân pêng ve rêng angin zalên taka duhthlan theihna hi min pe ta a ni. Kan rilru leh thinlunga kan thil veite hnathawh dân tûr kawng a hriat avângin, zalên taka duhthlang thei kan nihin kan hlim ber ang tih a hre reng a ni.
6. Pathianin kan thluak hi zalên taka duh kan thlan theihna nên inrem taka thawk tûrin engtin nge a siam?
6 Zalên taka duhthlan theihna rualin Pathian chuan ngaihtuah theihna, thil khaikhin theihna, thutlûkna siam theihna leh a dik leh dik lo thliar hran theihna te min pe tel bawk a ni. (Hebrai 5:14) Tichuan, zalên taka duhthlan theihna chu duhthlanna fing taka innghat tûr a ni ta a ni. Rilru nei lo leh mahnia duhthlan theihna nei lo mihring thawh ai thawktu khâwl te anga siam kan ni lo va. Ransate anga tisaa hriatna ang zêla che tûra siam kan ni hek lo. Chu ai chuan, kan thluak mak tak mai hi duhthlang tûra kan zalênna nêna inrem taka hnathawk tûra ruahman a ni zâwk.
Ṭanna Ṭha Ber Chu
7, 8. Pathianin ṭanna ṭha tak eng nge kan nu leh pa hmasa berte kha a pêk?
7 Pathianin a ngaihsakzia lantîr nân, zalên taka duhthlan theihna rualin kan nu leh pa hmasa ber Evi leh Adama te chu tupawhina kan thil duh tûr ang engkim pêk an ni a. Paradis zau takah chuan dah an ni a. Tisa thil chu hnianghnârin an nei a ni. An tar emaw an nat emaw an thih emaw lohna tûrin rilru leh taksa ṭha famkim an nei a—chatuana nung thei tûr chu an ni. Fa ṭha famkimte pawh an neiin chûng chuan hmabâk hlimawm leh chatuan daih an nei ve thei tûr a ni a. Mihring lo pung zêlte pawhin lei pumpui paradisa chantîrna hna lungawithlâk an nei tûr hi a ni.—Genesis 1:26-30; 2:15.
8 Thil pêk chungchângah hian Bible chuan: “Pathianin thil siam tinrêng chu a en a, ngai teh, ṭha a ti êm êm a,” tiin a sawi a. (Genesis 1:31) Bible vêkin Pathian chu: “A thiltih a fel famkim,” a ti bawk. (Deuteronomy 32:4) Ni, Siamtu chuan mihring chhûngkua chu bul ṭanna ṭha famkim a pe a. Chu aia ṭha a awm thei chuang lo vang. Ngaihsaktu Pathian chu a lo va ni chiang êm!
Chintâwk Awma Zalênna
9, 10. Engvângin nge zalên taka duhthlan theihna hi dik taka khuahkhirh tûr a nih?
9 Amaherawhchu, Pathian chuan zalên taka duhthlan theihna chu chintâwk awm lo tawp ni tûrin a ti em? Lîrthei thila dân awm lohna khawpui, tupawhin duh ang tâwka chaka duh lam lam hawia an khalh theihna khawpui buai tak han mitthla teh. Chutiang dinhmunah chuan lîrthei i khalh duh ang em? Duh hauh lo vang, lirthei thila a buai tûr bâkah chêtsualna tam tak a thlen ngei dâwn si a.
10 Chutiang bawk chu Pathian thilthlâwnpêk zalên taka duhthlan theihnaah pawh a ni. Chintâwk awm lova zalênna chuan khawtlângah rorêlna a mumal lo tih a kâwk dâwn si a. Mihring thiltihte kaihruai tûrin dân a awm a ngai a ni. Pathian Thu chuan: “Zalên in ni a, nimahsela in zalênna chu sual khuh nân hmang suh u,” a ti a ni. (1 Petera 2:16, JB) Pathian chuan zalên taka duhthlan theihna chu ṭhattlânna atâna khuahkhirh ni tûrin a duh a. Zalênna pumhlûm ni lo, mahse zalênna inkûngkaih, dân rorêlna hnuaia awm min neihtîr hi a tum dân a ni.
Tu Dânte Nge?
11. Tu dânte nge zâwm tûra duan kan nih?
11 Tu dânte nge zâwm tûra duan kan nih? 1 Petera 2:16 (JB) hi châng dangah chuan: “Tuma bâwih ni lovin Pathian bâwih in ni,” tiin a sawi a. Hei hian râwng taka bâwiha awmna a kâwk lo va, kan hlim theih ber nâna Pathian dân hnuaia intulût tûra duan kan ni tihna a ni zâwk. (Matthaia 22:35-40) A dânte chuan mihringte ngaihtuah chhuah dân engpawh aia kaihhruaina ṭha ber min pe a ni. “Kei hi Jehova, in Pathian, in ṭhatna tûra nangmahni zirtîrtu, in kalna tûr kawnga hruaitu che u ka ni.”—Isaia 48:17.
12. Pathian dân chhûngah eng duhthlan theihna zalênna nge kan neih?
12 Hetih lai vêk hian, Pathian dânte chuan an ramri huam chhûngah zalên taka duhthlan theihna zau tak an la phal a. Hei hian thil chi hrang hrang rahchhuakin, mihring chhûngkua hi mawi takin a siam ta a ni. Chaw, thawmhnaw, rimawi, themthiamna sâng leh chênna in chi hrang hrang khawvêl pumpuia awmte hi han ngaihtuah teh. Chutiang thilah chuan mite min rêl fel sak aiin mahni ngeiina duh han thlan chu kan duh zâwk chiang alâwm.
13. Keimahni ṭhatna tûrin eng tisa dânte nge kan zawm tûr?
13 Mihringte awmdân tûra Pathian dân siam anga kan awma hlim ber tûra siam kan lo ni. Pathianin leilung dân a siam anga awm nên hian a inang a ni. Entîr nân, leihîpna dân hi pawisa lovin, hmun sâng deuh aṭangin zuang thla ta ila chuan, kan inhliam emaw kan thi emaw a ni ang. Kan taksa chhûnglam dân hi pawisa lovin kan chaw ei, tui in leh boruak hîp luh te hi tâwp ta vek ila chuan, kan thi mai ang.
14. Mihringte hi Pathian laka inlahrang tûra siam kan ni lo tih engtin nge kan hriat?
14 Pathianin leilung dân a siam anga awm tûr kan ni tih a chiang ang bawkin, Pathian felna leh vântlâng dân anga awm tûra siam kan ni. (Matthaia 4:4) Mihringte hi an Siamtu laka inla hranga hlawhtling tûra siam an ni lo. Zawlnei Jeremia chuan: “Tungchhova kal mihringah hian a pheikhai hruai tûr a awm lo. Aw Jehova, mi thunun rawh,” tiin a lo sawi a ni. (Jeremia 10:23, 24) Chuvângin, mihringte hi kawng engkimah mahni thu ni lovin Pathian rorêlna hnuaia nung tûra siam an ni.
15. Evi leh Adamate tân khân Pathian dân kha phurrit a ni ang em?
15 Kan nu leh pa hmasa berte tân Pathian dân zawm chu thil hahthlâk a ni hauh lo vang. An tân leh mihring chhûngkaw pumpui tâna hamṭhatna tûrin a thawk dâwn zâwk a ni. Nupa hmasa berte kha Pathian dân huap chin chhûngah awm reng ta sela chuan, a ṭha vek ni mai tûr. Dik chiah chuan, tûnah te hian mihring chhûngkaw lungrual leh inhmangaih takin paradis nuam leh mak takah chuan kan chêng dâwn asin! Sualna, tuarna leh thihna a awm dâwn si lo va.
[Phêk 11-naa milem]
Siamtu chuan mihringte chu ṭanna ṭha famkim a pe
[Phêk 12-naa milem]
Lîrthei veivahna dânte hi awm lo ta sela, lîrthei veivâk tam lutuk kârah motor i khalh duh ang em?