Heng Zawng Zawngte Hi Eng Tihna Nge?
ISUA KRISTA chuan: “Khawvêl tâwpna” chu indo te, ṭâm te, hri lêng te, leh lîrnghîngte hmanga chhinchhiah a ni dâwn tih a sawi a ni.—Matthaia 24:1-8; Luka 21:10, 11.
Kum 1914 aṭangin, ram leh ram, chi leh chi indona avângin hringnun chu tihchhiat a ni a, chûng indonate chu sakhaw hruaitute politics-a an inrawlh vâng a ni fo va, tûnah chuan firfiakho beihna darhzau tak mai avânga lo chhuak a ni.
Science lama hma sâwnna a awm chung pawhin, khawvêl puma mi maktaduai za têlte chu ei-in tlachhamin an awm a. Kum tinin mi maktaduai têlte chu ṭâm avângin an thi a ni.
Hri lêng pawh hi Isua’n chhinchhiahna a pêk zînga mi a ni a. Khawvêl Indopui I-na zawhah chuan, tlâng hri lêng (influenza) chuan mi 21,000,000 chuangte nun chu a la a. Tûn hmaa tualchhûng hri lêng ang mai kha ni lovin, he hri lêng hian khawvêl pum a tuam chhuak a, hmun hla tak thliarkâra awmte pawhin an tuar a ni. Tûnah chuan AIDS hian khawvêl pum a fan chhuak bawk a; tin, ram hnufualahte chuan TB te, sikserh te, tuihri te, leh khawsikpui te pawh a la awm zui zêl a ni.
A nasat dân inang lo mah se, kum tinin lîr hi vawi sîng têl a nghîng reng a. Lîrnghîng tûr hriat lâwktîr theihna leh a tehna hmanraw hrang hrang a awm tawh chung pawhin, mipui awmna hmuna lîr a nghîn avânga chhiat tâwk chanchin hriat tûr a tam thei hle.
Bible chuan, heti hian a sawi lâwk bawk a ni: “Hei hi hre rawh, ni hnuhnûngahte chuan hun khirh takte a lo awm ang. Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu âwih lo te, lâwm nachâng hre lo te, thianghlim lo te, hmangaihna pianpui nei lo te, huaikawmbâwl te, hêktu te, insûm thei lo te, mi kawlhsen te, ṭha duh hauh lo te, vervêk te, thuhnudâwn lo te, inngaihlu te, Pathian hmangaihna aia mahni lâwmna mai hmangaih zâwktu te an ni dâwn si; Pathian ngaihsak anna an nei ang a, nimahsela a thiltihtheihna chu an âwih lo vang; chûng ang chu hawisan rawh,” tiin.—2 Timothea 3:1-5.
“Hun khirh takte” a tih hunah kan chêng tih i ring lâwm ni?
Mite chu a hleihluaka mahni inhmangaih te, tangka ngaina te, leh chapo te an ni tih i hmu em?
Khawvêl hi mahni duhzâwng phût tlat sia lâwm nachâng hre si lo te, huaikawm bâwl te, leh thianghlim lo te hlîrin a khat tih tuin nge hnial ang le?
Nu leh pa thu âwih lohna leh hmangaihna pianpui neih lohnate chu hmun ṭhenkhatah mai ni lovin, khawvêl pum puiah a zual telh telh tih i hria em?
Mahni lâwmna mai hmangaih a, ṭhatna hmangaih si lo mite hlîra khat khawvêla chêng kan nihzia i hre ngei ang. Hêng hi Bible-in ‘ni hnuhnûnga’ lo awm tûr rilru put hmang a sawite a ni.
Kan awmna hun târ langtu finfiahna dang kan la mamawh em? Isua chuan chutih lai vêk chuan, Pathian Ram chanchin ṭha chu khawvêl zawng zawngah hrilh a ni dâwn tih a sawi lâwk bawk a. (Matthaia 24:14) Chu chu tûnah hian thawh a ni em?
Jehova Lalram chanchin ṭha puan chhuah nân liau liauva buatsaih, Bible ṭanchhan chanchinbu, Vênnainsâng hi hun bi neia chhuak chanchinbu zîngah ṭawng chi hrang hranga chhuah tam ber a la ni reng a ni.
Kum tinin, Jehova Thuhretute chuan Pathian Ram chanchin mite hrilhhriat nân dârkâr tlûklehdingâwn khat aia tam an hmang a ni.
Bible hrilhfiahtu thu leh hla chhuahte chu ṭawng chi hrang 400 vêlin an chhuah a, hmun fianrial taka chêngte leh mi tlêm tê chauhvin an hman ṭawngte pawhin lehkhabu an chhuah a. Jehova Thuhretute chuan hnam zawng zawng hnênah chanchin ṭha an hril a; khawvêl politics lama thlîra engmah tham ni lo thliarkârte leh ram bial tam takahte pawh chanchin ṭha an hril bawk a. Tin, ram tam takah chuan, Bible zirna an neihpui ziah bawk a ni.
Ni e, Pathian Ram chanchin ṭha chu, mi zawng zawngte inlehtîrna tûr atân ni lovin, hriattîrna tûr atân zâwkin khawvêl zawng zawngah hrilhin a awm tak zet tawh a ni. Khawvêl hmun tina mite chu lei leh vân Siamtu an ngaihsak dâwn leh dâwn loh te, a dânte zahin an mihringpuite chunga hmangaihna an lantîr dâwn leh dâwn loh te târ lan theihna hun remchâng ṭha tak pêk an ni.—Luka 10:25-27; Thu Puan 4:11.
Nakin lawkah, Pathian Ram chuan khawvêla mi suaksual zawng zawngte hi a tiboral vek ang a, khawvêl pum hi paradis-ah a siam ang.—Luka 23:43.
[Phêk 6-naa bâwm]
Eng Atâna Ni Hnuhnûng Nge?
Mihringte tâwpna tûr ni hnuhnûng a ni lo. Pathian duhzâwng titute tân Bible chuan chatuana nun beiseina a tiam si a.—Johana 3:16, 36; 1 Johana 2:17.
Leilung tihchhiatna tûr ni hnuhnûng lah a ni hek lo. Pathian Thu chuan he lei hi kumkhuaa a awm tûr thu min tiam si a.—Sâm 37:29; 104:4; Isaia 45:18.
Chutiang ni lovin, tharum thawhna, hmangaihna tel lo he kalhmang leh a kawng zawh tlattute tâwpna hun sawina a ni zâwk a ni.—Thufingte 2:21, 22.
[Phêk 7-naa bâwm/milem]
Bible Hi Pathian Thu A Ni Tak Zet Em?
Bible-a zâwlneite chuan: “LALPA chuan heti hian a ti,” tiin an ziak ṭhîn a. (Jeremia 2:2; Isaia 43:14) Pathian Fapa, Isua Krista meuh pawhin ‘ama phuahchawpa sawi a nih lohzia’ a sawi uar hle a ni. (Johana 14:10) Bible ngei chuan chiang takin: “Pathian Lehkha Thu zawng zawng hi Pathian thâwk khuma pêk a ni,” tiin a sawi bawk.—2 Timothea 3:16.
United Bible Society sawi dânin, Bible hi ṭawng chi hrang 2,200 chuanga lehlin a ni a, hetiang tluka ṭawng chi tama lehlin lehkhabu dang a awm lo rêng rêng. Bible tluka sem chhuah hnem lehkhabu dang a awm lo bawk—tûnah hian bu tlûklehdingâwn li aia tam sem chhuah a ni tawh a. Mi zawng zawngte tâna Pathian thuchah chu chutiang ni tûrin i beisei rêng a ni lâwm ni?
Bible hi Pathian thâwk khum a nih ngeizia sawihona tam zâwk hriat nân, The Bible—God’s Word or Man’s?, tih lehkhabu Jehova Thuhretute chhuah chu en rawh.
Bible hi Pathian Thu ngei a ni tih pawm chunga i chhiar chuan, nasa takin i hlâwkpui ang.
[Phêk 8-naa bâwm/milemte]
Pathian Ram Hi Eng Nge Ni?
Chu chu lei leh vân Siamtu Pathian dik Jehova rorêlna lantîrtu, vân lam sawrkâr, a ni.—Jeremia 10:10, 12.
Bible chuan Isua Krista chu Pathianin rorêl tûra thuneihna a pêk thu a târ lang. (Thu Puan 11:15) He leia a awm lai khân, Isua chuan Pathian hnên aṭangin thuneihna sâng tak—leilung chakna thlipui leh tuipui ang chite thunun tûra thuneihna te, natna chi tinrêng tidam tûra thuneihna te, leh mitthi hial pawh kaitho tûra thuneihna te chu a dawng tawh tih a lantîr a ni. (Matthaia 9:2-8; Marka 4:37-41; Johana 11:11-44) Pathian thâwk khum Bible hrilh lâwkna chuan, “mi tin te, hnam tin te leh ṭawng tinte zawng zawng chuan [Isua] rawng an bâwl nân” Pathianin a hnênah “rorêlna te, ropuina te, ram te” a pêk thu a sawi lâwk bawk. (Daniela 7:13, 14) Chu sawrkâr chu vân Ram tia koh a ni a; tûnah hian Isua Krista chuan vân aṭangin ro a rêl mêk a ni.
[Phêk 7-naa milemte]
Khawvêl pum puia chanchin ṭha hrilhna