Governing Body Hnên Aṭanga Lehkha Thawn

Chanchin Ṭha Hrilhnaa Kan Rawngbâwlpui Duh Tak:

Pathian dik awmchhun, Jehova rawngbâwlnaa kan thawkho thei chu chanvo ropui a va ni êm! Keini zawng nun chhanhimtu Pathian Lalram din tawh chanchin ṭha hrilh leh zirtîrna kawltu, “Pathian hnathawhpuite” kan ni. (1 Kor. 3:9; Mt. 28:19, 20) He khawvêl pum huap rawngbâwlnaa inrem tak leh inpumkhata kan thawh theih nân, ṭha taka kan inrêlbâwl a ngai a ni.—1 Kor. 14:40.

He lehkhabu hian tûn laia Kristian kohhran hnathawh dân hre tûrin a ṭanpui ang che. Jehova Thuhretu pakhat anga i neih i chanvo leh mawhphurhnate chu a sawiho va. I chanvote ngai hlu a, i mawhphurhna i hlen chuan, ‘rinnaah chuan tihnghehin’ i awm ang.—Tirh. 16:4, 5; Gal. 6:5.

Chuvângin, he lehkhabu hi ngun taka zir chiang tûrin kan fuih a che. A thute i nunpui theih dân tûr zawng rawh. Entîr nân, baptisma chang lo thuchhuahtu thar i nih chuan, Jehova Thuhretu pakhat anga baptisma chang thei tûrin eng rahbi nge i rah ang? Kawng lehlamah chuan, baptisma chang tawh i nih chuan, thlarau lama ṭhang chho va, Jehova rawng i bâwlna zauh tûrin eng nge i tih theih? (1 Tim. 4:15) Engtin nge kohhrana inlungrualna i awmtîr lehzual theih? (2 Kor. 13:11) A chhânna chu he lehkhabuah hian zawng ang che.

Baptisma chang tawh mipa i nih chuan, kohhranho rawngbâwltu ni tûr leh a hnua upa ni tûrin eng nge i tih theih? Pathian inawpna pâwl chhûnga mi a sâng têl an rawn luh zêl avângin, hmahruai tûra tling unaupate mamawhna chu a nasa hle. He lehkhabu hian chutiang thlarau lam thiltumte thleng tûra ‘duhnaa’ thil telte hre tûrin a ṭanpui ang che.—1 Tim. 3:1.

He lehkhabu hian Jehova ruahmanna siama in hmun chan hre tûr leh ngaihlu tûra a ṭanpui nân che u, tih tak zetin kan ṭawngṭai a. In vaiin kan hmangaih lutuk che u a, kan Pa vâna mi, Pathian Jehova biakna aṭanga chatuana hlimna neitute zînga in tel theih nân kan ṭawngṭaisak reng che u.—Sâm 37:10, 11; Is. 65:21-25.