Mi Dangte Chawimawi Rawh

“Inchawimawi tawnna kawngah chuan hmâ hruai u la.”—ROM 12:10, NW.

1, 2. (a) Thuhnuairawlhna lantîr tûrin eng nge kan tih ang? (b) “Chawimawi” tih thu mal hi Bible-in engtin nge a hman ṭhin a, tute’n nge chawimawina lantîr chu harsa ti lo?

KAN thuziak hmasa khân: “In zain . . . thuhnuairawlhnain inthuam rawh u; Pathianin chapote a dodâl a, inngaitlâwmte erawh chu khawngaihna a pe si ṭhîn,” ti-a Pathian Thu-in min zilhna a sawi pawimawh hle a. (1 Petera 5:5) Kan tâna thuhnuairawlh theihna kawng khat chu mi dangte chawimawi hi a ni.

² “Chawimawi” tih thu mal hi Bible-ah chuan zah, ngaisâng, leh mi dangte laka kan lantîr tûr ngaihsakna sawi nâna hman a ni fo va. Mi dangte chu an laka ngilneihna te, an zahawmna ngaihsakna te, an ngaih dân ngaihthlâksakna te, min ngenna inâwm takte tihpuitlinsak tûra inpeih rengna te hmangin kan chawimawi a ni. Mi thuhnuairawlhte chuan hei hi harsa an ti ṭhîn lo. Amaherawhchu, thinlunga chapote chuan chawimawina dik tak lantîr chu harsa an ti ang; fakderna depdê tak hmangin hlâwkna leh duhsakna dawn an tum zâwk ang.

Jehova’n Mihringte a Chawimawi

3, 4. Jehova’n Abrahama chu engtin nge a chawimawi a, engvângin nge?

³ Jehova ngeiin chawimawina lantîrnaah entîr a siam a. Mihring chu zalên taka duhthlan theihna nên a siam a, khâwl mihring (robot) ang lekin a cheibâwl lo. (1 Petera 2:16) Entîr nân, an suahsualna bawlhhlawh tak avânga Sodom chu tihchhiat a nih tûr thu Abrahama a hrilh khân, Abrahama chuan: “Mi felte chu mi sualte zîngah i tiboral ve dâwn em ni? Khawchhûngah chuan mi fel sawmnga tal an awm mahna; a chhûnga mi fel sawmnga awmte avâng chuan khua chu zuah phah lovin i tiboral dâwn em ni?” tiin, a zâwt a. Jehova chuan mi fel 50-te avângin khawpui chu a zuah tûr thu a hrilh a ni. Chutah Abrahama chuan inngaitlâwm takin a ngen chhunzawm zêl a. Mi 45, 40, 30, 20, 10 chauh awm ta se engtin nge ni ang? tiin. Jehova chuan mi fel sâwm chauh pawh hmuh a nih chuan Sadom chu a tihchhiat loh tûr thu Abrahama chu a tiam ta a ni.​—Genesis 18:​20-33.

⁴ Sodom-ah chuan mi fel sâwm êm pawh an awm lo tih Jehova chuan a hre reng a; mahse, ani chuan a thlîr dân ngaihthlâksakin leh zah taka dâwrin Abrahama chu a chawimâwi a ni. Engvângin nge? A chhan chu Abrahama chuan “LALPA chu a ring a; tichuan, ani chuan chu chu a felnaah a ruatsak ta a.” Abrahama chu ‘Pathian ṭhian’ ti-a koh a ni. (Genesis 15:6; Jakoba 2;23) Chu bâkah, Jehova chuan Abrahama’n mi dangte a chawimawi tih a hmu a ni. Ram chungchânga a ran enkawltute leh a tupa Lota ran enkawltute inkâra inhnialna a chhuah khân, Abrahama chuan Lota chu a hmun duh lai thlan hmasaktîrin a chawimawi a. Lota chuan ram duhthusâm ni-a a ngaih chu a thlang a; tin, Abrahama erawh chu hmun dangah a insawn ta a ni.​—Genesis 13:​5-11.

5. Jehova’n Lota chu engtin nge a chawimawi?

⁵ Chutiang bawkin, Jehova chuan mi fel Lota chu a chawimawi a ni. Sodom tihchhiat a nih hmâ-in, Lota chu tlâng ramah tlânbo tûrin a hrilh a. Nimahsela, Lota chuan chutah a kal duh loh thu leh tihchhiat tûr huam chhûnga tel Zoar khawpui kianga tlan a duh thu a hrilh a. Jehova chuan Lota hnênah: “Ngai teh, chu thil kawngah pawh chuan ka zâwm che a ni, khua i sawi chu ka tiboral lo mai ang e,” a ti a. Jehova chuan a thil dîlte tihsakin mi rinawm Lota chu a chawimawi a ni.​—Genesis 19:​15-22; 2 Petera 2:​6-9.

6. Jehova’n Mosia chu engtin nge a chawimawi?

⁶ Jehova chuan Mosia chu A mite saltânna ­aṭanga hruai chhuak tûr leh A mite kaltîr tûra Pharoa be tûrin Aigupta ramah a tir a, Mosia chuan: “Aw LALPA, kei zawng . . . mi ṭawng­hmang thiam ka ni ve ngai lo,” tiin, a chhâng a. Jehova chuan Mosia chu: “I kâ chu keiman ka awmpui zêl ang a, i sawi tûr chu ka hrilh zêl ang che,” tiin, a tiam a. Mahse, Mosia chu a la tîm ta cheu va. Tichuan, Jehova chuan Mosia chu a thla­muan a, a thu sawi chhâwngtu atân a unaupa ­Arona chu kaltîr dân a ruahman ta a ni.​—Exodus 4:​10-16.

7. Jehova’n engvângin nge mi dangte chawimawi a duh?

⁷ Chûng entîrna zawng zawngah chuan, Jehova chuan mi dangte chawimawi a duh a, a bîk takin a rawngbâwltute chawimawi a duhzia a lantîr a ni. An thil dîl te chu atîra Jehova tum dân nên inang lo mah se, Jehova chuan an ngennate chu ngaihtuahin, a thiltumte a kalh loh chhûng chu a phalsak ṭhîn a ni.

Isua’n Mi Dangte a Chawimawi

8. Hmeichhia nasa taka damlo chu Isua’n eng­tin nge a chawimawi?

⁸ Isua chuan mi dangte chawimawinaah Jehova chu a entawn a. Ṭum khat chu, kum 12 chhûng thi pût natna nei nu pakhat chu mipui zîngah a awm a. Ani chu Doctor-te pawhin an tidam thei tawh lo a ni. Mosia Dânah chuan, ani chu dân anga thianghlim lo a ni a, mipui zîngah pawh a awm tûr a ni lo. Isua hnung lamah kalin, a puan a va dek a; tichuan, a dam ta a ni. Isua chuan Dân ang chiah chiah a phût tlat lo va, a thil tih avângin a hau hek lo. A dinhmun hre thiamin: “Ka fanu, i rinna hi i dampui a ni e, thlamuang takin kal la, i natna ata chu lo dam hlen tawh ang che,” ti-a hrilhin, a chawimawi ta zâwk a ni.​—Marka 5:​25-34; Leviticus 15:​25-27.

9. Isua’n Jentail pakhat engtin nge a chawimawi?

⁹ Hun dangah pawh, Kanaan hmeichhe pakhatin Isua hnênah: “Lalpa, Davida Fapa, mi khawngaih rawh; ka fanu ramhuaiin a man tlat a ni,” tiin a hrilh a. Jentailte hnênah ni lovin, Israel hnamte hnêna tirh a nih hre rengin, Isua chuan: “Fate [Israel-te] chhang lâksak a, uite (“uitê te,” NW) [Jentail-te] hnêna paih chu, a mawi lo ve,” a ti a. Chu nu chuan: “Uite pawhin an pu dawhkân ata chhang nawi tla chu an ei ṭhîn alâwm,” tiin, a chhâng a. Tin, Isua’n a hnênah: “Hmeichhia, i rin a nasa êm mai; i duh ang takin i chungah awm rawh se,” a ti a. ­Tichuan, a fanu chu a dam ta a. Isua’n chu Jentile nu chu a rinna avângin a chawimawi a ni. Ui kawlhte hmang lo va “uitê te” tih thu mal a hmanna hian he thil chungchâng hi a tinêmin, a lainatna chu a lantîr a ni.​—Matthaia 15:​21-28.

10. Eng zir tûr thiltithei tak nge Isua’n a zirtîrte a zirtîr a, chu zirtîrna chu engvângin nge a ngaih?

¹⁰ A zirtîrte chuan huamhauhna an la neih cheu avângin Isua chuan a zirtîrte chu thuhnuairawlhna leh mi dangte chawimawi a ṭûlzia a zirtîr chhunzawm zêl a. Ṭum khat chu an inhnial zawhin Isua’n: “Eng thu nge in inhnial le?” tiin, a zâwt a. “Kan zîngah tunge ropui ber ang? tiin an lo inhnial” avângin an ngawi ta reng a. (Marka 9:​33, 34) Isua thih hmâ zân tak ngialah pawh “an zîngah tu ber nge ropui bera a ruat tih thu-ah inhnialna a lo chhuak a.” (Luka 22:24) Chuvângin, kalhlen kût laiin, Isua’n “maihûnah tui a bun a, zirtîrte ke a sil ta a.” Zir tûr ropui tak chu a va ni êm! Isua chu Pathian Fapa, vânlâwt chhûng zawngah Jehova dawttu chiah a ni. Chutichung pawhin, an kete silin, a zirtîrte chu zîr tûr hlu tak a zirtîr a ni. Ani chuan: “In chunga ka tih ang hian nangni pawhin in tih vena tûrin ka tihhmuh che u a ni,” a ti a.​—Johana 13:​5-15.

Paula’n Chawimawina a Lantîr

11, 12. Paula chuan Kristian a nih hnû-in, eng nge a zir a, Philemona nêna an chung thu-ah chu chu engtin nge a hman?

¹¹ Krista zirtu a nih angin, tirhkoh Paula pawhin mi dangte a chawimawi a ni. (1 Korinth 11:1) Ani chuan: “Mihring lakah . . . chawimawina kan zawn an hre ngai hek lo. Nu, nau pawmin ama fate a duat angin in zîngah nunnêm takin kan awm zâwk kha,” a ti a. (1 Thessalonika 2:​6, 7) Nu, nau pawm chuan a fa sên chu a ngaihtuah êm êm ṭhîn a. Paula pawh Kristian a nih hnu chuan, thuhnuairawlhna a zir a, zaidam taka enkawlin a Kristian-puite chu a chawimawi a ni. Chutianga a tihin, zalên taka an duh thlan theihna chu a zah a ni, Rome khuaa tân ina a awm laia thil thlengin a lantîr tâk ang khân.

¹² Sal tlân bo Onesima chuan Paula zirtîrna a ngaithla a. Christian a lo niin, Paula ṭhianah a ṭang a ni. Sal neitu Philemona, Asia Minor-a chêng pawh Kristian a ni bawk. Philemona ­hnêna a lehkha thawnah Paula chuan: “Ka hnênah awmtîr reng ka duh hle a ni,” tiin, atâna One­sima a ṭangkaizia a ziak a. Chutichung chuan: “I khawngaihna chu khawngaih luihtîr ang ni lovin, i thu thu ang a nih theih zâwkna tûrin, i thu lovin engmah tih ka duh lo” ti-a ziakin Onesima chu Philemona hnênah a kîrtîr leh a ni. Paula chuan tirhkoh a nihna chu remchângah a la lo va, Onesima chu Rome-a a hnêna awm tûra dîl lovin Philemona chu a chawimawi zâwk a ni. Chu bâkah, Paula chuan Onesima chu chawimawi tûr leh ‘bâwih aia ṭha unau duh tak anga’ cheibâwl tûrin a fuih a ni.​—Philemona 13-16

Kan Huna Inchawimawina

13. Rom 12:10 hian eng ti tûrin nge min hrilh?

¹³ Pathian thu chuan: “Inchawimawi tawnna kawngah chuan hmâ hruai u la,” tiin, min fuih a. (Rom 12:​10, NW.) He mi awmzia chu mi min chawimawi hmasak kan nghâk tûr a ni lo va, mi dang kan chawimawi hmasa zâwk tûr a ni tihna a ni. “Tupawhin mahni ṭhatna tûr zawng lovin mi dang ṭhatna tûr zawng zâwk rawh se.” (1 Korinth 10:24; 1 Petera 3:​8, 9) Chuvângin, Jehova chhiahhlawhte chuan chhûngkua zînga mite, kohhrana kan Kristian-puite, leh kohhran ­pâwna mite lakah tak ngial pawh chawimawina hun remchâng an zawng a ni.

14. Nupa inkârah engtin nge chawimawina lantîr a nih?

¹⁴ Bible chuan: “Mipa tawh phawt lû chu Krista a ni, hmeichhe lû chu mipa a ni,” a ti a. (1 Korinth 11:3) Jehova chuan, pasal chu Krista’n Kohhran a enkawl anga an nupuite enkawl tûrin a phût a ni. 1 Petera 3:​7-ah chuan pasalin a nupui chu “bêl keh awl zâwk an nih hre thiam” tûrin a kawhhmuh a. Hei hi a nupui rawtnate ngaihsakna leh ngaihthlâk duhna tak tak lantirna hmangin a ti thei a ni. (Genesis 21:12) Ani chuan hlauhawm engmah a awm loh chuan ­(Bible thu bulte a kalh loh chuan) a nupui duh thlante chu a zâwm ang a, ani tân thil tihsakin ngilnei takin a enkawl bawk ang. Chutiang bawkin, “nupui pawhin a pasal hlau thiam rawh se.” (Ephesi 5:33) A pasal thu a ngaithla ṭhîn ang a, ama duhzâwng tihpuitlin a tum reng lo vang. Tin, a pasal chu hmusit lovin, a sawisêl fo lo vang. Eng engemawah thiam zâwkna a neih hun pawhin, a pasal thunun tum lovin, thuhnuairawlhna a lantîr ṭhîn a ni.

15. Tarte chungah eng ngaihsakna nge lantîr a nih a, eng anga an chhân lêt tûr nge ni?

¹⁵ Kristian kohhranah pawh, chawimawi phu ngawih ngawih an awm a, tarte ang chu. “Lûa kêlsam ṭote hmaah chuan i ding zêl ṭhîn tûr a ni a, tar hmêl chu i zah tûr a ni.” (Leviticus 19:32) Hei hi kum tam tak chhûng Jehova rawng rinawm taka lo bâwlte chungchângah a ni bîk a, a chhan chu ‘lu ṭuak chu ropuina lallukhum a ni, felna kawnga hmuh a nihin.’ (Thufingte 16:​31, NW) Enkawltute chuan anmahni aia upa an Kristian-puite chu an phû tâwk ngaihsakna lantîrin entîr an siam tûr a ni. Tin, târte pawhin naupang zâwkte chungah zahna rilru an lantîr a ngai ve a; a bîk takin, berâm enkawlnaa mawhphurhna neite chungah chuan.

16. Engtin nge nu leh pate leh naupangte an inchawimawi tawn ṭheuh?

¹⁶ Naupangte chuan an nu leh pate chu an zah tûr a ni: “Naupangte u, Lalpaah chuan in nu leh in pate thu zâwm rawh u; chu chu thil dik a ni si a. ‘I nu leh i pa chawimawi rawh,’ chu chu thupêk tiam nei hmasa ber a ni. ‘Chutichuan i tân a ṭha ang a, leiah hian i dam rei bawk ang.’” Chutiang bawkin, nu leh pate pawh: ‘an fate tithinur lo tûr leh, Lalpa thununnaah leh zilhnaah chuan enkawl zâwk tûra’ hrilh an nih avângin, an naupangte chu an chawimawi a ni.​—Ephesi 6:​1-4; Exodus 20:12.

17. “A leh hniha chawimawi” tlâkte ni-a chhinchhiahte chu tute nge ni?

¹⁷ Kohhrana rawngbâwl thawk rimte pawh chawimawi tûr an ni bawk: “Kohhran upa rorêl ṭhate chu a leh hniha chawimawi tlâka ngaih ni rawh se, thu hril leh zirtîrnaa thawk rimte chu chawimawi tlâka ngaih lehzual ni rawh se.” (1 Timothea 5:17) Anmahni kan chawimawi theihna kawng khat chu Hebrai 13:​17-a thu ziak: “In hotute thu âwih ula, an thu thuin awm rawh u” tih zawmna hi a ni.

18. Kohhran pâwn lama mite chungah eng nge kan tih ang?

¹⁸ Kohhran pâwna mite chu kan chawimawi a ngai em? Ngai e. Entîr nân: “Mi tin an chunga rorêltute thu thuin awm rawh se,” ti-a zirtîr kan ni. (Rom 13:1) Hêngte hi sawrkâr rorêltute an ni a, Jehova’n a Lalrama a thlâkthleng hmâa thuneihna chelh a phal te an ni. (Daniela 2:24) Chuvângin, ‘mi zawng zawng hnênah pêk tûr apiang kan pe a; leiman pêkna tûra hnênah chuan lei­man kan pe a; chhiah chawina tûra hnênah chuan chhiah kan chawi a; ṭih tûra chu kan ṭih a; pawisak tûra chu kan pawisa a ni.’ (Rom 13:7) “Mi zawng zawng chawimawi” tûr kan ni.​—1 Pe­tera 2:17.

19. Mi dangte chungah engtin nge “thil ṭha” kan tih theih ang a, engtin nge kan chawimawi ang?

¹⁹ Kohhran pâwna mite pawh chawimawi tûr kan ni tih chu a dik rual rualin, Pathian ­thu-in a ngaih pawimawh chu chhinchhiah ang che: “Remchâng hun kan neihzia ang zêlin mi zawng zawng chungah thil ṭha i ti ang u, rinna chhûngte zînga mi chungah i ti deuh ber ang u,” tih chu. (Galatia 6:10) Dik takin, mi dangte chunga “thil ṭha” kan tih theih zînga ṭha ber chu an thlarau lam mamawhte buatsaihsak leh ­phuhrûksak hi a ni. (Matthaia 5:3, NW) Hei hi: “Hnathawktu, thutak thu fel taka hmang chu zak tûr a ni lo angin, Pathian ­ngaiha ṭhaa inentîr tûrin ṭhahnem ngai rawh,” tia tirh­koh ­Paula hriatnawntîrna ngaihvenna hmangin kan ti thei a ni. Hun remchâng zawng zawng thuhrilh nâna thiam taka kan hmana, ‘kan ­rawngbâwlna kan hlen’ hian, mi zawng zawng chungah thil ṭha kan ti mai chauh ni lovin, anmahni kan ­chawimawi bawk a ni.​—2 Timothea 2:15; 4:5.

Jehova Chawimawina

20. Pharaoa leh a sipaite chungah eng nge thleng a, engvâng nge?

²⁰ Jehova chuan a thil siamte a chawimawi a. Chuvângin, amah kan chawimawi lêt ve chu a âwm hle a ni. (Thufingte 3:9; Thu Puan 4:11) Jehova thu pawhin: “Mi chawimawi apiangte chu ka chawimawi ang a, mi hmusit apiangte chu ka ngaihnêp an ni dâwn si a,” tiin, a sawi a ni. (1 Samuela 2:30) Aigupta lal Pharaoa chu Pathian mite chhuahtîr tûra hrilh a nih khân ani chuan: “Tunge maw ni LALPA, a thu ka han zawm . . . tûr chu ni le?” tiin, chapo takin a chhâng a. (Exodus 5:2) Israel mite nuai bo tûra Pharaoa’n a sipaite a tirh khân, Jehova chuan Tuipui Sen chu Israelte tân a ṭhenhransak a. Mahse, Aigupta mite’n an umin, Jehova chuan tui chu a luantîr leh a ni. “Pharaoa tawlailîrte leh a sipaihote chu tuipuiah a paih thla ta a.” (Exodus 14:​26-28, 15:4) Chuvângin, Jehova chawimawi duh lo va chapo taka a hnialna chuan râpthlâk taka thihna a thlen ta a ni.​—Sâm 136:15.

21. Engvângin nge Jehova’n Belshazzara chu a dodâl a, eng nge a rah chhuah?

²¹ Babulon Lal Belshazzara pawhin Jehova a chawimawi duh lo va. Zu ruai a ṭheh lai chuan, Jerusalem biak in ata a lâkchhuah rangkachak leh tangkaraw bungbêl thianghlimte chu zu in nâna hmangin Jehova chu a nuih sawh a. Tin, hetianga a tih lai hian, milem pathiante chu a fak bawk a ni. Nimahsela, Jehova chhiahhlawh Daniela chuan a hnênah: “I rilru i tihniam lo va, vân Lalpa chungah chuan i inchawisâng ta zâwk a,” tiin, a hrilh a. Chu mi zân la la chuan Belshazzara chu tihhlum a ni a, a lalram pawh chhuhsak a ni ta a ni.​—Daniela 5:​22-31.

22. (a) Israel hruaitute leh an mipuite chungah engvângin nge Jehova thinurna a thlen? (b) Jehova duhsakte chu tute nge ni a, eng nge a rah chhuah?

²² C.E. kum zabi pakhatnaah, Lal Heroda chuan mipuite hnêna thu a sawi laiin, mipuite chuan: “Pathian aw a nih hi, mihring aw a ni lo ve,” tiin, an au va. Hlutna nei lo lal chuan a hnial lo va, ropuina chu a duh a ni. Tichuan “Pathian hnênah chawimawina chu a pêk loh avângin Lalpa vântirhkohvin chawplehchilhin a man” a ni. (Tirhkohte 12:​21-23) Heroda chuan Jehova chawimawi lo va, amah a inchawimawi avângin, thah a ni. Chûng hun laia sakhaw hruaitute chuan a Fapa, Isua phiarrûkna hmangin Pathian an chawimawi lo va. Thuneitu ṭhenkhatte chuan Isua’n thutak a zirtîr tih an hre reng a; mahse, “Pathian hnêna ropuina ai chuan mihring ­hnêna ropuina an duh zâwk” avângin an zui lo a ni. (Johana 11:​47-53; 12:​42, 43) Hnam pumpui mai chuan Jehova leh a Aiawha a ruat, Isua chu an chawimawi lo va. Chuvângin, Jehova pawhin a chawimawi chhunzawm ta lo va, anmahni leh an biak in chu tihchhiat tûrin a hlamchhiah ta a ni. Mahsela, amah leh a Fapa chawimawitute chu a humhim tlat a ni.​—Matthaia 23:38; Luka 21:​20-22.

23. Pathian khawvêl thara chêng tûrin eng nge kan tih ang? (Sâm 37:​9-11; Matthaia 5:5)

²³ He kalhmang tâwp hnû-a Pathian khawvêl thara nun chên duh zawng zawngte chuan, Pathian leh a Fapa, Isua Krista chu an chawimawiin, an thu an zâwm ngei tûr a ni. (Johana 5:​22, 23; Philippi 2:​9-11) Tupawh chutiang chawimawina lantîr lote chu “leilung ata tihboral an ni ang.” Kawng lehlamah chuan, Pathian leh Krista chawimawi a, a thu zâwmtu, mi tluangte chu “leilungah hian an chêng ang.”​—Thufingte 2:​21, 22.

Ennawnna

◻ Mi dangte chawimawi tih awmzia hi eng nge ni a, hei hi Jehova’n engtin nge a tih?

◻ Engtin nge Isua leh Puala’n mi dangte an chawimawi?

◻ Kan huna chawimawi phûte chu tute nge ni?

◻ Engvângin nge Jehova leh Isua chu kan chawimawi ang?

[Phêk 17-naa milem]

Jehova’n Abrahama thil ngente ngaihtuahsakna hmangin ani chu a chawimawi

[Phêk 18-naa milem]

Inneihna hlawhtlingah chuan, nupate chu an inchawimawi tawn ṭhîn