I Nun Hian Awmzia A Nei Zâwk Thei Em?

HLUTNA dik tak chu a lan dânah a innghat lo fo va. United State bank lehkha, pawisa anga hman theih hlu ber chu $10,000-a hlu a ni. Mahse, chu mi an chhutna lehkha phêk chuan hlutna rêng a nei lo.

Hlutna nei lo lehkha phêk tê chuan nun awmze nei tak min pe thei dâwn em ni tih i ngaihtuah ngai em? Mi tam tak chuan a pêk theih an ring a ni. Chuvângin, mi maktaduai tam tak chuan an theih ang tâwka tam pawisa hlawh tumin chhun zân zawmin hna an thawk a. A châng chuan an sum ûmna lamah an hrisêlna, an ṭhiante, leh an chhûngte ngei pawh an chân phah hial ṭhîn a ni. Eng nge a ṭangkaina? Pawisa emaw, chu mia kan thil leite emaw chuan lungawina dik leh tluantling min pe thei em?

Thilchîk mite sawi dân chuan, khawvêl sum leh pai lama lungawina kan zawn nasat poh leh kan hlat deuh deuh zâwk a ni an ti a. Chanchinbu mi Alfie Kohn pawhin, “lungawina chu lei mai theih a ni lo . . . an nuna hausakna dah hmasa bertute chuan lungkhamna leh lungngaihna namên lo an tawng ṭhin a, hausa tehna hnuai lamah an khawsa fo ṭhîn,” tiin a sawi a ni.—International Herald Tribune.

Thilchîk mite chuan nun awmze nei chu sum leh pai-ah ni lovin, thil dangah a innghat zâwk a ni tih hre mah se, mi tam tak chuan chu chu an pawm lo. Khawthlang lam rama chêngte chuan sumdâwngtute thil fakmawina thu chu ni khatah 3000 lai an dawn avângin, nun awmze nei hi sum leh pai-ah a innghat a ni tih ngaihdân an nei pawh hi thilmak a ni hran lo. An thil fakmawina rêng rêng, a lian ber aṭanga a tê ber thlengin a tum chu hei hi a ni: ‘He thil hi lei la; tichuan, i hlim sawt ang,’ tih chu.

Hausak tulh tulhna chuan eng rah nge a chhuah? Thlarau lam thil ngaihthahna a hring chhuak fo mai! Newsweek magazine-in a sawi dânin, Germany rama Cologne puithiamhotu chuan, “kan khawtlângah chuan Pathian chuan hmun rêng a chang tawh lo,” tiin, tûn hnai mai khân a puang a ni.

Ei zawnnaah i chakna zawng zawng deuhthaw i lo hmang pawh a ni mai thei. Chuvângin, thil dang atân hun nei lovah i inngai pawh a ni thei bawk. Mahse, i hrisêlna emaw, i kum emawin a tlin chhûng zawnga hna thawh reng mai ni lo, nun awmze nei zâwk a awm ngei ang tih i hriatchhuah châng a awm thei ngei bawk ang.

Thlarau lam thil ngaih pawimawh zâwkna chuan lungawina nasa zâwk a pe thei che em? Engin nge nun awmze nei zâwk pe thei ang che?

(w00 7/15)