Bible—Nun Kaihruaitu Lehkhabu

“PATHIAN Thu hi a nung a, thil a ti thei a, khandaih hriam tawn eng ang ai pawhin a hriam a, . . . thinlunga ngaihtuah leh tumte hi a hre nghâl thei a ni.” (Hebrai 4:​12) Pathian Thu thiltih theihzia chungchânga he hrilhfiahna hian Bible hi lehkhabu ṭha satliah mai a ni lo tih a târ lang chiang hle a ni.

“A thuchah hi nun nâna kan thâwk zêl ang tluk zetin a pawimawh a ni,” tiin sakhaw lam thu ziaktu pakhat chuan tawi kim deuhin a lo ziak a. Tin, “Tûn laia kan mawhmawh leh kan thlâkhlelh êm êm tihdamna chungchâng ngaihtuah chunga Bible i chhiar chuan, a danglamzia i hmu ang,” tiin a sawibelh a ni. Khawnvâr êng tak angin Bible chuan zawhna khirhkhân tam takte leh tûn lai nuna buainate chungchâng min hrilhfiah a ni.​—Sâm 119:105.

Bible-a târ lan finna thute hian kan ngaihtuahna kaihruai tûr te, buaina kan tawhte sukiang tûr te, leh kan nunphung tihmasâwn tûr tea min ṭanpui tûrin thiltihtheihna a nei tak zet a; tin, kan tihdanglam theih loh dinhmunte hmachhawn thei tûrin min thuam bawk a ni. Chûng zawng aia pawimawh chu Biblein Pathian hre tûr leh hmangaih tûra min ṭanpui thei hi a ni.

Thil Tum Min Petu Lehkhabu Chu

Bible ziaktu, Pathian Jehova chuan ‘kan awm dân zawng zawng hi a hre vek’ a. Kan taksa te, rilru te, leh thlarau lam mamawhte chu keimahni aiin a hre chiang zâwk a ni. (Sâm 139:​1-3) Tin, ani chuan mihringte dinhmun hre rengin kan awm dân tûrah ramri fel takin a kham a. (Mika 6:8) Chûng a ramri khamte leh kawhhmuhnate hriatthiam tumna leh chûngte mila nun tum chu a finthlâk a ni. Sâm ziaktu chuan ‘Lalpa dâna lâwmna’ nei mi chu a eng a thâwl e, “a thiltih apiang chu a hmuingil zêl ang,” tiin a ziak a ni. (Sâm 1: 1-3) Chutiang beiseina thu chuan kan chhût chian a phu hle a ni.

School zirtîrtu chawl tawh, Maurice-a chuan Bible-ah hian hmân lai chanchin leh thu leh hla hlu tak tak awmin a ring reng ṭhîn a. Amaherawhchu, Pathian thlarau thianghlima thâwk kum a nihna chu a ringhlel tlat a ni. Mahse, Pathianin mihringte hnêna a Thuziak a pêk chhan hrilhfiahna a ngaihthlâk hnu chuan Bible-a hrilh lâwkna hrang hrangte chu a enfiah ta a. A tlangvâl lai chuan, hmân lai chanchin te, thu leh hla te, science te, leh geography lamte a lo zîr vek tawh a. Chuvângin, Bible dikzia târ langtu entîrna tam takte pawh pawm duh lo khawpin a lo inngai fing lutuk tih a sawi a ni. Ani chuan, “Nawmsakna te, hausakna te, leh hlimna ûmnate chuan min phuar bet tlat a. Vânduaithlâk takin, lehkhabu ziak tawh zawng zawnga ropui ber dikzia leh duhawmzia pawh hre lêm lovin, ka lo ngaihthah reng a ni,” tiin a sawi a ni.

Tûnah chuan Maurice-a chu kum 70 mi a ni a, tirhkoh Thoma hnêna Isua inlârna thu ang deuhvin, lâwm takin heti hian a sawi a ni: “ka kutin ‘a ser ka dek’ ta a, chu chuan Bible chu thutak a ni tih ka lo rinhlelhna zawng zawngte chu a hnâwlbo hlen ta a ni,” tiin. (Johana 20:​24-29) Tirhkoh Paula’n chiang taka a sawi angin, Bible chuan thinlunga ngaihtuahnate a hriain, nun awmze nei tak min pe thei a. Nun kaihruaitu lehkhabu a ni tak zet a ni.

Nun Manganna Ata Dinnghehna

Bible chuan chîn dân ṭha lo chîngte thiltih bânsantîr thei thurâwn a pe bawk a ni. Daniel-a chuan meizial zûk te, insumna tel lo intih hlimna te, zu ngawl a veinate chu a bânsan thei a ni. (Rom 13:13; 2 Korinth 7:1; Galatia 5:​19-​21) A nihna takah chuan, chutiang chin dânte bânsan a, “mihring thara” inthuam tûr chuan tumruhna a ngai a. (Ephesi 4:​22-​24) “Kan famkim loh êm avângin, chu chu fiahna khirh tak a ni,” tiin Daniel-a chuan a sawi a ni. Amaherawhchu, a hlawhtling tho a ni. Tûnah chuan Daniel-a chuan nî tin Pathian Thu a chhiar a, chu chuan Jehova a hnaihtîr reng a ni.

A lo puitlin chhoh zêl chuan Daniel-a chuan chhiar ngai lo mah se, Bible zahna thûk tak a nei reng a​—a chhiar miah lo chung pawhin​—zân tin Pathian hnênah a ṭawngṭai ṭhîn a ni. Mahsela, thil engemaw tlâkchham a la nei​—hlimna tak tak chu. Tichuan, Bible-a Pathian hming a hmuh hmasak ber ṭum chuan thil engkim a inthlâk thleng ta vek a. (Exodus 6:3; Sâm 83:18) Chu mi hnu aṭang chuan a ṭawngṭai apiangin Jehova hming a lam tel ta a, a ṭawngṭaina pawh chu mi tak tak hnêna ngên ang a lo ni ta bawk a ni. Ani chuan, “Jehova chu ka ṭhian bul ber a ni a, tûn thleng pawhin a la ni reng a ni,” tiin a sawi.

Bible a zir hmaa Daniel-a hma lam hun thlîr dân chu a pîk hle a. Ani chuan, “khawvêla thil thleng mêkte hre thiam tûr hian mi thiam nih kher a ngai lo. Chûng khawvêl thil thlengte chuan min tihlau êm êm a; chuvângin, ngaihtuah loh hrâm hrâm ka tum ṭhîn,” tiin a sawi a ni. Tichuan, Pathianin he lei thenfaiah mi zawng zawng tâna dikna a rawn awmtîr dâwn a, chutah chuan a thuawihtute chuan chatuan remna leh hlimna an chên thei a ni tih te a zir ta zêl a. (Sâm 37:​10, 11; Daniela 2:​44; Thu Puan 21:​3, 4) Tûnah chuan beiseina rinawm tak a nei tawh a ni. Chu mi tinnghet thei Bible thununna chuan a nun chu a siam ṭhattîr thei a ni.

Lungngaihnate Hneh Tûra Ṭanpuitu

George-a chu kum ruk mi a nihin a nuin a boralsan a. A tûk zîngah a tho leh thei lo mai ang tih hlau chung chungin lungngai takin zânah a mu ṭhîn a ni. Tichuan, thihna leh thawhlehna chungchâng Isua thusawi: “A hun a thleng dâwn ta, chutih hunah chuan thlâna awm zawng zawngin a aw an hria ang a, an chhuak vek ang,” tih leh, ‘Kei hi thawhlehna leh nunna ka ni; tupawh mi ring chu thi mah sela a nung leh ang,’ tih chuan a rilru a khawih hle a ni. (Johana 5:​28, 29; 11:25) Chûng thute chu a dikin, âwm a ti hliah hliah a, thlamuanthlâk a ti hle a ni. “Chu thutak chuan rilru a hneh mai bâkah, thinlung a khawih tak zet bawk a ni,” tiin George-a chuan a sawi a ni.

Kan sawi hmasak zâwk Daniel-a pawh khân hlauhna a nei tho va. A nuin a enkawl theih loh avângin naupang chawmna in hrang hranga dah kual a ni a. Chuvâng chuan pâwn lam mi nia inngaihna a nei a, chhûngkaw inhmangaih tak leh muanawm tak neih chu a thlahlel thei êm êm a ni. A tâwpah chuan Bible a zirna aṭangin a thil zawn reng chu a hmu chhuak ta a. Tichuan, Daniel-a chu mite hmangaih leh lawm a hlawhna, Jehova Thuhretute Kristian kohhran nên inhmêlhriatin, thlarau lam chhûngkaw zînga mi a lo ni ve ta a ni. Bible chu a taka hman tlâk zâwng leh mi thlamuan thei zâwngin a sâwt a ni.

Jehova chuan kan thil ngaihtuah leh kan duhte a hre vek a ni tih hre reng ang che. Pathian chuan, “thinlung a bûk ṭhîn” a, ‘mi tin an awm dân ang zêlin’ thil a pe a ni.​—Thufingte 21:2; Jeremia 17:10.

Chhûngkaw Nun Chungchânga Thurâwn Ṭangkai Tak

Bible chuan mihring inlaichînna chungchângah thurâwn ṭangkai tak min pe a ni. George-a chuan: “Mize inmil lohnate emaw, inhriatthiam lohnate emaw hi mihring nuna thil hrehawm berte zînga mi a ni,” tiin a sawi a. Chûng chu engtin nge a hmachhawn? “Tuemawin ka chungah rilru dik lo pu nia ka hriat chuan, Matthaia 5:​23, 24-a ‘i unau rem zet la’ tih thurawn hi ka hmang nghâl ṭhîn a. Inrem lohna chungchâng mi ka sawipui theihna chuan rah a chhuah ṭhîn a ni. Bible-in a sawi Pathian thlamuanna chu neiin ka inhre thei a. Chuvângin, Bible thurâwnte chu a ṭangkai a, a hmantlâk tak zet a ni.”​—Philippi 4:​6, 7.

Nupa inkâra inrem lohna a lo awm hunah chuan an pahnihin ‘ngaihthlâk chuh a, thusawi chuh lo va, thin tinela” an awm a pawimawh a ni. (Jakoba 1:​19) Chutiang thurâwn chuan inzawmna a siam ṭha ṭhîn a ni. George-a chuan: “Mahni inhmangaih anga nupui hmangaih tûr tih thurâwn a taka ka hman chiah chuan, a rah chuah chu ka hmu nghâl mai a. A tân pawh min zah a awlsam phah sawt a ni,” tiin a sawi belh bawk. (Ephesi 5:​28-​33) A ni, Bible chuan kan famkim lohnate hriat dân tûr leh chûngte chu hlawhtling taka hmachhawn thei tûrin min zirtîr a ni.

Thurâwn Danglam Ngai Lo

Lal fing Solomona chuan: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che,” tiin a sawi a ni. (Thufingte 3:​5, 6) Chûng thute chu a tlung hle na a, a va ril si êm!

Bible hi thil ṭha ti tûra min chêttîrtu a ni. Pathian hmangaihtute chu Pathian duhzâwng nêna inremin a nuntîr thei a; tin, ‘LALPA dân zawhnaah’ hlimna a hmuhtîr thei bawk a ni. (Sâm 119:1) Eng dinhmunah pawh ding mah ila, kan mamawh kaihhruaina leh thurâwnte chu Bible-ah a awm vek a ni. (Isaia 48:​17, 18) Ni tin chhiar la, i chhiarte chu chhût la, a takin hmang ang che. Chu chuan i rilru a tifîm ang a, thil thianghlim leh ṭha chauh a ngaihtuahtîr ang che. (Philippi 4:​8, 9) Tichuan, nun dân leh nun hlim dân chauh ni lovin, nun Siamtu hmangaih dân pawh i zir bawk dâwn a ni.

Chutianga i chhiar a, i chhût a, a taka i hman chuan Bible chu​—mi maktaduai tam takte tân pawha a lo nih ang chiahin​—i tân lehkhabu ṭha satliah mai a ni lo vang. Chu chuan nun kaihruaitu lehkhabu a nihzia a tichiang ngei ang.

[Phêk 6-naa milem]

Bible chuan mi tichhe thei chîn dân ṭha lote bânsan tûra i tumruhna chu a tinghet thei

[Phêk 7-naa milem]

Bible chuan Pathian hnaih dân a zirtîr che