Thu Puanchhuah Pawimawh Tak
OCTOBER 7, 2000-a Watch Tower Bible and Tract Society of Pennsylvania kum tin inkhâwm khârnaah chuan chairman, John E. Barr-a chuan thu pawimawh tak a puang a. Chu thu puanchhuah chuan chu mi nîa Theodore Jaracz-a leh Daniel Sydlik-a te thusawi chu a nemnghet a ni.—He magazine phêk 19-24 leh 28-32 en rawh.
Thu pawimawh tak chu kawhhmuhin, Unau Barr-a chuan: “‘Bawi rinawm, fing tak’ leh a Governing Body chu legal corporation-hovin an kawltîr aia sâng zâwk leh chungnung zâwk chu kawltîr an ni. Chutiang legal corporation tinte thil tum, an thuthlunga târ lante chuan tiam chin an nei ṭheuh va. Amaherawhchu, kan Hotu, Isua Krista chuan bawi rinawm pâwl chu a ‘neih zawng zawng’ chungah, a nih loh leh he leia Lalram hmakhua zawng zawng chungah thu a neihtîr a ni,” a ti a.—Matthaia 24:45-47.
Pennsylvania corporation chungchâng chu, Unau Barr-a chuan: “He corporation dinna kum 1884 aṭangin, Watch Tower Bible and Tract Society of Pennsylvania chuan kan tûn lai hunah chanvo pawimawh tak a chelh a ni. Mahse, chu chu a ṭûl huna ‘bawi rinawm, fing tak’ hman tûr dân phal pâwl pakhat mai a ni,” tiin a belhchhah bawk.
Unau Sydlik-a leh Jaracz-a te chuan an thusawinaah chuan “bawi rinawm, fing tak” chu Lalpa lei lam thil neih zawng zawng kawltîr ni mah se, chu chuan “berâm dang” zînga hotu nih tlingte chu inawpna lama mawhphurhna chelh an phalna a dang chuang lo tih an hrilhfiah a. (Johana 10:16) Chutiang bawkin, Jehova Thuhretute hman lai dân phal pâwl kaihruaitu zawng zawngte emaw, a ṭhen emaw chu hriak thih Kristiante an ni ngei tûr tia phût luih theihna, Pathian Lehkha Thu ṭanchhan engmah a awm lo bawk a ni.
Unau Barr-a chuan ngaithlatute hnênah tûn hnai mai khân, Jehova Thuhretute Governing Body member-te zînga ṭhenkhat, United States-a “bawi rinawm, fing tak” hman, corporation zawng zawng kaihruaitua ṭang ṭhînte chuan an duhthlannain an hna an ruahsan a. An dinhmun chelh tûrin berâm dang zînga mi rinawm, mawhphur thei unaute thlan a nih thu a hrilh a ni.
He thu tlûkna hi a ṭangkai ngei mai. Chu chuan Governing Body member-te chu thlarau lam chaw buatsaih nân hun tam zâwk a neihtîr a, a nih loh vêk leh, khawvêl puma unaute thlarau lam mamawh ngaihsak nân hun a neihtîr a ni.
Hun khâr nân, chairman chuan phûr taka lo ngaithlatute hnênah: “Dân lam leh inrêlbâwlna lama mawhphurhna chu thiltawn ngah hotute pêk a nih laiin, . . . an zain Governing Body thlarau lam enkawlna hnuaiah rawng an bâwl a ni. . . . Kan zain, a hming ropui tak fak nân leh chawimawi nâna kan thawhhona chungah Jehova malsâwmna kan beisei tak zet a ni,” tih a hrilh a ni. (w01 1/15)