Abrahama Rinna Ang Nei Rawh!

“Rinnaa awmte, chûng ngei chu Abrahama fate an ni.”​—GALATIA 3:7.

1. Kanaan rama fiahna thar kha engtin nge Abrama’n a hmachhawn?

ABRAMA chuan Jehova thupêk a zawm avângin Ur khawpui nuam tak chu a chhuahsan a. A chhuahsan hnua harsatna a tawrhte chu Aigupta rama rinna fiahna a tawn turu tak takte hma hruaitu mai chauh a ni. Bible chuan: “Tin, chu mi ramah chuan ṭâm a lo tla a,” a ti. Chutiang dinhmun chu Abrama tân a ninawm ngawt ang! Mahsela, a chhûngte a châwm theih nân hma a la nghâl vat zâwk a. “Chu mi ramah chuan ṭâm chu a nasat êm avângin Abrama chu Aigupta rama awm rih tûrin a chhuk ta a.” Abrama chhûngkaw hung tak mai chu tuma hriat lova Aigupta rama luh theih a ni si lo. Jehova chuan a thutiam chu hlenin, Abrama chu a humhim ang em le?​—Genesis 12:10; Exodus 16:​2, 3.

2, 3. (a) Engvângin nge Abrama khân a nupui nihna dik tak a thup? (b) An dinhmun hmachhawn dân tûrah Abrama’n engtin nge a nupui a dâwr?

² Genesis 12:​11-13-ah heti hian kan chhiar: “Heti hi a ni a, Aigupta rama an luh dâwn lai chuan a nupui Saraii hnênah chuan, Ngai teh, hmeichhe hmêl ṭha tak i ni tih ka hria: tichuan hetiang hi a ni ang, Aigupta-hovin an hmuh hunah che chuan, ‘Hei hi a nupui a nih hi,’ an ti ang a: tin, kei chu mi that mai ang, nang erawh chu an zuah ang che. I zâra ṭha taka ka awm theih nân leh nangmah avânga ka nun theih nân, ‘A farnu ka ni,’ khawngaih takin ti zêl ang che, a ti a,” tiin. Saraii chu kum 65 aia upa tawh ni mah se, a la hmêl ṭha hle mai a. Chu chuan Abrama nun chu a tiderthâwng ta tlat a ni.a (Genesis 12:​4, 5; 17:17) Tin, chu aia pawimawh zâwk, Jehova thutiam chu dinhmun derthâwngah a awmtîr a ni, Abrama thlahte aṭangin hnam tin an la intithawveng ang tih a lo tiam tawh avângin. (Genesis 12:​2, 3, 7) Abrama chuan fa a la neih si loh avângin, a la dam chu a ṭûl tlat a ni.

³ Abrama chuan a nupui chu a farnu anga sawi tûra an inremna chu hmang tûrin a nupui chu a bia a. Ani chuan pa ber thuneihna nei mah se, chu a thuneihna chu dik lo takin a hmang lo va; a nupui thlâwpna leh ṭanpuina a ngên zâwk a ni. (Genesis 12:​11-13; 20:13) He mi chungchângah hian Abrama chuan lû nihna hman dân chungchângah pasalte tân entawn tûr ṭha tak a siam a; tin, Saraii pawhin intukluh dân lantîrin tûn laia nupuite tân entawn tûr ṭha a siam bawk.​—Ephesi 5:​23-28; Kolossa 4:6.

4. Tûn laia Pathian chhiahhlawh rinawmte hi an unaute nun derthâwnga a awm hunah engtin nge an awm ang?

⁴ Saraii chuan Abrama farnu a ni a ti thei, a chhan chu a farnu tak tak a nih miau bawk si avângin. Pa hmun nu hrang an ni. (Genesis 20:12) Chu mai bâkah, ani chu a hre lo tûrte hnêna thu dik sawi tûrin tihluih a ni bawk lo. (Matthaia 7:6) Tûn laia Pathian chhiahhlawh rinawmte chuan rinawm tûra Bible thupêk hi an zawm a ni. (Hebrai 13:18) Entîr nân, rorêlna ina chhechhamna hnuaiah dâwt an sawi ngai lo. Mahse, tihduhdahna emaw, tualchhûng buainaah emaw, an unaute taksa leh thlarau lam nun hlauhthâwnawma a awm hunah chuan ‘rûl anga fing a, ṭhuro anga pawikhawih lova awm’ tûra Isua fuihna chu an zâwm a ni.​—Matthaia 10:16; Vênnainsâng, (English) November 1, 1996, phêk 18, paragraph 19.

5. Engvângin nge Saraii chuan Abrama ngenna chu zawm a inhuam?

⁵ A nih leh Saraii chuan Abrama ngenna chu engtin nge a chhân let? Tirhkoh Petera chuan Saraii ang hmeichhiate chu “Pathian ringtute” tiin a sawi a ni. Chutiang mi a nih vâng chuan, Saraii chuan an dinhmunin a kaihhnawih thlarau lam thilte chu a hre thiam a ni. Chu mai bâkah, a pasal chu a hmangaihin a zah êm êm bawk. Chuvângin, Saraii chu ‘a pasal thu thua awmin,’ an inneih thu chu a thup ta a ni. (1 Petera 3:5) Chutianga tih chu a tân pawh thil hlauhawm tak a ni a. “Abrama chu Aigupta rama a luh chuan, Aiguptaho chuan hmeichhia chu an hmu a, a hmêl chu ṭha an ti êm êm a. Pharaoa mi liante pawhin an hmu a, Pharaoa inah an hruai lût ta a.”​—Genesis 12:​14, 15.

Jehova Chhanchhuahna

6, 7. Eng dinhmun lungngaihthlâk takah nge Abrama leh Saraii te kha an din a, engtin nge Jehova’n Saraii a chhan chhhuah?

⁶ Chu thil chuan Abrama leh Saraii chu a va timangang dâwn tak êm! Saraii chu mipat hmeichhiatna hmanpui mai tûr a nih hmêl si a. Chu mai bâkah, Saraii chu pasal nei a ni tih hre lovin, Pharaoa chuan Abrama chu thil pêk tam takin a vûr a; tichuan, ‘berâm te, bâwng te, sabengtungpa te, bâwihpa te, bâwihnu te, sabengtungnu te, sanghâwngsei te a neih phah ta” bawk si a.b (Genesis 12:16) Chûng thilpêkte chu Abrama chuan a va ten dâwn tak êm! Thil awm dân chu lungngaihthlâk hle mah se, Jehova chuan Abrama chu a thlahthlam lo.

⁷ “Tin, LALPA chuan Abrama nupui Saraii avângin Pharaoa leh a chhûngte chu sawisakna namênin a sawisa ta lo va.” (Genesis 12:17) Kawng engemaw zâwngin chûng “sawisakna” lo awm chhan chu Pharaoa chuan a hre ta a. “Tichuan Pharaoa chuan Abrama chu a ko va, ‘Ka chunga i thiltih hi eng tizia nge ni le? I nupui a ni tih engati nge mi hrilh loh? ‘Ka farnu a ni,’ engati nge i tih? Chu mi avâng chuan alâwm ka nupuia ka lo neih tâk hial ni: aw le, tûnah en rawh i nupui hi, hruai la, kal daih rawh,” a ti a. Tin, Pharaoa chuan a chungchâng thuah chuan mi hnênah thu a pe a, tichuan amah an han thlah ta a, a nupui nên a neih zawng zawng nên.”​—Genesis 12:​18-20; Sâm 105:​14, 15.

8. Tûn laia Kristiante hnênah eng ang vênhimna nge Jehova’n a tiam?

⁸ Tûn laiah, Jehova chuan thihna te, dân bawhchhiatna te, ṭâmna te, a nih loh leh leilung chhiatna te lak ata chhanhim min tiam lo. Mahse, kan thlarau lam tiderthawng thei thilte laka vênhimna pêk reng erawh min tiam a ni. (Sâm 91:​1-4) A Thu leh “bâwi rinawm, fing tak” kal tlangin a hun takah vaukhânna min pe ṭhîn a ni. (Matthaia 24:45) A nih leh tihduhdahna avânga thihna chungchâng hi eng nge ni ve thung le? Mi mal thih chu a remti pawh a ni thei a; mahse, Pathian chuan a mi zawng zawngte boral chu a remti ngai dâwn lo. (Sâm 116:15) Tin, mi rinawm ṭhenkhat an thi a nih pawhin, an lo tho leh dâwn tih kan ring tlat a ni.​—Johana 5:​28, 29.

Remna Siam Nâna Inthawina

9. Kanaan rama a awm chhûng khân Abrama kha a insawn kual reng a ni tih engin nge tilang?

⁹ Kanaan rama ṭâm tla a zawh hnu chuan, “Abrama chu Aigupta ram aṭang chuan a chhuak a, chhim ramah chuan a chho ta a, a hnênah chuan a nupui te, a neih zawng zawng te, Lota te an chho ve a. Tin, Abrama chu ran te, tangka te, rangkachak tein a hausa êm êm a.” (Genesis 13:​1, 2) Chuvângin, chu mi khuaa chêngte chuan mi chak leh thiltithei tak, lal ropui tak angin an ngai a ni. (Genesis 23:6) Abrama chuan chuta inbenbel a, Kanaan politics-a inhnamhnawih chu a duh miah lo va. “Chhim ram aṭang chuan Bethel thleng zakin a kal zêl a, Bethel leh Ai khaw inkâra atîra a puan in awmnaah khân.” A dân pângngaiin Abrama chuan a kalna apiangah Jehova chibai bûkna chu a dah pawimawh ber a ni.​—Genesis 13:​3, 4.

10. Abrama ran pute leh Lota ran pute inkârah khân eng buaina nge lo chhuak a, engvângin nge chinfel thuai a pawimawh?

¹⁰ “Tin, Lota, Abrama hnêna kal vea pawh khân berâm rual te, bâwng rual te, puan in te a nei ve a. Tin, an awm dunna tûrin ramin a daih ta lo va: an thil neih chu a nasa êm si a, chutichuan an awm dûn thei ta hlawl lo va. Tichuan Abrama ran pute leh Lota ram pute kârah chuan inhnialna a lo chhuak ta a: chu mi lai chuan Kanaan-hote leh Periz-hote chu, chu mi ramah chuan an awm a.” (Genesis 13:​5-7) Chu hmun chuan Abrama ran rual leh Lota ran rualte mamawh khawp tui leh hnim chu a pe thei ta lo va. Chutiang avânga rilru hahna leh inhuatna chu ran pute inkârah chuan a lo awm ta a ni. Chutianga inhnialna chu Pathian dik chibai bûktu nih lohna a ni a. A awm chhunzawm zêl chuan kumkhuaa inhuatna pawh a thleng hial thei a ni. Abrama’n chu dinhmun chu engtin nge a chinfel? Abrama chuan Lota chu a pa thih hnuaa a pawm a ni a, a fa ang hiala a enkawl seilen a nih hmêl a. A upa zâwk a nih avângin, Abrama chu duh thlang thei zâwk a ni dâwn lâwm ni?

11, 12. Abrama khân thil phal takin Lota hnênah eng nge a pêk a, engvângin nge Lota duhthlanna kha a finthlâk loh?

¹¹ Mahse, “Abraman Lota hnênah, ‘Khawngaih takin, nang leh keia kârah, i ran pute leh ka ran pute kârah pawh inhnialna awm suh se; unau kan ni si a, ram chu a pum puiin a awm duai lo vem ni? Khawngaih takin ka hnên ata hi intihrang mai rawh: nang vei lama i kal chuan kei ding lamah ka kal ang a; a nih loh leh, nang ding lam a i kal chuan kei vei lamah ka kal ang e,’ a ti a.” Bethel bulah chuan “Palestina ram thlîr theina hmun ṭha tak” mai a awm a. Chuta ṭang chuan, “Lota chu a dâk a, Zoar khaw lam pan zâwng chuan Jordan Phai zâwl zawng zawng chu LALPA huan ang, Aigupta ram ang khân ram tina tui tam tak awm chukna a ni tih a hria a, LALPAN Sodom leh Gomorra khua a tihchhiat hma kha a ni si a.”​—Genesis 13:​8-10.

¹² Lota chu Bible-in “mi fel” tiin sawi mah se, he mi chungchâng thuah hi chuan engemaw avângin Abrama chu a zah lo va, upate thurâwn pawh a zawng lo a nih hmêl hle. (2 Petera 2:7) “Chutichuan Lota chuan Jordan Phaizâwl zawng zawng chu a thlang ta a; tin, Lota chu chhak lamah chuan a insawn a: tichuan an inṭhen ta a. Abrama chu Kanaan ramah chuan a awm a, Lota chu Phaizâwl khuaahte chuan a awm a, a puan in chu Sodom khaw thlengin a sawn zêl a.” (Genesis 13:​11, 12) Sodom khua chu a hausa a, khawvêl thil lama hlâwkna nasa tak hmuh theihna hmun a ni. (Ezekiela 16:​49, 50) Khawvêl thila thlîr chuan Lota duhthlan chu a finthlâk hle angin a lang nâ a, thlarau lama thlîr erawh chuan a âtthlâk a ni. Engvâng nge? A chhan chu Genesis 13:13 sawi angin, ‘Sodom mite chu LALPA mithmuhin nasa taka suaksual leh mi sual an nih’ vâng a ni. Chu mi hmuna insawn tûra Lota duhthlanna chu a tâwpah chuan an chhûngkuaa lungngaihna nasa tak thlen theitu a ni.

13. Sum leh paia intihbuaina nei Kristiante tân Abrama entîrna chu engtin nge a ṭangkai?

¹³ Abrama chuan a thlahte’n ram pum an la luah ang tih Jehova thutiamah chuan a rinna nei mah se, chu mi ram chhe tê chungchângah chuan buaina a siam lo. Thil phal takin, 1 Korinth 10:​24-a sawi: “Tupawhin mahni ṭhatna tûr zawng lovin mi dang ṭhatna tûr zawng zâwk rawh se,” tih nêna inmilin thil a ti zâwk a ni. Hei hi sum chungchânga mahni rinpuite nêna intihbuaina nei apiangte tân hriattîrna ṭha tak a ni. Ṭhenkhat chuan Matthaia 18:​15-17-a thu râwnte zawm aiin, an unaute chu court-ah an khing ṭhîn. (1 Korinth 6:​1, 7) Jehova hming tih chhiat emaw, Kristian kohhrana remna tihchhiat emaw ai chuan sum leh pai chân pawh chu a ṭha zâwk tih Abrama entîrna hian a târ lang a ni.​—Jakoba 3:18.

14. Abrama chu a thil phalna avângin eng anga mal sâwm tûr nge a nih?

¹⁴ Abrama chu a thilphalna avângin malsâwm tûr a ni a. Pathian chuan heti hian a sawi: “I thlahte chu leia vaivut ang maiin ka la siam ang: chutichuan miin leia vaivut hi an chhiar sên chuan i thlahte pawh chhiar sên an ni bawk ang” tiin. He thu puanchhuah hi fa nei lo Abrama tân chakna a va ni dâwn êm! Chu mi zawhah Pathian chuan: “Tho la, ram hi a dung a vâng fang chhuak rawh; ka pe dâwn che a ni,” a ti leh a. (Genesis 13:​16, 17) Abrama chu khawpui nuam taka a inbenbel chu phal a ni lo. Kanaan-hote laka a inlâkhran a ngai a ni. Chutiang bawkin tûn laia Kristiante pawh khawvêl ata an inlahrang tûr a ni. Mi dangte aia chungnungah an inngai lo va; mahse, Pathian Lehkha Thu nêna inmil lo nungchanga thlêm lût thei mi rêng rêng chu an kawm ṭha duh lo a ni.​—1 Petera 4:​3, 4.

15. (a) Abrama zinna chuan pawimawhna eng nge a neih? (b) Abrama chuan tûn lai Kristian chhûngkuate tân entawn tûr eng nge a siam?

¹⁵ Bible hun lai chuan, miin ram a neih dâwn rêng rêngin, a enfiah hmasa phawt tûr a ni a. A zin rengna chu, chu ram zawng zawng chu a thlahte’n an la nei dâwn tia Abrama hriatnawntîrtu a ni ngei ang. Thuâwih takin, “Abrama chuan a puan in chu a sawn a, Hebrona awm Mamre sasaw kiangahte chuan awm hmun a va khuar a, chutah chuan LALPA tân maichâm a siam a.” (Genesis 13:18) Tûnah pawh hian Abrama chuan Pathian chibai bûkna a dah pawimawh berzia a târ lang leh a ni. Chhûngkuaa zirna te, chhûngkuaa ṭawngṭaina te, leh inkhâwma telte chu in chhûngkuaah dah pawimawh ber a ni em?

Hmêlmate Beihna

16. (a) Engvângin nge Genesis 14:1 hawn nâna hman Hebrai thu mal chu awmze nei tak a nih? (b) Khaw chhak lam lal palite’n an rûn chhan kha eng nge ni?

¹⁶ “Tin, Sinar khaw lal Amraphela te, Ellasar khaw lal Arioka te, Elamc khaw lal Kedorlaomera te, Goiim khaw lal Tidala te dam lai chuan heti hi a ni a, anni chuan . . . an rûn a.” Original Hebrai-ah chuan he mi châng bul inṭannaah hian ṭawngkam awmze nei tak hman a ni a, chu chuan “malsâwmnaa tihtâwp tûr fiahna hun” lo awm tûr a kâwk a ni. (Genesis 14:​1, 2, footnote) Hêng chhak lam lal palite leh an sipaite’n Kanaan chu an rûn a, tichuan fiahna chu a intan a ni. Eng nge an thil tum? Khawpui panga, Sodom te, Gomorra te, Admah te, Zebiim te, leh Bela te helna tihtâwp hi a ni. Chûng ram zawng zawngte chu hnehin, anni chu “Siddim ruamah chuan an ṭang tlâng a (chu mi ruam chu Tuifinriat Al a ni ta).” Lota leh a chhûngte chu chu mi bul maiah chuan an chêng a ni.​—Genesis 14:​3-7.

17. Engvângin nge Lota sala hruai a nih chu Abrama tân a rinna fiahna a nih?

¹⁷ Kanaan lalte chuan huaisen takin anmahni rûntute chu an do va; mahse, an tlâwm ta tho a ni. “Tichuan Sodom leh Gomorra mite sum zawng zawng leh an ei tûr zawng zawng an la a, an haw ta a. Lota, Abrama unaua fapa, Sodom khuaa awm chu, a sumte nên an la bawk a, an kal ta a.” Chûng chanchin râpthlâk takte chu Abrama beng a thleng thuai a: ‘Mi pakhat tlân chhuak chu a lo kal a, Hebrai mi Abrama chu a hrilh a: ani chu Amor mi Mamrea sasaw kiangahte chuan a awm a. Mamrea chu Eskola unau leh Anera unau a ni a; chûng mite chu Abrama te nêna ṭang za an ni a. Tin, Abraman a fa chu salah an hruai tih a hre ta a.’ (Genesis 14:​8-14) Rinna fiahna a va ni tak êm! A vahpain ram ṭha zâwk a thlan avângin Abrama chu a chungah a lungni lo reng em? Chu achhapah, hêng anmahni rûntute hi a pianna khua, Sinar mi an ni lehnghâl a. Anmahni do tûra kal chhuah chu a pianna hmuna kîr leh theih tawh hauh lohna tûr a ni thei bawk a ni. Chu mai bâkah, Kanaan sipai ṭangrualte pawhin an hneh theih loh chu engtin nge a do theih tehrêng ang?

18, 19. (a) Engtin nge Abrama chuan Lota a chhanchhuah theih? (b) He hnehna avânga chawimawina chu tuin nge dawng?

¹⁸ Tûn ṭumah pawh Abrama chuan Jehova chu a rinchhan pumhlûm leh bawk a ni. “A ina piang, ama mi, zir thiam sa tawh, 318 a hruai chhuak a, Dan khaw thlengin a ûm ta a. Tin, zânah chuan anmahni bei tûrin amah leh a bâwihte chu an insem darh a, anniho chu an that a, Hoba khaw thlengin an ûm a, (Hoba chu Damaska khaw hmâr lamah a awm a.) Tin, sum zawng zawng chu a rawn la kîr leh vek a, a fa Lota leh a sumte chu a rawn la leh vek bawk a, hmeichhiate pawh a rawn hruai leh a, mi dang zawng zawngte nên.” (Genesis 14:​14-16) Jehova ring tlat chungin, Abrama chuan sipai tam takte chu a hneh a, Lota leh a chhûngte chu a chhanchhuak a ni. Tûnah Abrama chuan Salem puithiam lal Melkisedeka chu a tâwk ta a. “Salem khaw lal Melkisedeka chuan chhang leh uain a rawn la a: ani chu Pathian Chungnungbera puithiam a ni a. Tin, ani chuan Abrama chu mal a sâwm a, ‘Lei leh vân neitu Pathian Chungnungbera chuan Abrama malsâwm rawh se. I hmêlmate i kuta petu, Pathian Chungnungbera chu fakin awm bawk rawh se,’ a ti a. Tin, Abrama chuan ani chu engkim chu sâwma pakhat a pe a.”​—Genesis 14:​18-20.

¹⁹ Ni e, hnehna chu Jehova ta a ni. Abrama chuan a rinna avângin Jehova chhanchhuahna dang a tawng leh ta. Tûn laia Pathian mite hi indona tak takah an tel lo va; mahse, fiahna leh chona tam tak an tâwk a ni. Thu ziak dawt leh chuan, chûng chona leh fiahna zawng zawngte hlawhtling taka tuar chuak tûra Abrama entîrnain min ṭanpui theih dân min kawhhmuh ang. (w01 8/15)

[Footnote-te]

I Chhinchhiah Em?

• Kanaan rama ṭâm tla kha engtin nge Abrama rinna fiahna a nih?

• Engtin nge Abrama leh Saraiite’n tûn laia nupate tân entawn tûr ṭha an siam?

• Abrama’n a chhiahhlawhte leh Lota chhiahhlawhte inkâra buaina a chinfel dân aṭang hian eng nge kan zir theih?

[Phêk 26-naa milem]

Abrama chuan dikna a neih chu chelek lovin, a ṭhatna tûr aiin Lota ṭhatna tûr a ngaihtuah zâwk