Engtin Nge Krista Remnain Kan Thinlungah Ro A Rêl Theih Ang?
“Krista thlamuanna [remna] chuan in thinlungah ro rêl rawh se, chutiang ni tûrin taksa pumkhata koh in ni rêng asin.”—KOLOSSA 3:15.
1, 2. Eng kawngin nge “Krista remna” chuan Kristiante thinlungah ro a rêl?
ROREL tih thu mal hian intihluihna leh inthununna min ngaihtuahtîr avângin mi tam tak tân chuan ṭawngkam ngeiawm tak a ni. Chuvângin, Paula’n Kolossa khuaa a Kristian puite, “Krista [remna] chuan in thinlungah ro rêl rawh se,” tia a fuihna kha âwm lo va ngai pawh an awm ngei ang. (Kolossa 3:15) Zalên taka duh thlan theihna nei kan ni lo vem ni? Engvângin nge mi tuemaw, a nih loh leh thil engemaw chu kan thinlungah ro kan rêltîr ang?
2 Paula chuan Kolossa mite chu zalên taka duh thlan theihna an neih chu hlân tûrin a hrilh lo. “Rorêl” tia lehlin Grik thu mal hian chutih hun laia infiamnaa telte lâwmman semtu, infiamnaa dân kengkawhtu sawina nên inkungkaihna a nei a. Infiamnaa telte chuan infiamna dân huam chhûngah chuan zalenna chin an nei a; mahse, a tâwpah chuan tunge dân chu zâwm a, chuvângin inelna chu a hneh tih chu dân kengkawhtu chuan a ngaihtuah ṭhîn. Chutiang bawk chuan, kan nunah thu tâwp engpawh siam tûrin zalênna kan nei a; mahse, chutianga kan tih chuan Krista remna chu kan thinlunga “dân kengkawhtu”—a nih loh leh, Edgar J. Goodspeed-a lehlin angin, “min thununtu ber” a ni zêl tûr a ni.
3. “Krista remna” chu eng nge ni?
3 “Krista remna” chu eng nge ni? Krista zirtîr kan lo nih hnu leh Pathian Jehova leh a Fapa hmangaih leh pawm kan lo nih hnua kan neih chhûngril lam thlamuanna chu a ni. Isua’n a zirtîrte a kalsan dâwn khân, hetiang hian an ni chu a hrilh a: “[Remna] ka hnutchhiah a che u; . . . In thinlung mangang suh se, hlauh pawh hlau suh se,” tiin a hrilh a ni. (Johana 14:27) Kum 2,000 dâwn lai chu Krista hriak thihte chuan, chu remna chu an nei a, tûnah erawh an thawhpui, “berâm dang” chuan an ṭâwmpui ve tawh a ni. (Johana 10:16) Chu remna chu kan thinlunga min thununtu ber a ni tûr a ni. Fiahna nasa tak kan tawn lai pawhin, hlau lutuk lo tûrin emaw, mangang buai lutuk lo tûrin emaw min ṭanpui thei a ni. Tûnah chuan rorêl dik lohna kan tawn châng te, lungkhamna kan neih châng te, leh tlâktlai lo nia inhriatna kan neih hunahte min ṭanpui theih dân i lo en ang u.
Rorêl Dik Lohna Kan Tawnin
4. (a) Engtin nge Isua’n rorêl dik lohna a tawrh? (b) Rorêl dik lohna an tawrh chu Kristiante’n engtin nge an chhân lêt?
4 Lal Solomona chuan: “Mi, mi dang chungah pawi khawpin a intilal ṭhîn,” tih a hmu chhuak a. (Thuhriltu 8:9) Isua chuan chûng thu dikzia chu a hria a ni. Vâna a awm laiin, mihringte chu rorêl dik lohnaa an intihhrehawm tawn dân chu a hmu reng a. He leia a awm laiin, ani sualna nei lo chu Pathian sawichhiaa puh leh mi sual ber thih dâna tihhluma a awm khân rorêl dik lohna nasa ber chu a lo tuar a ni. (Matthaia 26:63-66; Marka 15:27) Tûn laiah pawh rorêl dik lohna chu a la hluar reng a, Kristian dikte chuan an tuar nasa bîk a ni: “hnam zawng zawng huat” an ni si a. (Matthaia 24:9) Chu mai a la ni lo, Nazi tihduhdahna leh Soviet Gulag-a tihduhdahnate tuar reng chung leh, pawikhawih mipuite kut te, dâwta sawichhiat te, dâwta hêkna te an tuar chung pawhin Krista remna chuan anmahni a tinghet tlat a ni. Anni chuan: “Mi hauhva a awm laiin a hau ve thung lo va, a tuar laiin a vau lo va; fel taka ngaihtuah ṭhîntua hnênah chuan a inpe zâwk a,” tia a chanchin kan chhiar Isua chu an entawn a ni.—1 Petera 2:23.
5. Kohhrana rorêl dik lohna ni awm tak kan hriat chuan, eng nge kan ngaihtuah hmasak ang?
5 Chutiang pui pui ni lovin, Kristian kohhran chhûnga tuemaw chu dik lo taka cheibâwl niin kan ngai mai thei a. Chutiang a nih chuan: “Mi an tlûkin ka vei lo ngai em ni?” titu Paula rilru ang hi kan pu mai thei a ni. (2 Korinth 11:29) A nih chuan eng nge kan tih tâk ang? ‘Rorêl dik lohna a ni tak zet em?’ tiin kan inzâwt hmasa tûr a ni. Chanchin kim chang chu kan hre lo fo ṭhîn. Thurûk hria anga inchhâl tuemaw thusawi kan ngaihthlâk hnu chuan nasa takin kan chhâng lêt mai thei a ni. Bible chuan chhan ṭha tak neiin, heti hian a sawi a: “Mi mâwl chuan thu tin a ring,” tiin. (Thufingte 14:15) Chuvângin kan fîmkhur a ngai a ni.
6. Kohhran chhûnga rorêl dik lohna tuar nia kan inhriat chuan engtin nge kan chhân lêt theih?
6 A nih leh, keimahni ngei chu rorêl dik lohna tuar anga inngaihna nei ta ila. Krista remna thinlung neitu chuan engtin nge a chhân lêt ang? Kan chunga thil dik lo titu anga kan ngaiha kha biak a ngai tih kan hre thei ang. Chu mi hnu chuan, a ngaithla duh apiangte hnêna sawi ai chuan, rorêl dikna a awm theih nân engah nge Jehova chu rinchhan chunga ṭawngṭaiin thil awm dân kan hriattîr loh vang? (Sâm 9:10; Thufingte 3:5) Chutianga kan tih chuan kan thil chinfelah chuan lungawina kan nei thei ang a, kan “ngawi ṭhiap” thei dâwn a ni. (Sâm 4:4) Hun tam takah chuan Paula fuihna thu: “Tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u,” tih hi hman a ngai fo vang.—Kolossa 3:13.
7. Kan unaute nêna kan indâwrnaah eng nge kan hriat reng tûr?
7 Mahse, a engpawh ti ila thil lo thleng chu kan thunun thei lo nâ a, kan chhân lêt dân chu kan thunun thei tih kan hriat reng a ngai a ni. Rorêl dik lohna nia kan hriat chu inbûk tâwk taka kan chhan lêt loh chuan, chu chuan rorêl dik lohna ai mahin kan remna neih chu a tichhe thei zâwk a ni. (Thufingte 18:14) Kan tlu chhe hial theiin, rorêl dikna a awm hma loh chu kohhran pawh kan kalsan hial thei a. Fakna hla phuahtu chuan Jehova dân hmangaihtute chuan “tlûkna rêng rêng an nei lo,” tiin a ziak a ni. (Sâm 119:165) Thu dik tak sawi chuan, mi tin hian rorêl dik lohna tawrh châng kan nei ṭhîn. Chûng vânduaina i tawnte chu Jehova rawng i bâwlna tihbuaitîr ngai suh ang che. Chutih a hnêkin Krista remna chu i thinlungah ro rêltîr zâwk ang che.
Lungkhamna Kan Tawnin
8. Lungkhamna thlentu thil ṭhenkhatte eng nge ni a, chu lungkhamna chuan eng nge a thlen theih?
8 Lungkhamna hi hêng “ni hnuhnûngahte” hian nuna pêng pakhat ang mai a ni a. (2 Timothea 3:1) Isua pawhin: “‘Engnge ka ei ang aw?’ tiin in nunna thu leh, ‘Engnge ka silhin ka fên ang aw?’ tiin in taksa thu lungkham suh u,” a ti a ni. (Luka 12:22) Amaherawhchu, lungkhamna zawng zawng hi tisa lam ngaihtuahna aṭanga lo awm a ni lo. Lota chu Sodom khawlohna avâng chuan a “lungngai êm êm” a. (2 Petera 2:7) Paula pawh “kohhranho zawng zawng a ngaihtuahna” chuan a tibuai hle bawk. (2 Korinth 11:28) Isua pawh a thih hma zân khân a lungngai êm êm a, “a thlan chu thi far lian tak angin leiah a far” hial a ni. (Luka 22:44) Chuvângin, lungkhamna zawng zawng hi rinna lama chak loh vâng a ni lo tih a chiang a ni. Amaherawhchu, a chhan leh a vâng chu engpawh ni se, lungkhamna chu a nasat lutuk a, a inzawm zêl chuan remna kan neih chu a la bo thei a ni. Lungkhamna chuan mi ṭhenkhatte chu a hneh a, Jehova rawngbâwlnaa an mawhphurhna chelh chhunzawm thei lo hial khawpin a siam a ni. Bible chuan: “Lungkham neih hian mi a tihrehawm a, thu ṭha erawh chuan mi a tilâwm ṭhîn,” a ti. (Thufingte 12:25) Chuti a nih chuan, lungkhamna kan tawrh hunah eng nge kan tih theih?
9. Lungkhamna chhâwk nâna hma lâk theih ṭhenkhatte chu eng nge ni a; mahse, lungkhamna awmtîrtu eng nge a tihbo theih loh?
9 Dinhmun ṭhenkhatah chuan, hma ṭangkai tak a lâk theih ṭhîn. Hrisêl lohna engemaw avânga kan lungngai a nih chuan; mi mal duhthlanna mah ni se, in entîr vat a ṭha.a (Matthaia 9:12) Mawhphurhna neih tam lutuk avânga kan lungkham a nih chuan, chûng zînga ṭhenkhat chu mi dangte hnênah a pêk ṭhen theih ang. (Exodus 18:13-23) A nih leh, nu leh pate anga mawhphurhna rit tak, mi dangte kova nghah theih si loh neite hi engtin nge ni ta ang? Kawppui ring lotu neite pawh hi engtin nge ni ta ang? A nih loh leh chhûngkaw rethei takte emaw, indona hmuna chêngte emaw chu engtin nge ni ang? He khawvêla kan awm chhûng hi chuan lungkhamna zawng zawng chu kan tibo thei lo tih a chiang hle. Amaherawhchu, chutiang dinhmun hnuaiah pawh chuan kan thinlunga Krista remna chu kan humhim thei a ni. Engtin nge kan humhim theih?
10. Kristian tâna lungkhamna chhâwk dân kawng hnihte chu eng nge ni?
10 Pathian Thua thlamuanna zawn chu kawng khat a ni a. Lal Davida chuan heti hian a ziak a: “Ka rilrua ngaihtuah tam tak ka neih lai chuan i thlamuannate chuan ka nunna hi a tihlim ṭhîn,” tiin. (Sâm 94:19) Jehova “thlamuannate” chu Bible-ah hmuh theih a ni a. Chu thâwk khum Lehkhabu pelh hauh lova zir zat zatna chuan Krista remna kan thinlunga nei tlat tûrin min ṭanpui ang. Bible chuan: “I rit phurh chu LALPA chungah nghat la, tichuan anin a tichak ang che; mi fel chu engtikah mah tihnghîn a phal lo vang,” a ti. (Sâm 55:22) Chutiang bawkin, Paula pawhin: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” tiin a ziak bawk a ni. (Philippi 4:6, 7) Bâng lo leh tih tak zeta ṭawngṭaina chuan kan remna chu humhalh tlat tûrin min ṭanpui dâwn a ni.
11. (a) Ṭawngṭai chungchângah Isua chu engtin nge entawn tûr ṭha a nih? (b) Ṭawngṭaina hi engtin nge kan thlîr ang?
11 He mi kawngah hian Isua chu entawn tûr ṭha ber a ni a. A châng chuan, a Pa vâna mi chu dâr kâr rei tak tak a be ṭhîn. (Matthaia 14:23; Luka 6:12) Ṭawngṭaina chuan fiahna nasa ber pawh tuar chhuak tûrin a ṭanpui a ni. A thih hma zân chuan, a lungkhamna chu a nasa zual êm êm a. Engtin nge a tih? “Ṭhahnemngai lehzualin” a ṭawngṭai a ni. (Luka 22:44) Ni e, Pathian Fapa ṭha famkim chu ṭawngṭai mi a ni. Chuti a nih chuan, a hnungzuitu ṭha famkim lote tân phei chuan ṭawngṭai chu chîn ṭhana neih a va ngai lehzual dâwn êm! Isua chuan a zirtîrte chu ‘beidawng lova ṭawngṭai fo tûrin’ a zirtîr a. (Luka 18:1) Ṭawngṭaina hi keimahni kan inhriat aia min hrechiang zâwktu nêna kan inzawmna kawng dik tak leh pawimawh tak a ni. (Sâm 103:14) Kan thinlunga Krista remna humhim tlat tûr chuan, ‘bâng lovin kan ṭawngṭai’ ang.—1 Thessalonika 5:17.
Kan Tlin Lohnate Hnehin
12. Engvângin nge mi ṭhenkhatin an rawngbâwlna chu ṭha tâwk lova an ngaih?
12 Jehova chuan a chhiahhlawh tinte chu thil duhzâwng, thil hlu tak angin a thlîr a. (Hagaia 2:7) Nimahsela, mi tam takte chuan chu chu pawm harsa an ti a ni. Ṭhenkhat chu kum upat avâng te, chhûngkaw mawhphurhna a tam zual avâng te, a nih loh leh hrisêlna tlâk chhiat avâng tein an lunghnual a ni. Mi dangte chu an naupan laia an thiltawn lungchhiat thlâk takte avângin tlâktlai lovah an inngai thei bawk a ni. Tin, mi dang ve leh thung chu hun kal tawha an thil tihsualte chu Jehova’n a ngaihdam theih an rin loh avângin an rilru a hrehawm hle thei bawk a ni. (Sâm 51:3) Chutiang chungchângah chuan eng nge a tih theih?
13. Tling lo nia inhriate tân eng Pathian Lehkha Thu thlamuanna nge awm?
13 Krista remna chuan Jehova hmangaihna min pe ngei ang. Isua’n kan hlutna chu kan thiltih leh mi dangte thiltih khaikhinna aṭangin a chhût lo tih ngaihtuahna aṭangin chu remna chu kan thinlungah kan nei leh thei a ni. (Matthaia 25:14, 15; Marka 12:41-44) A sawi uar ber chu rinawm nghehna a ni. A zirtîrte pawh hetiang hian a hrilh a: “A tâwp thlenga tuar peih apiang chu, chu mi ngei chu chhandamin a awm ang,” tiin. (Matthaia 24:13) Amah Isua ngei chu mite “hmuhsit” a ni a; nimahsela, a Pa chuan a hmangaih a ni tih a ringhlel ngai lo. (Isaia 53:3; Johana 10:17) Tichuan, a zirtîrte pawh hmangaih an ni tih a hrilh bawk a ni. (Johana 14:21) Hmangaih an nihzia sawi uar nân Isua chuan: “Chawngzawng pahnih dâr tangka pakhatah an hralh ṭhîn lo vem ni? nimahsela, an zînga pakhat mah in Pa [hriat] lovin leiah a tla lo vang. In samzaite lam pawh hi chhiar vek a ni asin. Chuvângin hlau suh u; chawngzawng tam tak aiin in hlu zâwk a ni,” tiin a sawi a ni. (Matthaia 10:29-31) Jehova min hmangaihna tichiangtu a va ni êm!
14. Jehova’n kan zain min ngaihlu vek a ni tih nemnghehna eng nge kan neih?
14 Isua pawhin: “Pa mi tîrtuin a hîp loh chuan tumah ka hnênah an lo kal thei lo vang,” a ti a. (Johana 6:44) Jehova chuan Isua hnungzui tûra min hîp avângin, chhandam kan nih chu a duh a ni ngei ang. Isua chuan a zirtîrte chu: “Hêng mi tête zînga pakhat boral pawh hi in Pa vâna mi duhzâwng a ni lo ve,” tiin a hrilh a ni. (Matthaia 18:14) Chuvângin, i thinlung zawng zawnga a rawng i bâwl chuan, i hna thawh ṭhatah chuan i lâwm thei a ni. (Galatia 6:4) Hun kal tawha i thil tihsualte avânga i rilru a hrehawm a nih chuan, Jehova chuan inchhîr tak takte chu “a ngaidam nasa khawp dâwn” tih chu hre reng ang che. (Isaia 43:25; 55:7) Tin, chhan dang avânga i lunghnual a nih chuan, “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn” tih hre reng bawk ang che.—Sâm 34:18.
15. (a) Engtin nge Setana’n kan remna neih chu rûk bo a tum? (b) Jehova lakah eng ang rinna nge kan neih theih?
15 Setana chuan i remna lâk bo chu a châk ngawih ngawih a. Ani chu kan zaa kan chai reng, sualna kan rochun awmtîrtu a ni. (Rom 7:21-24) Ani chuan i ṭhat famkim lohnain i rawngbâwlna chu Pathian pawm tlâk lovah a siam tia ngaih dân neihtîr che a tum tlat a ni. Diabola chuan tilunghnual ngai che suh se! A thil ruahman chu hre tlat la, chu i hriatna chuan chhel takin awmtîr che rawh se. (2 Korinth 2:11; Ephesi 6:11-13) “Pathian chu kan rilru aiin a ropui zâwk a, engkim a hre si,” tih chu hre reng ang che. (1 Johana 3:20) Jehova chuan kan tlin lohnate chauh a hmu lo. Kan rilru sûkthlêk dân leh thil tumte pawh a hmu tlang vek a ni. Chuti chuan, fakna hla phuahtu thusawi: “LALPA chuan a mite a paih thla dâwn si lo va, a rochan chu a kalsan hek lo vang,” tih thu aṭang hian thlamuanna nei ang che.—Sâm 94:14.
Krista Remnaa Inpumkhatin
16. Chhel tûra kan beih ṭâng ṭâng lai hian eng kawngin nge kan mal loh?
16 Paula chuan “taksa pumkhata koh” kan nih avângin, kan thinlung chungah chuan Krista remna chu ro kan rêltîr tûr a ni tih a ziak a. Paula’n lehkha a thawn hriak thih Kristiante chu tûn laia hriak thih la damte ang bawka Krista taksa pêng tia koh an ni a. An ṭhian “berâm dang” nên chuan “vêngtu pakhat” Isua Krista hnuaiah ‘pâwl khat’ angin an inpumkhat a ni. (Johana 10:16) Khawvêl pum puia maktaduai têlte awmna ‘pâwla’ mite chuan an thinlungah Krista remna chu ro an rêltîr a ni. Kan mal lo a ni tih hriatna chuan chhel tûrin min ṭanpui nasa hle a. Paula chuan: “In unau khawvêla awmhote chungah chuan chutiang tuarna chu a thleng ve a ni tih hriain, ring nghet taka awmin amah [Setana] chu do rawh u,” tiin a ziak a ni.—1 Petera 5:9.
17. Kan thinlunga Krista remna ro rêltîr chhan tûr eng nge kan neih?
17 Chuti chuan, Pathian thlarau thianghlim rah pawimawh tak remna hi neih i tum zêl ang u. (Galatia 5:22, 23) Jehova chuan bawlhhlawh kai lo, sawisêl bo, leh remna neite chu a tâwpah chuan lei paradis, a chhûnga felna awmte chu pein mal a sâwm ang. (2 Petera 3:13, 14) Kan thinlunga Krista remna ro rêltîrna tûr chhan tam tak kan nei a ni. (w01 9/1)
[Footnote]
a A châng chuan, lungkhamna chu clinical depression avânga awm emaw, chu mi avânga nasa zual emaw a ni thei.
I Hre Chhuak Em?
• Krista remna chu eng nge ni?
• Rorêl dik lohna kan tawn hunah engtin nge Krista remna chuan kan thinlungah ro a rêl theih?
• Krista remna chuan lungkhamna hmachhawn tûrin engtin nge min ṭanpui?
• Tlâktlai lo nia kan inhriat hunah engtin nge Krista remna chuan min thlamuan?
[Phêk 14-naa milem]
Hmangaihna nei pain duh taka min pawm angin, Jehova thlamuannate chuan kan lungkhamnate a tidam thei
[Phêk 15-naa milem]
Amah sawichhetute hmaah Isua chu Jehova hnênah a inkawltîr
[Phêk 16-naa milem]
Chhelna chu Pathian mithmuhah a hlu tak zet