‘Dawhtheihna Chuan Inthuam Rawh U’
“Lainatna thinlung te . . . dawhtheihna te chuan inthuam rawh u.”—KOLOSSA 3:12.
1. Dawhtheihna chungchânga entawn tûr ṭha tak han sawi teh.
FRANCE chhimthlang lama chêng Régis-a chu kum 1952 khân, baptisma chang Jehova Thuhretu a lo ni a. Kum tam tak chhûng chu a nupui chuan Jehova rawng a bâwl theih loh nân theihtâwp a chhuah a ni. A inkhâwm theih loh nân a motor ke a lo hawlh thêp a; tin, ṭum khat phei chu in tina Bible thuchah a sawi lai chu zui chhuakin, in neitute hnêna Lalram chanchin ṭha a hrilh lai chu a lo nuihsawh hial a ni. Chutiang dodâlna chu tâwk reng mah se, Régis-a chuan dawhtheihna a lantîr zêl a. Jehova chuan amah chibai bûktu zawng zawngte chu mi dangte nêna an indâwrnaah dawhtheihna lantîr tûra a phût avângin, Régis-a chu Kristian zawng zawngte tâna entawn tûr ṭha tak a ni.
2. “Dawhtheihna” tia lehlin Grik thu mal awmzia tak chu eng nge ni a, chu chuan eng nge a kawh?
2 Grik thu mal “dawhtheihna” tia lehlin hi a awmzia tak chu “rilru sei” tihna a ni a. Kan Mizo Bible chuan ‘dawhtheihna’ tiin vawi sâwm pahnih, ‘nghah peihna’ tiin vawi khat, leh ‘chhelna’ tiin vawi khat a letling a ni. He Grik leh Hebrai thu mal “dawhtheihna” tia lehlin hian zâwldawhna, zaidamna, leh thinnelna te a kâwk a ni.
3. Engtin nge Kristiante dawhtheihna thlîr dân chu kum zabi pakhatnaa Grik-ho thlîr dân lakah a danglam?
3 Dawhtheihna hi kum zabi pakhatnaa Grik mite chuan ṭhatna angin an thlîr lo va. A ṭhu mal pawh ni Stoik mi fingte chuan an hmang ngai lo hrim hrim a ni. Bible zir lai William Barclay-a chuan, dawhtheihna chu thil dang tam tak zînga an sawi pawimawh “inchona emaw, intihnatna emaw dawh mai mai lohna Grik-ho ṭhatna nên a inpersan chiah a ni,” a ti. Ani vêk chuan tihian a sawi: “Grik-ho ngaihah chuan phubâ la tûra kawng engkim daptu chu mi ropui tak a ni. Kristiante ngaihah erawh phubâ la thei reng chunga la duh lo hi mi ropui tak a ni thung,” tiin. Grik-ho chuan dawhtheihna chu chak lohna lantîrnaah an ngai a ni thei ang; mahse, hetah pawh hian thil dang ang bawkin, “Pathian âtna chu mihringte aiin a fing zâwk a, Pathian chak lohna pawh chu mihring aiin a chak zâwk,” a ni.—1 Korinth 1:25.
Dawhtheihna Kawnga Krista Entawn Tûr Siam
4, 5. Dawhtheihna chungchânga eng entawn tûr ropui tak nge Isua’n a pêk?
4 Krista Isua chuan dawhtheihna kawngah entawn tûr ṭha tak a siam a, he mi kawngah hian Pathian Jehova dawttu chiah a ni. Isua chuan a lungngaih êm êm lai pawhin, a rilru chu mak tak maiin a thunun thei a ni. A chungchâng chu hetiang hian hrilh lâwk a ni: “Ani chu hnehchhiahin a awm a, nimahsela a inngaitlâwm a, a kâ pawh a âng lo; berâm hmul mêttu hmâa ngawi renga awma ang maiin; a ni, a kâ a âng lo,” tiin.—Isaia 53:7.
5 He leia rawng a bâwl chhûng zawnga Isua lantîr dawhtheihna chu a va chhinchhiah tlâk êm! A hmêlmate zawhna tenawm tak leh amah dotute hmuhsitna zawng zawng chu chhel takin a tuar chhuak a ni. (Matthaia 22:15-46; 1 Petera 2:23) A zirtîrte chu ropui ber inchuha inhnial buai reng ṭhîn ni mah se, an chungah a dawhthei êm êm a ni. (Marka 9:33-37; 10:35-45; Luka 22:24-27) Tin, man a nih dâwn zân khân Petera leh Johana hnênah “mi vênpui rawh u” a ti a; mahse, an lo muthilhsan zêl a. Chu mi zâna Isua lantîr rilru inthununna chu a va ropui tak êm!—Matthaia 26:36-41.
6. Engtin nge Isua dawhtheihna chu Paula’n a hlâwkpui a, eng nge chuta ṭang chuan kan zir theih?
6 A thih a, a thawhleh hnuah pawh Isua chuan dawhtheihna a lantîr chhun zawm zêl a. Tirhkoh Paula chuan tûn hmain Kristiante a lo tihduhdah ṭhin avângin, he mi chungchâng hi a hre chiang bîk a ni. Hetiang hian a ziak: “‘Krista Isua mi sualte chhandam tûrin khawvêlah hian a lo kal,’ tih hi a rinawmin a pawm tlâk êm êm a ni; an zînga mi sual ber ka nih hi. Nimahsela he mi avâng hian a ni, zahngaihna ka hmuh ni, Isua Krista chuan mi sual ber keimahah hian a dawhtheihzia zawng zawng a lantîr theih nân; tûn achina chatuan nunna hmu tûra amah la ring tûrte kawhhmuhna tûrin,” tiin. (1 Timothea 1:15, 16) Kan tûn hma nun chu engpawh ni se, Isuaa rinna kan nghah phawt chuan ani chu kan chungah a dawhthei ang—chutih rual chuan, ‘sim hming pu tlâka thil ti’ tûrin min beisei bawk ang. (Tirhkohte 26:20; Rom 2:4) Asia Minor-a kohhran pasarihte hnêna Isua thuchah chuan dawhtheihna a lantîr rual rualin anni pawh hma sâwn zêl tûrin a beisei tih a târ lang a ni.—Thu Puan, bung 2 leh 3.
Thlarau Rah Chi Khat A Ni
7. Eng nge dawhtheihna leh thlarau thianghlim inlaichînna chu?
7 Galatia mite hnêna a lehkha thawn bung nganaah, Paula chuan tisa hna thawh leh thlarau rah chu a khaikhin a. (Galatia 5:19-23) Dawhtheihna hi Jehova miziate zînga pakhat a nih avângin, dawhtheihna chu a hnên aṭanga lo chhuak, a thlarau rah chi khat a ni. (Exodus 34:6, 7) Ni e, dawhtheihna chu Paula’n thlarau rah a sawite zînga a palina a ni a; chu chu, “hmangaihna te, hlimna te, remna te, . . . ngilneihna te, ṭhatna te, rinawmna te, thuhnuairawlhna te, insûmtheihna te” nên a sawi kawp a ni. (Galatia 5:22, 23) Chuvângin, Pathian chhiahhlawhte’n Pathian zâwl dawhna, a nih loh leh dawhtheihna ang an lantîr hian, thlarau thianghlim thununna hnuaia an tih a ni ṭhîn.
8. Dawhtheihna pawh tiamin, engin nge thlarau rahte nei thei tûrin min ṭanpui ang?
8 Nimahsela, Jehova chuan a thlarauvin mi a thunun lui ṭhîn tihna a ni lo. A thununna hnuaia inhuam taka kan intukluh a ngai a ni. (2 Kor. 3:17; Ephesi 4:30) Kan thiltih engkimah a thlarau rahte rah chhuakin, thlarauvin kan nuna hna a thawh chu kan remti a ni. Paula chuan, tisa hnathawhte leh thlarau rahte a sawi hnu-ah: “Thlarauva nung kan nih chuan thlarauvah vêk i awm leh bawk ang u. Bumin awm suh u; Pathian chu hmuhsit zia a ni lo ve; miin a theh apiang, chu mi vêk chu a seng bawk dâwn si a. Mahni tisa lama thehtu chuan tisaa mi chhiatna a seng ang a; thlarau lama thehtu erawh chuan thlarauva mi chatuan nunna a seng dâwn a ni,” tiin a sawibelh a ni. (Galatia 5:25; 6:7, 8) Dawhtheihna nei thei tûr chuan, thlarau thianghlimin Kristiante a rah chhuahtîr thlarau rah dangte pawh kan neih a ngai a ni.
“Hmangaihnain A Dawhthei”
9. Engvângin nge Paula’n Korinth mite hnênah “hmangaihnain a dawhthei” tih a hrilh?
9 Paula’n: “Hmangaihnain a dawhthei” a tih khân hmangaihna leh dawhtheihna inlaichîn dân a târ lang a ni. (1 Korinth 13:4) Bible scholar pakhat Albert Barnes-a chuan, Paula’n Korinth Kristian kohhrana inhnialna leh buaina awmte rilrua vawng reng chungin hêng thu hi a sawi a ni ang a ti. (1 Korinth 1:11, 12) Heti hian a sawi zawm a: “Heta [dawhtheihna atâna] thu mal hman hi hmanhmawhna te, ṭawngkam leh rilrua thinrimna te, leh ninawmna te nên a inkalh chiah a. Hnuaichhiahna leh tihthinrima a awm laia HUN REI TAK CHHUNG TUAR HRAM HRAM tihna a ni,” tiin. Hmangaihna leh dawhtheihna chuan Kristian kohhrana remna chu nasa takin a belhchhah a ni.
10. (a) Eng kawngin nge hmangaihna chuan dawhthei tûrin min ṭanpui a, he mi chungchângah hian eng fuihna nge tirhkoh Paula’n min pêk? (b) Pathian dawhtheihna leh ngilneihna chungchângah Bible scholar pakhatin eng nge a sawi? (Footnote en rawh.)
10 “Hmangaihnain a dawhthei a, ngil a nei bawk ṭhîn. Hmangaihnain . . . mahni hma a sial lo va, a thinur duh lo va.” Chuvângin, hmangaihna chuan dawhthei tûrin kawng tam takin min ṭanpui a ni.a (1 Korinth 13:4, 5) Hmangaihna chuan mi dangte nêna indawh tawn hrâm hrâm tûrin min ṭanpui a, kan zain ṭha famkim lo kan ni a, dik lohna leh tlin lohna kan nei ṭheuh tih a hre reng a ni. Tin, mi dangte ngaihtuah tûr leh ngaihdam peih thei tûrin min ṭanpui bawk. Tirhkoh Paula chuan “inngaihtlâwmna leh thuhnuairawlhna zawng zawng nei a, hmangaihnaa indawh tawn chunga dawhtheihna neia remna phuarnaah chuan thlarau inpumkhatna chu vawng tûra bei,” tûrin min fuih a ni.—Ephesi 4:1-3.
11. Engvângin nge Kristian awmkhâwmhote inkârah hian dawhtheihna hi a pawimawh bîk êm êm?
11 Kohhranah a ni emaw, Bethel home-ah a ni emaw, missionary home-ah a ni emaw, construction team-ah a ni emaw, a nih loh leh Kristian school-ah a ni emaw dawhtheihna chuan Kristian awmkhâwmhote inkârah remna leh hlimna a siam a ni. Miziaah te, duhzâwngah te, enkawl seilen dânah te, nunphungah te, leh invawnfai dân chungchângah tak ngial pawh kan inan loh ṭheuh avângin, thinurna tûr dinhmun chu a awm zauh zauh ṭhîn a ni. Tin, chhûngkuaah pawh chutiang dinhmun chu a lo thleng thei bawk. Chuvângin, thin nel tak nih chu a pawimawh êm êm a ni. (Thufingte 14:29; 15:18; 19:11) Dawhtheihna—a ṭha zâwka inthlâk danglam beisei avânga zâwldawh taka chhelna—chu kan zavai atân a pawimawh a ni.—Rom 15:1-6.
Dawhtheihna Chuan Chhel Tûrin Min Ṭanpui
12. Dinhmun khirh tak tawn laiin engvângin nge dawhtheihna neih a pawimawh êm êm?
12 Dawhtheihna chuan dinhmun khirh tâwp thei lo anga lang hialte emaw, a tihkian maina tûr engmah awm lo anga langte emaw pawh chhel taka tuar tûrin min ṭanpui a. Chu chu atîra kan sawi tâk Régis-a dinhmun chiah chiah a ni. Kum tam tak chhûng chu a nupui chuan Jehova rawng a bâwl lohna tûrin a dodâl a. Nimahsela, ni khat chu mittui nêna amah rawn panin: “Hei hi thutak a ni tih ka hre ta. Min ṭanpui rawh. Bible ka zir duh tawh,” a rawn ti hlawl mai a ni. A tâwpah chuan Thuhretu niin baptisma a chang ta a. Régis-a chuan: “He thil hian kum tam tak chhûng ka thawhrimna te, ka zâwldawhna te, leh ka chhelnate kha Jehova’n mal a sâwm a ni tih a nemnghet a ni,” a ti. Dawhtheihna lâwmman chu a dawng ta a ni.
13. Engin nge Paula chu chhel tûrin a ṭanpui a, a entawn tûr siam chuan engtin nge min ṭanpui theih?
13 C.E. kum zabi pakhatnaa tirhkoh Paula kha dawhtheihna kawnga entawn tûr ṭha tak a ni a. (2 Korinth 6:3-10; 1 Timothea 1:16) A ṭhian la naupang tak Timothea hnêna a thih dâwn hnaiha fuihna thu a pêknaah Paula chuan Kristian zawng zawngte’n fiahna an tâwk dâwn tih a hrilh a ni. Paula chuan ama entawn tûr siam ngei chu sawi chhuakin, chhelna tûra pawimawh Kristian mize bulte pawh a sawi bawk a ni. Heti hian a ziak: “Nang erawh chuan ka zirtîrna te, ka awm dân te, ka thil tum te, ka rinna te, ka dawhtheihna te, ka hmangaihna te, ka chhelna te, mi mi tihduhdahna te, ka tuarna te i hre hle mai; Antiokei khuaah te, Ikonion khuaah te, Lustra khuaah te ka chunga thil thleng leh tihduhdah ka tuarnate kha; chûng zawng zawngah chuan Lalpa chuan mi chhandam ta si a. A ni, tupawh Krista Isuaa Pathian ngaihsaka awm tum apiang chuan tihduhdahnate an tuar bawk ang,” tiin. (2 Timothea 3:10-12; Tirhkohte 13:49-51; 14:19-22) Chhel tûr chuan kan za hian rinna, hmangaihna, leh dawhtheihna kan mamawh a ni.
Dawhtheihnain Inthuam Rawh
14. Paula’n Pathian ngaihsakna mizia dawhtheihna ang chite chu eng nên nge a tehkhin a, eng fuihna thu nge Kolossa Kristiante hnênah a pêk?
14 Tirhkoh Paula chuan dawhtheihna leh Pathian ngaihsakna miziate chu “mihring hlui” mizia hlîp thlâk hnua Kristian te inbel tûr thuamhnaw nên a tehkhin a ni. (Kolossa 3:5-10) Hetiang hian a ziak: “Pathian mi thlan, mi thianghlim leh duh takte angin lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u, tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u. Tin, chûng zawng zawng chungah chuan hmangaihna inbel rawh u, chu chu phuar famkimna a ni,” tiin.—Kolossa 3:12-14.
15. Kristiante’n ‘dawhtheihna leh Pathian ngaihsakna mizia an inbel’ chuan eng rah nge a chhuah?
15 Kohhrana mi tinte chu lainatna te, ngilneihna te, inngaihtlâwmna te, thuhnuairawlhna te, dawhtheihna te, hmangaihna tea ‘an inbel’ chuan buainate an sukiang theiin, Jehova rawngbâwlnaah lungrual takin hma lam an pan thei a. A bîk takin Kristian hotute chuan dawhtheihna an mamawh bîk êm êm a ni. Kristian dangte an zilh a ṭûl châng pawh a awm thei a; mahse, zilh dân kawng tam tak a awm a ni. Paula chuan Timothea hnêna lehkha a thawn khân mi dang zilh dân ṭha ber a hrilh a ni: “Dawhthei taka zirtîr chungin an thiam loh hriattîr la, zilh la, fuih rawh,” tiin. (2 Timothea 4:2) Ni e, Jehova berâmte chu dawhtheihna te, zahna te, leh dimdawinate nên enkawl reng tûr an ni.—Matthaia 7:12; 11:28; Tirhkohte 20:28, 29; Rom 12:10.
“Mi Zawng Zawng Lakah Dawhthei Takin Awm Rawh U”
16. “Mi zawng zawng lakah dawhthei” taka kan awmna chuan eng nge a rah chhuah theih?
16 Mihringte chunga Jehova dawhtheihna chuan “mi zawng zawng laka dawhthei taka awm” tûrin min nawr lui a ni. (1 Thessalonika 5:14) Chu mi awmzia chu Thuhretu ni lo chhûngkaw zînga mite, ṭhenawmte, leh kan hna thawhpuite, leh school kalpuite laka dawhthei tihna a ni. An hna thawhpui emaw, an school kalpui emawte dodâlna leh ṭawngelna dawh hrâm hrâm Thuhretute chuan inhuatna tam tak chu an hneh a ni. (Kolossa 4:5, 6) Tirhkoh Petera chuan: “Jentailte zînga in chêtzia chu mawi tak ni rawh se, chutichuan thil tisualtute anga an sawichhiat che u kawngah chuan in thil tihṭhat an hmuhte avângin fanin an awm hunah chuan Pathian an chawimawi thei ang,” tiin a ziak a ni.—1 Petera 2:12.
17. Engtin nge Jehova hmangaihna leh dawhtheihna kan entawn theih a, engvângin nge kan entawn ang?
17 Jehova dawhtheihna chu mi maktaduai tam tak tân chhandamna a ni a. (2 Petera 3:9, 15) Jehova hmangaihna leh dawhtheihna kan entawn chuan, dawhthei takin Pathian Lalram chanchin ṭha kan hrilh chhunzawmin, Krista Lalram inawpna hnuaia intulût tûrin mi dangte kan zirtîr chhunzawm zêl ang. (Matthaia 28:18-20; Marka 13:10) Thuhrilhna kan chawlhsan a nih chuan, Jehova dawhtheihna tihtâwp kan duh tihna a ni dâwn a, a dawhtheihnain a tum mite inlamlêttîr chu kan hmaih dâwn a ni.—Rom 2:4.
18. Eng nge Kolossa mite tâna Paula ṭawngṭaina chu?
18 Asia Minor-a Kolossa Kristiante hnêna a lehkha thawnnaah, Paula chuan tihian a ziak a: “Chu mi avâng chuan thlarau lam finna leh hriat theihna zawng zawng kawngah ama duhzâwng hriat famkimnaah chuan in lo khah theih nân, kan hriat nî achin chu keini pawhin ṭawngṭai leh dîlsak che u kan bâng lo; chutichuan hnathawh tinrênga lo rahin, Pathian hriat famkimna kawnga lo sâwt deuh deuhvin, hlim taka chhelna leh dawhtheihna tinrêng nei tûra a ropuina chakzia ang zêla chakna tinrênga lo chakin, . . . kawng tinrênga amah tilungawi tûrin Lalpa zui tlâkin in awm thei ang,” tiin.—Kolossa 1:9-12.
19, 20. (a) Engtin nge Jehova dawhtheihna la kal zêl chu fiahna anga thlîrna kan pumpelh theih ang? (b) Kan dawhtheihna chuan eng hlâwkna nge min pêk dâwn?
19 ‘Ama duhzâwng hriat famkimnaa kan khah’ tlat chuan Jehova dawhtheihna la kal zêl chu kan tân fiahna a ni lo vang, chu a duhzâwng chu ‘mi zawng zawng chhandama an awm leh thutak an hriat’ hi a ni. (1 Timothea 2:4) Tichuan, ‘hnathawh ṭha tinrêngin kan lo rah’ ang a, a bîk takin, “he ram chanchin ṭha” hrilhnaah hian rah kan chhuah dâwn a ni. (Matthaia 24:14) Chu chu rinawm taka kan chhunzawm zêl chuan, Jehova chuan “hlim taka chhelna leh dawhtheihna tinrêng” nei thei tûrin ‘chakna tinrêngin min tichak’ ang. Chutianga kan tih chuan, “Lalpa zui tlâkin” kan awm ang a; tin, ‘kawng tinrêngah amah kan tilungawi’ tih kan hriat avângin thlamuanna kan lo nei bawk ang.
20 Chuvângin, Jehova dawhtheihna finzia chu i ring tlat ang u. Chu chu kan tân leh kan thuhril leh zirtîrna ngaithlatute tâna chhandamna thlentu a ni. (1 Timothea 4:16) Thlarau rah—hmangaihna te, ngilneihna te, ṭhatna te, thuhnuairawlhna te, leh insumtheihna—neihna chuan hlim taka dawhthei tûrin min ṭanpui dâwn a ni. Kan chhûngkaw zînga mite leh kohhrana unaute nên kan inrem thei bawk ang. Tin, dawhtheihna chuan kan hnathawhpuite leh school kalpuite laka zâwldawh tûrin min ṭanpui bawk ang. Chu bâkah, kan dawhtheihna chuan tum a nei ang, chu a tum chu thil tisualtute chhandam leh dawhtheihna Pathian, Jehova chawimawi hi a ni. (w01 11/01)
[Footnote]
a Paula thusawi “hmangaihnain a dawhthei a, ngil a nei bawk ṭhîn” tih chungchâng chu Bible scholar pakhat Gordon D. Fee chuan heti hian a ziak a: “Pauline theology-ah chuan hêng thil pahnihte [dawhtheihna leh ngilneihna] hian mihringte laka Pathian rilru put hmang chi hnih ai a awh a ni (cf. Rom 2:4). Kawng khatah chuan hmangaih taka Pathian zâwldawhna chu mihringte helna chunga a thinurna a thunun hrâm hrâmna hmanga târ lan a ni a; kawng leh lamah chuan, a ngilneihna chu a zahngaihna vawi tam tak a lantîrnaah hmuh a ni thung a ni. Chuvângin, hmangaihna chungchâng Paula sawi pawh hi, Krista kal tlanga zâwldawhna lantîrtu leh Pathian rorêlna phu ngawih ngawihte chunga ngilneihna lantîrtu Pathian chanchin sawifiahna thuah hnihin a ṭan a ni,” tiin.
I Hrilh Fiah Thei Em?
• Eng kawngin nge Krista chu dawhtheihna kawnga entawn tûr ropui tak a nih?
• Engin nge dawhthei tûrin min ṭanpui ang?
• Engtin nge dawhtheihna chuan chhûngkua te, Kristian awmkhâwmho te, leh upate a ṭanpui?
• Engtin nge kan dawhtheihna chuan keimahni leh mi dangte tân hlâwkna a thlen dâwn?
[Phêk 15-naa milem]
A lungngaih êm êm lai pawhin Isua chu a zirtîrte chungah a dawhthei
[Phêk 16-naa milem]
Kristian hotute chu an unaute an dâwrnaah dawhtheihna chungchânga entawn tûr ṭha siam tûra fuih an ni
[Phêk 17-naa milem]
Jehova hmangaihna leh dawhtheihna kan entawn chuan, chanchin ṭha kan hril zêl ang
[Phêk 18-naa milem]
Paula chu Kristiante’n ‘hlim taka an dawhtheih’ nân a ṭawngṭai