‘I Engah Chuan Eng Kan Hmu Thei’

KAWLPHETHA a tâwp a, kan vêng chhûng a thim thut hma loh zawng êng hlutzia chu kan lo ngaihtuah ngai mang lo va. Mahse, lâwmawm takin kan vân lam “kâwlphetha hmunpui”​—nî​—chu a rintlâk êm êm a ni. Nî aṭanga êng lo chhuak avângin, thil kan hmu thei a, kan ei thei a, kan thaw thei a, kan nung thei a ni.

Eng chu nun atân a pawimawh êm avângin, thil siam ni hmasa bera êng a lo lan thu Genesis-a kan hmu pawh hi mak kan ti tûr a ni lo. “Tin, Pathianin, ‘Eng lo awm rawh se,’ a ti a: tichuan êng a lo awm ta mai a.” (Genesis 1:3) Lal Davida ang mi zahkai takte chuan Jehova chu nunna leh êng lo chhuahna a ni tih an pawm a. Davida chuan: ‘Nunna tuikhur chu i hnênah a awm si a: i êngah chuan êng kan hmu thei,’ tiin a ziak a ni.​—Sâm 36:9.

Davida thusawi hi a ngial a ngana sawina leh tehkhin neia sawina a ni thei ve ve a. Encyclopædia Britannica chuan: “Hmuh theihna awmtîrtu chu êng a ni tak zet a,” a ti a. Tin, heti hian a sawi zawm a ni: “Hriat theihna taksa pêng dang zawng aiin, mit chuan mihring thluak atân chanchin a la lût hnem ber a ni,” tiin. Kan thil zir tam tak hi, hna ṭha taka a thawh theih nâna êng mamawh hmuh theihna thilpêka a innghah avângin, Pathian Lehkha Thu chuan êng chu tehkhin neiin a hmang bawk a ni.

Chuvângin, Isua’n a zirtîrte hnênah: “Kei khawvêl êntu ka ni; tupawh mi zui chu thimah a lêng tawp lovang a, nunna êng a nei zâwk ang,” tih a hrilh. (Johana 8:12) Heta Isua sawi tehkhin nei êng hi a thu ngaithlatute rilru leh thinlung tiêng thei, a thu hril thutak thu chu a ni. Kum tam tak chhûng thlarau lam thima an awm hnu chuan, Isua zirtîrte chuan mihringte tâna Pathian thil tum leh Lalram beiseina chu an lo hre thiam ta a. Chu mi chanchin hriatna chuan chatuan nunnaah a hruai theih avângin, chu chu “nunna êng” a ni tak zet a ni. Isua chuan a Pa, vâna mi hnêna a ṭawngṭainaah: “Hei hi chatuana nunna a ni, nang Pathian tak chauh leh i tirh Isua Krista hriat hi,” tih a sawi a ni. (Johana 17:3) He thlarau lam êng hi i ngainêp ngai suh ang u! (w01 12/01)