Nu Leh Pate U—In Fate Mamawh Phuhrûksak Rawh U!

NAUPANGTE hian kaihhruaina leh hmangaih taka zilhhauna an mamawh a, a bîk takin an nu leh pate hnêna mi an mamawh a ni. He mi chungchângah hian, Brazil mi, mi thiam Tania Zagury-i chuan tihian a sawi: “Naupang rêng rêng chuan nawm chen an duh ṭheuh va. Chuvângin, chintâwk siamsak an ngai a ni. Chu chu nu leh pate siam tûr a ni a. An siamsak loh chuan, an fate chu thunun theih loh an lo ni mai ang,” tiin.

Nimahsela, ram tam takah chuan mi mal zalenna sawimawi a nih avângin, kan sawi tâk thurâwn hi zawm a har a ni. Chuti a nih chuan, nu leh pate chuan tu hnênah nge ṭanpuina an zawn tâk ang? Pathian ṭih nu leh pate chuan fate chu ‘LALPA laka an rochan an ni’ tih an hria a. (Sâm 127:3) Chuvângin, anmahni an enkawlnaah Pathian Thu, Bible kaihhruaina an zawng a ni. Entîr nân, Thufingte 13:24 chuan: “Tiang hmang duh lo chuan a fa a hua a ni, a hmangaihtu erawh chuan a thunun chawt ṭhîn,” tiin a sawi a ni.

Bible-in “tiang” tih thu mal a hman chu anmahni hremna chauh a kâwk anga hriatthiam tûr a ni lo; kawng engkima zilhhauhna hrim hrim a entîr zâwk a ni. Naupang luhlul siam ṭhat nân, ṭawngkama zilh nawn fo hi a tâwk mai thei a. Thufingte 29:17 chuan: “I fapa chu thunun fel la, chawlhna a pe ang chia, a ni, i rilru lâwmna a thlensak ang che,” a ti.

Naupangte’n an mize ṭha lote an kalsan nân chuan hmangaih taka zilhhauhna an mamawh a. Chutianga ngilnei tak, khauh tak bawk sia zilhna chuan nu leh pate’n an fate an ngaihsak tak zetzia a târ lang a ni. (Thufingte 22:6) Chuvângin nu leh pate u, beidawng suh u! Bible fuihna ṭha leh rin tlâk tak in zawm chuan, Pathian Jehova in tilâwm ang a, in fate zah in kai bawk ang. (w01 12/15)