Thil Thleng Tawh Zawng Zawnga Pawimawh Ber

CHU CHU Isua Krista thih hi a ni. Engvângin nge thilthleng pawimawh ber a nih? Chhan tam tak a nei.

Thih thlenga Isua rinawmna chuan mihringte’n Pathian lakah rinawmna an vawng thei tih a finfiah.

Krista thihna chuan mi ṭhenkhatte tân vâna Krista rorêlpuitu nih theihna chanvo hlu a pe. Mi tam takte tâna lei paradis-a chatuana nun chen theihna kawng a hawng bawk.

A thih hma zân khân, Isua chuan chhang dawidim telh loh leh uain sen chu a inthawina entîr nân a hmang a. Tin, a zirtîrte hnênah: “Mi hriat reng nân hei hi ti ṭhîn rawh u,” tih a hrilh a ni. (Luka 22:19) He thilthleng pawimawh tak hi i hre reng ang em?

Jehova Thuhretute chuan Isua thih Hriatrengna hun an hmannaah lo tel ve tûrin duhsak takin an sâwm che a ni. Kuminah hian Ningani, March 28, 2002, ni tlâk hnuah hman a ni dâwn a. I hnaih ber Kingdom Hall-ah i tel thei ang. A hmun leh a hun tûr chu tualchhûng Jehova Thuhretute i zâwt chiang dâwn nia. (w02 3/15)