Hmangaihna A Pawimawh Hle
KUM upat zâwng te, hnam dân te, ṭawng te, a nih loh leh chi te chu eng pawh ni se, mihring zawng zawng hian hmangaihna an mamawh êm êm ṭheuh va. Chu mamawh chu phuhrûk a nih loh chuan, an hlim lo a ni. Damdawi lam zawng chhuaktu mi thiam pakhat chuan: “Hmangaihna leh inṭhianna chu min tinatu leh min tidamtu, lungngaihna leh hlimna thlentu, hrehawm min tawrhtîrtu leh min tizângkhaitu bulpui ber a ni. Chutianga nghawng nei damdawi chhuak thar se chuan, kan ram chhûnga doctor zawng zawng deuh thawin an dam lote chu an chawh ngei ang. Chu mi damdawi chawh loh chu thuneihna dik lo taka hmanna a ni ngei ang,” tiin ziak a ni.
Nimahsela, tûn lai khawvêlah chuan, a bîk takin chanchin thehdarhna leh mite entawn hlawh mi lârte chuan, mihringte mamawh hawihhâwmna leh inlaichînna ṭha aiin hauhsakna te, thiltitheihna te, hmingthanna te, leh mipat hmeichhiatna te chu an dah pawimawh zâwk ṭhîn a. Zirtîrtu tam tak chuan khawvêl lam thiltum leh hnathawhte chu an dah pawimawh a, hlawhtlinna chu chutiang thilte hmangin an teh ṭhîn. Lehkha zir leh mahni chem kalzâwng ûm chu a pawimawh ngei mai; mahse, chhûngte leh ṭhiante tâna hun nei lo khawpa ûm tûr a ni em? Hmân lai mi lehkha thiam leh ziaktu, mihring awm dân thlirtu mi fing pakhat chuan, mi talent dawng ṭha tak; mahse, hmangaihna nei si lo chu “dâr, ri mai mai emaw, dâr benthek, ri mai mai emaw,” nên a tehkhin a ni. (1 Korinth 13:1) Chûng mite chu an lo hausa emaw, an hmingthang emaw mai thei; mahse, an hlim tak tak ngai lo a ni.
Mihringte hriatthiamna thûk tak leh lainatna nasa tak nei, Isua Krista chuan a zirtîrnaah Pathian leh ṭhenawmte hmangaihna chu a dah pawimawh ber a ni. Ani chuan: “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin i hmangaih tûr a ni. . . . Nangmah i inhmangaih angin i vêngte pawh i hmangaih tûr a ni,” a ti. (Matthaia 22:37-39) He thu zâwmtute chauh chu Isua zuitu tak tak an ni ang. Chuvâng chuan: “In inhmangaih chuan mi zawng zawngin ka zirtîrte in ni tih chu miah chuan an hria ang,” a ti a ni.—Johana 13:35.
Mahse, tûn lai khawvêlah hian engtin nge miin hmangaihna a neih theih ang? Engtin nge nu leh pate’n an fate chu hmangaihna an zirtîr theih ang? Hêng zawhnate hi thuziak dawtlehah sawiho a ni ang. (w03 7/1)
[Phêk 3-naa milemte]
Duhâmna khawvêla hmangaihna neih chu a harsa