“Ka Thinlunga Hmunruak A Hnawhkhat”
“THILPEK ṭha tak, Draw Close to Jehovah tih lehkhabu avângin ka thinlung chhûngril aṭangin ka lâwm tak zet a. Ka thinlunga hmunruak a hnawhkhat a ni—Jehova hmangaih nih leh duh tak nih ka duhna chu. Jehova leh a Fapa duh tak nên kan inpawh lehzual niin ka inhria. He lehkhabu chungchâng chu ka hmangaihte hrilhhriat leh bu khat ṭheuhva pêk chu ka duh a ni.” Hei hi, kum 2002/03 chhûnga neih “Ṭhahnemngai Taka Lalram Chanchin Puangtute” Distirct Inkhâwmpuia tlângzarh, phêk 320 nei lehkhabu thar chungchânga Jehova Thuhretute zînga pakhat rilru puak chhuak thu a ni. He lehkhabu hmêlhmang ṭhenkhat leh buatsaih a nih chhan i lo en ang u.
Lehkhabu Thar Hmêlhmang Ṭhenkhat
Lehkhabu tharah hian eng thu nge chuang? Tûn ṭum chhuaka zir tûr thuziak pahniha thute bâkah a dang tam tak a tel a ni! Lehkhabuah chuan bung 31 thleng a awm a, bung tinte chu Vênnainsâng-a zir tûr thuziak pakhat seizâwng vêl a ni tlângpui. Thuhmahruai leh a hmasa bung thum zawhah, lehkhabu chu hmunpui palia ṭhen a ni a, ṭhen khat zêl chu Jehova mize pawimawh berte zînga pakhat tân zêl a ni. Ṭhen tinte chu a mize tlângpui sawinain a inṭan a. Chu mi hnua bungahte chuan Jehova’n chu a mizia a tihlan dân sawi a ni ṭhîn. Ṭhen tinah chuan Isua chungchâng bung pakhat zêl a tel bawk. Engvâng nge? Isua’n: “Tupawh mi hmu chu Pa hmu a ni,” a tih vâng a ni. (Johana 14:9) Jehova nihna chiah chiah târ langtu a nih avângin, Isua chuan Pathian miziate chu thiltihin entîrna chiang tak min pe a. A ṭhen tinte chu sawiho lai Jehova mizia kan entawn theih dân min zirtîrtu bung pakhat zêla tihtâwp a ni bawk. Jehova miziate sawihonaah chuan, he lehkhabu thar chuan Bible chhûnga lehkhabu engpawh a râwn kim vek a ni.
Draw Close to Jehovah tih lehkhabu chuan hmêlhmang danglam bîk ṭhenkhat a nei a. Bung 2-na aṭangin, bung tinah chuan “Rilrua Chhûtngun Tûr Zawhnate” tih bâwm a awm ṭheuh va. Bible châng leh zawhna pêk chhuahte chu zirna ennawn nâna pêk a ni lo. Bible hmanga sawiho lai thu ngun taka chhût tûra ṭanpuitu atâna siam a ni zâwk. Bible châng târ lan tinte chu ngun takin chhiar rawh. Tichuan, a zawhna chu ngaihtuahin, mi mala nunpui dân tûr ngaihtuah chhuah tum rawh. Chutianga rilrua chhûtngunna chuan i thinlung a chawk tho vang a, Jehova hnaih lehzual tûrin a ṭanpui ang che.—Sâm 19:14.
Draw Close to Jehovah lehkhabua milem chuangte chu, mi zirtîr thei leh chawkphûr thei a nihna tûra ngun taka zawng chhuaka siam a ni a. Bung sâwm leh pasarihahte chuan lehkha phêk zawng zawng luahkhattu Bible milem mawi tak tak a chuang a ni.
Engvânga Buatsaih Nge?
Engvângin nge Draw Close to Jehovah lehkhabu hi buatsaih a nih? A chhan bul ber chu, kan Pathian nêna mi mal inlaichînna nghet lehzual kan neih theihna tûra Jehova kan hriat chian lehzual nân a ni.
Draw Close to Jehovah lehkhabu hlâwkpuitu tûr Bible zirpuite emaw, Kristian unau thlarau lama che châng lo tuemaw chu i ngaihtuah chhuak thei em? A nih leh he lehkhabu hi i chhiar ṭan tawh em? I la chhiar lo a nih chuan, engah nge chhiarna hun duan i insiam nghâl mai loh vang? I chhiarte ngaihtuah nân hun insiam rawh. Lalram chanchin ṭha chu hlim tak leh ṭhahnemngai lehzuala i puan theih nân, he thu leh hla chhuah thar hian Jehova chu hnaihtîr lehzual che rawh se!