Pathian Thu Hmangaihtu Africa Mi Inngaitlâwm Tak
AFRICA tlawhtute chuan tualchhûng mite nêna Bible chungchâng sawi ṭan a awlsam dân hi mak an ti hle ṭhîn a. Hêng zawhna, “Pathian Ram hi eng nge ni?” a nih loh leh “Hêng harsatna ṭâm te, nat te, indo te, leh dân bawhchhiatna te hi tihven hlen dân a awm ang em?” tih ang chite hian mite beng a verh hle a. Mi tam takte chuan an hmelhriat lohte pawh Bible aṭanga a chhânna chu lâwm takin an inkawhhmuhtîr a. Chu chuan hunbi neia Bible zirna a hring ta ṭhîn a ni. Tin, zirlaite’n thlarau lama hma an han sâwn chuan, baptisma chang Kristian an lo ni ta ṭhîn bawk.
Chutiang zâwnga lo chhâng lêttu Africa mi hmasa ber chanchin chu Tirhkohte 8:26-40-ah a chuang a. Ani chu Pathian dik, Jehova chibai bûk tûra Jerusalema zin Ethiopia mi chu a ni.
A hnuaia milema târ lan ang hian, Ethiopia mi chu a tawlailîrin a in lamah a hawkîr leh a, lehkha zial chu a chhiar a ni. A hmêlhriat loh mi pakhat chuan va hnaihin: “I chhiar kha a awmzia i hria em?” tiin a zâwt a. Ethiopia mi chuan inngaitlâwm taka ṭanpuina a mamawh thu hrilhin, chu pa, Kristian thuhriltu Philipa chu a tawlailîra chuang ve tûrin a sâwm a. Tichuan, Philipa hnênah chuan a Pathian Thu Châng chhiar zawh tâk chiah awmzia chu hrilhfiah tûrin a ngên ta a ni. Philipa chuan a lehkha chhiar lai chu tûn hnai maia tihhlum tâk, Messia, Isua Krista chunga thleng famkim ta hrilh lâwkna a nih thu a hrilhfiah a. Tin, “Isua thu” chanchin ṭha nêna inkûngkaihna nei thil dangte pawh a hrilh a, chutah chuan Isua thawhlehna pawh a tel ngei ang.
Hêng thutak ropui tak a hriat hnu hian, Ethiopia mi chuan Isua zirtîr nih a duh ta a: “Baptisma channa tûr engin nge mi dâl kher?” tiin a zâwt a ni. Baptisma a chan hnu chuan he Africa mi inngaitlâwm tak hi lâwm takin a in lamah a haw a, Bible chuan a chanchin sawi zuina a nei tawh lo a ni.
Tûn laiah, Jehova Thuhretute chuan chu “chanchin ṭha” bawk chu khawvêl pum puia mi maktaduai têlte’n an hriat theih nân an ṭanpui a. Tûnah tak hian, in lama Bible zirna maktaduai ruk vêl lai an neihpui mêk a ni. (w05 4/1)