Armageddon Indo Zawng Zawng Titawptu Tur Pathian Indona Chu

“Mahni mihringpui thah chu nunrâwnna tâwpkhâwkah an ngai a; chuvângin, indo chu an tân chuan thil hriatthiam theih loh leh tenawm tak a ni a, chu mi sawina tûr ṭawngkam pawh an nei lo.”​—KUM 1888-A GREENLAND RAMA INUIT MITE CHUNGCHANG NORWAY MI RAM FANGTU FRIDTJOF NANSEN-A ZIAK.

INDONA chu “thil hriatthiam theih loh leh tenawm tak” a nihna hmuna khawsak chu tuin nge duh lo tehlul ang? Indona a hriat ngai loh avânga, chu mi sawina tûr ṭawngkam pawh a awm lohna khawvêl chu tuin nge thlahlel lo vang? Chutiang khawvêl chu a awm theih a rinawm lo va, chu mi siam tûra mihringte rinchhan kan nih phei chuan thil âwihawm lo tak niin a lang ngei ang.

Amaherawhchu, Isaia hrilh lâwknaah Pathian ngei chuan chutiang khawvêl chu awmtîr a tiam a ni: “An khandaihte chu leilehna hmâwrzumahte an chher ang a, an feite chu theikûng ahchhumna chem kawmahte an chher ang: hnam dangin hnam dang chungah khandaih a lek tawh lo vang a, indo dân pawh an zir tawh hek lo vang,” tiin.​—Isaia 2:4.

He thutiam a thlen famkim nân hian, tûn lai khawvêl leh sipai ṭang lai mi maktaduai 20 leh indona 20 vêl awm mêk hi nasa taka thlâkthleng a ngai ang tih a chiang hle. Chuvângin, Pathian engkimtithei Jehova chu mihringte chung thua a rawn inrawlh a ngai hi thil mak a ni lo. Chutianga Jehova inrawlhna chu Bible-in Armageddon tia a kohvah a vawr tâwp a thleng ang.​—Thu Puan 16:​14, 16.

Tûn hnai mai khân, “Armageddon” tih thu mal chu khawvêl pum nuclear hmanga tihchimihna tih sawifiah nâna hman ni mah se, dictionary pakhat chuan a awmzia ber chu hetiang zâwng hian a sawi: “Sual leh ṭhatna indona nasa tak leh hnuhnung ber thlenna hmun,” tiin. Ṭhatna chuan sual chu a ngam thei ngai ang em? A nih loh leh, chutiang indona chu suangtuahna mai em ni zâwk?

Bible-in suahsualna tâwp hun tûr a sawi nawn fo hi kan thlamuanpui thei a. Fakna hla phuahtu chuan: “Mi sualte chu lei aṭang hian tihboralin awm se la, mi suaksualte chu awm tawh suh se,” tiin a lo sawi lâwk a ni. (Sâm 104:35) Thufingte bu chuan: “Mi tluangte chu leilungah hian an chêng ang a, ṭha famkimte chu chutah chuan an awm reng a; mi suaksualte erawh chu leilung ata tihboral an ni ang a vervêk taka titute chu tihboral phiar an ni ang,” tiin a sawi a ni.​—Thufingte 2:​21, 22.

Bible chuan mi suaksualte’n an thuneihna chu ngawi rengin an hlân mai dâwn lo tih a sawi bawk a; chuvâng chu a ni, indona pawh tiama sual zawng zawng tiboral tûra Pathian indona hnuhnûng ber thlen a ngaih chhan chu ni. (Sâm 2:2) Bible-in he indona danglam bîk tak hming Armageddon tia a vuah hi a chhinchhiah tlâk hle.

Megido Kianga Indona Thleng Tawhte

“Armageddon” tih thu mal awmzia chu “Megido Tlâng,” tihna a ni a. Hmân lai Megido khawpui leh a chheh vêla awm Jezreel Phaizâwlah chuan nakin zêl atân pawha awmze thui tak nei indona tam tak a thleng tawh a ni. Hmân lai thilthleng chanchin ziaktu Eric H. Cline-a chuan Armageddon indona chungchâng a ziakna, The Battles of Armageddon tih lehkhabu-ah chuan: “Mihringte chanchin tluan chhuakah, Megido leh Jezreel Phaizâwl chu ramte chanchin thlâkthlengtu indona ṭhahnem tâwk tak thlenna hmun a ni,” tiin a ziak a ni.

Cline-a sawi angin, Megido kianga indonate chuan nakin zêl atân pawh awmze thui tak a nei a. Kum zabi 13-naa Asia khawmuala ramte awlsam taka hnehtu, Mongol sipaite chu he phaizâwlah hian a hmasa ber atân an tlâwm ṭan a ni. Khawvêl indopui pakhatnaah khân, Megido aṭanga hla vak lo vah, General Edmund Allenby-a kaihhruaina hnuaiah British sipaite chuan Turkey sipaite chu an hneh a. Sipai chanchin ziaktu pakhat chuan, Allenby-a hnehna chu “indona zawng zawnga rang ber leh nakin zêl atân pawha awmze nei thui tak” niin a sawi a ni.

Nakin zêl atâna awmze thui tak nei Bible-a indona dangte pawh chu Megido kiangah a thleng bawk a. Chu mi hmunah chuan, Rorêltu Baraka’n Kanaan mi Sisera sipaite chu a hneh a ni. (Rorêltute 4:​14-16; 5:​19-21) Gideona chuan a mi 300 lek nên chu mi hmunah chuan Midian sipai tam takte chu a hneh a. (Rorêltute 7:​19-22) Philistia sipaite’n Israel sipaite an hneh khân, Lal Saula leh a fapa Jonathana chu Gilbo Tlâng bulah an thi a ni.​—1 Samuela 31:​1-7.

Indona atâna hmunhma rem tak a nih avângin, kum 4000 chuang chhûngin Megido leh a bul vêla phaizâwlah chuan indona tam tak a thleng a ni. Hmân lai thilthleng chanchin ziaktu pakhat chuan indona vawi 34 lai a thleng tawh a ti tlat mai!

Megido chanchin leh indona atâna hmunhma rem tak a nihna chuan “Armageddon” tih thu mal entîr neia hman a nih chhan a hril a. Bible-ah chu thu mal chu vawikhat chauh lang mah se, Armageddon chuan leia mi zawng zawngte nun a khawih dâwn tih Thu Puan bua a chung leh a hnuai thute chuan a târ lang chiang hle a ni.

Armageddon Chungchâng Bible Sawi Dân

Megido kianga indona thleng tawhte zînga tam tak chu nakin zêl atân pawha awmze thui tak nei ni hlawm mah se, chûng zînga pakhat mah chu suahsualna tihbo hlenna tûr indona a ni lo. Inâwm takin, chutiang suahsualna tihbo hlenna tûr indona chu Pathian hnêna mi a ni ngei tûr a ni. Isua’n ṭum khat chu, “mi pakhat chauh lo chu tumah ṭha an awm lo, chu chu Pathian a ni” a ti. (Luka 18:19) Chu bâkah, Bible chuan Armageddon chu Pathian indona a nih thu chiang takin a sawi a ni.

Bible-a Thu Puan bu chuan “khawvêl zawng zawnga lalte” chu “Pathian engkimtitheia ni ropuia indonaa” hruai khâwm an nih tûr thu a sawi a. (Thu Puan 16:14) Chu hrilh lâwkna thu chuan heti hian a sawi belh a ni: “Hmun pakhat Hebrai ṭawnga Har–​Magedon, [a nih loh leh Armageddon] an tihah chuan an hruai khâwm ta a,” tiin.a (Thu Puan 16:16) A hnuah, Thu Puan bu chuan “leia lalho te [leh] an sipaiho te” chu ‘sakawr chunga chuanga chu do tûr leh a sipaiho do tûra an inkhâwm’ tûr thu a sawi a ni. (Thu Puan 19:19) He sakawr chunga chuanga hi tu dang ni lovin, Isua Krista ngei a ni tih târ lan a ni.​—1 Timothea 6:​14, 15; Thu Puan 19:​11, 12, 16.

Hêng Bible chângte aṭang hian eng thu tâwp nge kan siam ang? Armageddon chu Pathian leh thuâwih lo mihringte indona a ni tih chu. Engvângin nge Jehova leh a Fapa chu chutiang indonaah chuan an tel ang? A chhan pakhatah chuan, Armageddon chuan ‘lei tichhetute tihchhiatna a thlen’ dâwn vâng a ni. (Thu Puan 11:18) Chu bâkah, chu indona chuan remna khawvêl, Pathian ‘thutiam anga vân tharte leh lei thar, a chhûnga felna awmte’ chu a thlentîr dâwn a ni.​—2 Petera 3:13.

Engvângin Nge Armageddon Indona Neih A Ngaih?

‘Hmangaihna Pathian’ Jehova’n indo tûra a Fapa, “Remna Lal” a ruat chu ngaihruat harsa i ti em? (2 Korinth 13:11; Isaia 9:6) Anmahni chêttîrtu hriatthiamna chuan a chhan hre thiam tûrin a ṭanpui ngei ang che. Sâm bu chuan Isua chu sakawr chunga chuang indo mi angin a sawi a ni. Engvângin nge râl a do? Fakna hla phuahtu chuan, Krista chu “thutak leh thuhnuairawlhna leh felna avângin” sakawr chunga chuang angin a sawi a. Ani chuan felna a ngainat a, suahsualna a huat avângin indonaah chuan a tel a ni.​—Sâm 45:​4, 7.

Chutiang bawkin, Bible chuan Jehova’n tûn lai khawvêla rorêl dik lohna a hmuhte a chhân lêt dân chu a sawi a. Zâwlnei Isaia chuan: “LALPAN chu chu a hmu a, rorêlna rêng rêng a awm ta lo chuan a tilungni ta lo va. . . . Felna chu âwmphawah a ha a, chhandamna lukhum a khum a; tin inthuamnaah chuan phuba lâkna silhfênte chu a inbel a, kawrfualah chuan ṭhahnemngaihna a ha a,” tiin a ziak a ni.​—Isaia 59:​15, 17.

Mi suaksualte’n thuneihna an chan chhûng chuan, mi dikte chuan remna leh muanna an nei thei lo vang. (Thufingte 29:2; Thuhriltu 8:9) Dik tak chuan, mi hlemhlête leh mi suaksualte chu an thil sual tih kan simtîr thei lo. Chuvângin, remna leh rorêl dikna tluantling chu mi suaksualte tihboral an nih hnuah chauh a awm thei ang. Solomona chuan: “Mi suaksualte chu mi felte tlanna an ni,” tih a ziak a ni.​—Thufingte 21:18.

Pathian chu Rorêltu a nih avângin, kawng engkimah mi suaksualte chu dik taka rorêlsak an ni ang tih kan chiang thei a ni. “Lei chung zawng zawng Rorêltu chuan fel takin a ti dâwn lâwm ni?” tiin Abrahama chuan a zâwt a. A chhânna hmuh chhuah chu hei hi a ni: Jehova chuan englai pawhin thil dik a ti a ni, tih chu! (Genesis 18:25) Chu bâkah, Bible chuan Jehova’n mi suaksualte tihboralnaah lâwmna rêng a neih loh thu min hrilh a; a loh theih loh chinah chauh a tiboral ṭhîn a ni.​—Ezekiela 18:32; 2 Petera 3:9.

Armageddon Chu Indona Tak Tak A Ni Tih Hre Rawh

Nakin zêl atân pawha awmze thui tak nei tûr he indonaah hian tu lamah nge kan ṭan ang? Kan zînga mi tak zâwkte chuan ṭhatna lama ṭang angah kan inngai nghâl mai thei a. Mahse, chu chu engtin nge kan chian theih ang? “Felna zawng ula, thuhnuairawlh tum rawh u,” tiin zâwlnei Zephania chuan min fuih a ni. (Zephania 2:3) Pathian chuan “mi zawng zawng chhandama awmah leh thutak hriaah a duh a ni” tih tirhkoh Paula chuan a sawi.​—1 Timothea 2:4.

Jehova leh he leia suahsualna tihboral a tum chungchâng thutak zir hi chhandamna atâna rah bi hmasa ber a ni a. Felna nunpui chu rah bi pahnihna a ni a, chu chuan Pathian duhsakna leh vênhimna min neihtîr a ni.

Hêng rah bi pawimawh takte hi kan rah tawh chuan, mihringte indona titâwptu tûr Armageddon indona chu hlauh ahnêkin, nghâkhlel takin kan thlîr thei zâwk ang. Chu indona a tâwp hunah chuan, hmun tina mite chuan indona chu thil hriatthiam theih loh leh tenawm tak angin an thlîr tawh dâwn a ni. “Indo dân pawh an zir tawh hek lo vang.”​—Isaia 2:4. (w08 4/1)

[Footnote]

[Phêk 4-naa thu lâk chhuah]

Mihringte chung thua Pathian rawn inrawlhna chu Armageddon tia koh a ni

[Phêk 6-naa milem]

Gideona leh a mite chuan Megido kianga indonaah hnehna an chang

[Phêk 6-naa milem]

MEGIDO

[Phêk 6-naa milem]

Armageddon a tâwp hunah chuan, hmun tina mite chuan indona chu thil hriatthiam theih loh leh tenawm tak angin an thlîr tawh ang