Pathian Hnaih Rawh

‘LALPA Chuan Thinlung Lam A En Zâwk Ṭhîn’

1 SAMUEL 16:1-12

PAWN LAM lan dân chuan mi a bum thei hle a. Mi pawn lama a lan dân chuan a chhûngril, thinlung chhûnga a nihna chu a târ lang kher lo. Mihringte hi chuan pâwn lam lan dân aṭangin ngaihdân kan siam fo ṭhîn a. Pathian Jehova erawh chuan pâwn lam lan dân mai piah lam a en zâwk ṭhîn. Chu mi a nihzia chu 1 Samuela 16:1-12-a chhinchhiah thute hian a târ lang.

Thil awm dân chu han mitthla teh. Pathian Jehova chuan Israel hnam tâna lal thar tûr chu hriak a thih dâwn mêk a. Zâwlnei Samuela hnênah: “Bethlehem mi Jesaia hnênah ka tîr dâwn che a ni; a fapate zînga mi lal atân ka ruat tawh reng a ni,” a ti a. (Châng 1) Pathian Jehova chuan a mi ruata hming chu sawi lang lovin, Jesaia fapate zînga mi a nihzia chauh a sawi a ni. Samuela’n Bethlehem lam a pan chuan, ‘Jesaia fapate zînga Pathian Jehova thlan ber chu engtin nge ka hriat theih ang?’ tiin a ngaihtuah ngei ang le.

Bethlehem a thlen chuan Samuela chuan Jesaia leh a fate nêna inthawina chaw kîlho dân tûr a ruahman a. A fapa upa ber Eliaba a han hmuh chuan a lan dân chuan Samuela mit chu a la nghâl a. Samuela chuan Eliaba pian chu lal tân inhmeh a tih êm avângin: “LALPA hriak thiha chu a hmaa awma hi a ni ngei mai,” tiin a ngaihtuah a ni.—Châng 6.

Mahse, Pathian Jehova chuan chutiangin a ngai ve lo. Samuela hnênah: “A hmêl lam emaw, a sân lam emaw en suh; ani hi chu ka duh lo a ni,” tiin a hrilh a ni. (Châng 7) Eliaba sân lam leh hmêl ṭhatna chuan Pathian Jehova rilru a khawih ve lo. Ani chuan mi chu a lan dân mai ni lovin, a mizia zawng zawng pawh a en tel a ni.

Pathian Jehova chuan Samuela hnênah: “LALPA chuan mihring en dân angin a en ve si lo va; mihring chuan pâwn lama lan dân an en ṭhîn a, LALPA erawh chuan thinlung lam a en zâwk ṭhîn,” tiin a hrilhfiah a ni. (Châng 7) Ni e, mihring thinlung—chhûngrila a nihna, a ngaihtuahna te, rilru put hmang te, leh vei zâwng lo chhuahna—chu a ni Pathian Jehova’n a en zâwk chu. ‘Thinlung fiah ṭhîntu’ chuan Eliaba chu a hnâwl a, chutiang bawkin Jesaia fapa dang paruk Samuela hmaa rawn inlante pawh a hnâwl bawk.—Thufingte 17:3.

Jesaia chuan fapa dang pakhat, a naupang ber, ‘berâm vêng’ mêk Davida chu a la nei a. (Châng 11) Ani chu Samuela hmaa lo kal tûrin lo aṭangin a kohtîr a. Tichuan, Pathian Jehova chuan Samuela hnênah: “Tho la, hriak thih rawh, hei ngei hi a ni e,” tiin a hrilh a ni. (Châng 12) Davida chu “mit meng mawi tak, hmêl ṭha tak mai a ni a.” Mahse, Pathian mit titlungtu zâwk tak chu a thinlung chu a ni.—1 Samuela 13:14.

Pâwn lam mawina ngaih pawimawh lutukna khawvêlah hian, Pathian Jehova chu pâwn lam lan dânin a thunun ve lo tih hriatna aṭangin thlamuanna kan nei thei a ni. Atân chuan i sân lam emaw, miin hmêlṭha an tih leh tih loh che emaw chu engmah a ni lo. I chhûngril nihna, i thinlung zâwk chu a ni a tâna pawimawh zâwk chu ni. Chu mi hriatna chuan Pathian mita hmêlṭha nihtîr thei che mizia neih duhna a pe che em? (w10-E 03/01)