Pathianin Min Hrem Em Ni?
“Chhiatna tuartute chu khawngaih hle mah ila, hei hi tembatsu (pathian hremna) niin ka hria,” tiin Japan ram politician lâr tak pakhat chuan March 2011-a magnitude 9.0 laia chak lîrnghîng leh tsunami a thlen hnuah a sawi a ni.
January 2010 Haiti rama lîrnghînga mi 2,20,000 an thih khân, TV-a Pathian thusawitu hmingthang tak pakhat chuan “diabola nêna thu an thlun” vâng a nih thu leh “pathian lama an hawi” a ngaih thu a sawi.
Philippines ram Manila khuaa mi 79 lai mipuiin an chîl hlum khân, Catholic puithiam pakhat chuan: “Pathianin kan chhia leh ṭha hriatna thi tawh leh chawmawlh tawh kaihthawh chu a duh a ni,” a ti a. Chuta chanchinbu pakhat chuan an rama thleng ṭhîn “lei min te, typhoon thlipui te, leh chhiatna dangte hi Pathian thinur hrîkthlâkna a ni tih puitling zaa sawmhnih leh pakhatin an rin” thu a târ lang a ni.
PATHIANIN mi sualte hrem nân chhiatna a thlentîr ṭhîn tih hi ngaih dân thar a ni lo. Kum 1755 khân, Portugal ram Lisbon khuaa lîr a nghîn a, kângmei a chhuah bâkah, tsunami a thlen bawk avângin mi 60,000 lai an boral a. Chu thil a thlen hnu chuan philosopher lâr tak Voltaire-a chuan heti hian zawhna a siam a ni: “Lisbon khawpui tluchhe taah khân, nawmsipbâwlnaa khat Paris khawpui aiin suahsualna a tam zâwk em ni?” tiin. Mi tam tak chuan Pathianin mite hrem nân leilung chhiatna a hmang tih ngaih dân an nei a. Ram tam takah chuan chutiang chhiatnate chu Pathian thiltih anga sawi a ni hial a ni.
Hêng zawng zawngte avâng hian: Pathianin mite hrem nân leilung chhiatnate a hmang tak zet em? Tûn hnaia chhiatna râpthlâk thleng tam takte hi Pathian hremna a ni em? tia kan inzawh a ngai a ni.
Pathian mawhpuh nghâl mai ṭhîntu ṭhenkhat chuan leilung pianken thilte hmanga Pathian thlentîr chhiatna chanchinte chu an ṭanna dikzia târ lan nân an hmang a ni. (Genesis 7:17-22; 18:20; 19:24, 25; Number 16:31-35) Mahse, hêng Bible chângte bih chianna chuan leilung chhiatna leh Pathian thlentîr chhiatnate inan lohna langsâr tak pathum a târ lang. A pakhatnaah, vaukhânna thu hriattîr lâwk a ni ṭhîn. A pahnihnaah, mi ṭha leh mi sualte tihlumtu tûn laia leilung chhiatnate ang lo takin, Pathian thlentîr chhiatna chuan vaukhânna thu ngai pawimawh lo leh inlamlêt duh hauh lo mi sualte chauh a tiboral a. Tin, a pathumnaah, Pathianin mi felte tân tlân chhuahna kawng a siam ṭhîn a ni.—Genesis 7:1, 23; 19:15-17; Number 16:23-27.
Mi maktaduai têlte nun tichhetu chhiatna chhiar sên lohte hi Pathian thlentîr a ni tih finfiahna a awm lo. Chuti a nih chuan, chhiatna a pun chhoh chhan hi eng nge ni ta ang? Chûng chu engtin nge kan hmachhawn ang? Chhiatna thlen tawh loh hun a awm thei ngai ang em? Hêng zawhnate chhânna hi a dawta thuziakah i hmu ang. (w11-E 12/01)