“He Ram Chanchin Ṭha Hi . . . Hrilhin A Awm Ang”
“He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang.”—MATTHAIA 24:14.
A Awmzia Chu: Chanchin Ṭha ziaktu Luka chuan Isua’n “thu hril leh Pathian ram chanchin ṭha thlen chungin khaw lian leh khaw tê te a fang zêl” a ti a. (Luka 8:1) Amah ngei pawhin: “Khaw dangahte pawh Pathian ram chanchin ṭha ka hril tûr a ni, chu mi avâng chuan tirh ka ni si a,” a ti a ni. (Luka 4:43) A zirtîrte chu khaw lianah leh khaw têahte chanchin ṭha hril tûra a tirh chhuah hnuah: “Kâwlkil thleng pawhin ka thuhretute in ni ang,” tiin thu a pe a ni.—Tirhkohte 1:8; Luka 10:1.
Kristian Hmasate’n An Tlin Dân: Isua zirtîrte chuan a hrilh angin an ti nghâl vat a. “Ni tin Pathian biak inah leh anmahni inahte, ‘Isua chu Krista a ni,’ tiin zirtîr leh hrilh an bâng chuang lo.” (Tirhkohte 5:42) Thu hrilh chu mi tlêm tête chauh thawh tûr a ni lo. “Kristianna sawisêltu ziaktu hmasa ber Celsus-a chuan sahmul mêttute, pheikhawk siamtute, savun kaihtute, leh mi azawnga mi narân lehkha thiam lote chanchin ṭha hriltu ṭhahnemngai tak anni chu a diriam a ni” tih thilthleng chanchin ziaktu Neander-a chuan a sawi. Kum zabi hmasa lama Kohhran chanchin ziakna, The Early Centuires of the Church tih a lehkhabu chhuahah, Jean Bernadi-a chuan: “[Kristiante chuan] hmun tina kal chhuakin an hmuh apiang an be tûr a ni a. Kawngpuiah leh khawpui chhûngah te, kawng ṭhuampuiah leh inahte. Lawm an hlawh emaw, hlawh lo emaw pawh ni se, . . . Kâwlkil thlengin an kal tûr a ni,” tiin a ziak a ni.
Tûn Laiah Tute’n Nge Tlin?: Anglican kohhran hruaitu David Watson-a chuan: “Kohhranin thu hrilh leh zirtîr rawngbâwlna a ngai pawimawh lo hi tûn laia thlarau lama kan bawrhsâwm chhan pakhat a ni,” tiin a ziak a ni. José Luis Pérez Guadalupe-a chuan a lehkhabu siam, mite’n Catholic an chhuahsan chhan chungchâng târ lanna, Why Are the Catholics Leaving? tihah chuan Evangelical te, Adventist te, leh kohhran dangte rawngbâwlna chungchângah “anni chu in tinah an kal lo” tiin a ziak a. Jehova Thuhretute chungchângah chuan: “Anni chu mumal takin in tinah an kal a ni,” tiin a ziak a ni.
Jonathan Turley-a thusawi ngaihven awm tak leh dik tak chu, Cato Supreme Court Review, 2001-2002 tih Supreme Court thu tlûkna pawimawhte thlîr lêtna kum tina chhuak lehkhabu-ah a chuang a ni: “Jehova Thuhretute chungchâng sawi a nih hian, mi tam tak chuan an remchân loh laia va tlawhtu thu hrilha vâk vêlte an ngaihtuah chhuak nghâl ṭhîn. Jehova Thuhretute tân chuan thu hrila in tina kal hi an rinna puan zârna mai ni lovin, anmahni rinna ngei atâna thil pawimawh tak a ni,” tih hi. (w12-E 03/01)
[Phêk 7-naa bâwm]
Chhinchhiahna Chu I Lo Hre Ta Em?
He thuziak inzawma kan sawi lan tâk Pathian Lehkha Thu-a tehnate aṭangin, tûn laiah tute’n nge Kristianna dik chhinchhiahna pu nia i hriat? Kristian nia inchhâl pâwl a nuai têl awm mah sela, a hnungzuitute hnêna Isua thusawi: “Lalpa, Lalpa’ mi ti nazawng chu vân ramah an lût lo vang a; ka Pa vâna mi duhzâwng titu erawh chu an lût ang,” tih hi hre reng ang che. (Matthaia 7:21) Pa duhzâwng tih avânga Kristianna dik chhinchhiahna putute hriatna leh anni nêna inkawmna chuan Pathian Ram hnuaia chatuan malsâwmna a thlen thei a ni. He magazine rawn petu che Jehova Thuhretute hnênah Pathian Ram leh malsâwmna a rawn thlen tûrte chungchâng zâwt tûrin kan sâwm a che.—Luka 4:43.