Leilung Chhiatnate—Pathian A Nunrâwng Tih Finfiahna A Ni Em?

MI ṬHENKHAT SAWI DAN: “Pathianin khawvêlah ro a rêl a, chuvângin leilung chhiatnate hi a awmtîr a ni; mi nunrâwng tak a ni ngei ang.”

BIBLE SAWI DAN: “Khawvêl pumhlûm hi mi sual thu thuin a awm.” (1 Johana 5:19) “Mi sual” a tih chu tu nge ni? Bible chuan ani chu Satana niin a târ lang. (Matthaia 13:19; Marka 4:15) Chu chu thil âwihawm lo a ni em? Hei hi han ngaihtuah teh: Setana chuan khawvêl chunga thu a neih chuan, mihringte chu amah ang bawka hmasial tûr, duhâm tûr, leh thil dâwn thui lo tûrin a thunun ngei ang. Hei hian mihringte’n an chênna leilung leh boruak an enkawl ṭhat loh chhan a hrilhfiah a ni lâwm ni? Mi thiam tam tak chuan chhehvêl boruak enkawl ṭhat loh hi leilung chhiatna thlen chhante zînga mawhphurtu ber a ni thei a, chu chuan leilung chhiatna a thlentîr emaw, a tichhe zual emaw, a nih loh leh chu mi avânga tawrhna a titam zual emaw thei tiin an vaukhân a ni.

A nih chuan, engvângin nge Pathianin chutiang taka Setana’n thuneihna a chan chu a phal? A chhânna chu mihring chanchin inṭantirha kan nu leh pa hmasa berte Pathian Rorêlna laka an helna aṭangin a hriat theih a ni. Chuta ṭang chuan, mi tam zâwkte chuan chutiang kawng chu an zawh a. Chu duh thlanna—Pathian rorêlna hnâwlna—chuan khawvêl mihringte chu Pathian hmêlma Setana kutah a dah a. Chuvâng chuan, Isua chuan Setana chu “khawvêl lal” tiin a ko a ni. (Johana 14:30) Setana chuan kumkhuain ro a rêl ang em? Rêl lo vang!

Jehovaa chuan Setana awmtîr hrehawm tawrhna chu a ngaihsak lo a ni lo. A nihna takah chuan, mihringte hrehawm tawrhnain ani chu nasa takin a nghawng a ni. Entîr nân, Israel hnamte chunga harsatna thleng chungchângah Bible chuan Pathian chu: “An manganna zawng zawngah chuan ani chu a mangang ve ṭhîn,” tiin a sawi a ni. (Isaia 63:9) Pathian chuan zahngai takin Setana rorêlna rawng tak titâwp tûrin a ruahman a—rei a rial lo vang! Ani chuan a Fapa Isua Krista chu dik tak leh fel taka Lal anga chatuana rorêl tûrin a ruat tawh a ni.

I TEL VE DAN: Setana rorêlna chuan leilung chhiatna ata mihringte humhim thei lo mah se, Isua rorêlna chuan a humhim ngei ang. Isua’n ṭum khat chu thlipui na tak lak ata a zirtîrte chu a humhim a. Bible thuziak chuan heti hian a sawi a ni: “Ani [chuan] . . . thli chu a hau va, dîl hnênah pawh chuan, ‘Ngawi la, awm hle hle rawh!’ a ti a. Tin, thli chu a bang a, a lo reh ta ṭhup mai a,” tiin. Zirtîrte chuan: “He mi hi tunge ni le, thli leh dîl lam pawhin a thu an awi hi?” tiin an sawi a ni. (Marka 4:37-41) Chu thilthleng chuan, Isua’n Lal anga ro a rêl hunah a thu âwih zawng zawngte chu a humhim ang tih rin nghehna min pe a ni.—Daniela 7:13, 14. (w13-E 05/01)