Bible Ṭanchhan Zawhnate Chhânna

Bible hi Pathian Thu a ni tak zet em?

Pathian Thu chu danglam bîk tûra i ngaih ang ngeiin, Bible chu a danglam bîk a. Bu tlûklehdingâwn tam tak chu ṭawng za tam taka chhut chhuah a ni tawh a. Bible-a finna awm chuan mite chu a ṭha zâwngin a thlâkthleng thei a ni.—1 Thessalonika 2:13; 2 Timothea 3:16 chhiar rawh.

Bible hian nakin hun tûr a sawi lâwk dik avângin Pathian hnêna mi a ni tih kan hria a. Chutiang chuan tuman an ti thei lo. Entîr nân, Isaia lehkhabu hi han ngaihtuah teh. Isua pian hma kum zabi khat aia tama tihchhuah Isaia lehkhabu a copy chu Tuipui Thi kianga pûkah hmuh a ni a. Chu chuan Babulon khawpui chu luah lohvin a awm ang tih a sawi a ni. Chu chu Isua’n leia rawng a bâwl hnu kum tam takah a lo thleng ṭan a ni.—Isaia 13:19, 20; 2 Petera 1:20, 21 chhiar rawh.

Engtin nge Bible hi ziah a nih?

Bible hi kum 1,600 vêl chhûnga ziah a ni a. Bible ziaktu mi 40 vêl chuan inkalhna nei lovin thu pakhat chu an zui a ni. Engtin nge chu chu a nih theih? Pathianin a kaihruai a ni.—2 Samuela 23:2 chhiar rawh.

A châng chuan, Pathianin Bible ziaktute hnênah vântirkoh te, inlârna te, mumang te hmangin thu a hrilh a. Dân narânin, Pathian chuan Bible ziaktute thinlungah a thu chu a dah a, Pathian thuchah sawi chhuah nâna an thu mal hman tûrte an thlan chu a remti a ni.—Thu Puan 1:1; 21: 3-5 chhiar rawh. (w14-E 02/01)