Ka Silai Tel Lovin Khawiah Mah Ka Kal Ngai Lo

KA TUN HMA NUN:

Hnathawktu mi retheite awmna hmun Rom khawpui dai fêmah piangin, ka seilian a. Nun chu a harsa khawp mai. Min hringtu ka nu chu ka hmu ngai lo va, ka pa nên pawh kan inlaichînna a ṭha lo hle. Kan chhehvêl nun khirh tak kâra dam khawchhuah dân zirin ka seilian a ni.

Kum sâwm mi ka nih chuan thil ka ru ṭan tawh a. Kum 12 mi ka nih chuan, a vawikhatna atân in ka chhuahsan a. Ṭum khat aia tam ka pain police station aṭangin min hruai haw a. Mite nên kan inhau deuh reng a—engkim chungah ka nunrâwngin, ka thinrim êm êm mai a ni. Kum 14 mi ka nih chuan in ka chhuahsan hlen ta a. Damdawite ka khawih ṭanin, kawngsîrah ka khawsa a. Mutna tûr hmun ka neih loh avângin mi motor dârthlalang tikehin, zîng khaw vâr hma chu a chhûngah ka mu ṭhîn a. Zîngah chuan ka inphih fai theih nân tui awmna hmun ka zawng leh mai ṭhîn a ni.

Thil rûk chu ka thiam chho hle a—bag pawhthlâksak aṭanga zân lama apartment leh in rawkte thlengin ka thiam hle a ni. Mite chuan a chhe lamin min hre ṭan a, chumi hnu lawkah mite hriat lâr vak loh mi sual pâwl zawm tûra sâwm ka ni a; tichuan, bank rawk theihna “hun remchâng” ka nei ta a ni. Ka mize râwng tak avângin mi sual pâwlah chuan zah ka kai ta thuai a. Ka silai tel lovin khawiah mah ka kal ngai lo; ka mut hunah pawh ka lukham hnuaiah ka dah ṭhîn a ni. Tharum thawh te, damdawi hman sual te, rûkrûk te, ṭawngkam bawlhhlawh te, leh nungchang bawlhllawhnate chu ka nuna bet tlat an rawn ni chho va. Police-te chuan englai pawhin min zawng reng a. Vawi tam tak man ka tâwk a, kum tam tak chhûng chu tân ina lût leh chhuakin hun ka hmang a ni.

BIBLE-IN KA NUN A THLAK DANGLAM DAN:

Ṭum khat chu, tân in aṭanga ka chhuah chuan, ka nutei ka va tlawh a. A fate pahnih nên Jehova Thuhretute zînga mi an lo ni tawh tih rêng ka hre lo. Anni chuan Thuhretute inkhâwma tel ve tûrin min sâwm a. Thil chinchâng hriat ka duh avângin ka zui ve ta a. Kingdom Hall kan thlen chuan, chuta lût chhuakte ka hriat theih nân kawngka bula ṭhut chu ka chuh a. Chumi ṭum pawh chuan silai ka pai reng a ni.

Chu inkhâwm chuan ka nun a thlâk danglam a. Chuta ka awm laia khawvêl dang daiha awm ang maia ka ingaih lai chu ka la hre reng. Mite chuan hawihhâwm tak leh nui sângin min lo lâwm a. Thuhretute hmêla lang an hmangaihna leh rilru dik tak an putzia chu ka mitthlaah a la châm reng a ni. Chûng mite nun dân leh ka nun dân chu a inang lo hle!

Thuhretute chuan Bible min zirpui ṭan a. Ka zir tam poh leh ka nun dân chu ka thlâkthleng pumhlûm a ngai tih ka hre chiang lehzual a ni. Thufingte 13:20-naa: “Mi fing pâwl la, i lo fing ang a, mi â pawl erawh chu hrehawm tuar phahna a ni,” tih thu chuan ka thinlung a khawih hle a. Mi sualho kawm chu ka bânsan a ngai tih ka hre ta a. Chutianga tih chu a awlsam lo; mahse, a tâwpah Jehova ṭanpuinain ka ti thei ta a ni.

Tisa lamah mahni ka invawng thianghlim bawk a. Theih tâwp ka chhuah hnu chuan, mei zûk leh damdawi hman chu ka bânsan thei ta a. Ka sam sei tak chu ka mêt a, ka bengbehte chu paihin, ṭawngkam bawlhhlawh hman pawh ka bânsan a. Ka nuna vawi khatna atân ka thiltihte chu ka thunun ṭan thei ta a ni.

Lehkha chhiar leh zir hi nuam ka tih ngai loh avângin, Bible zirnaa rilru pêk chu harsa ka ti tak zet a. Mahse, theih tâwp ka han chhuah chuan zawi zawiin Pathian Jehova hmangaihna ka nei chho va; tichuan, chhûng lama inthlâk danglamna ka nei ṭan a, ka chhia leh ṭha hriatna chuan min tibuai ṭan a ni. Mahni inthiam lohna nasa tak ka nei fo va, thil sual ka lo tih tawh zawng zawngte avângin Pathian Jehova’n min ngaihdam theih ka ring lo hial a. Chutiang hunah chuan, Lal Davida’n thil sual lian takte a tih hnua Pathian Jehova’n a ngaihdam dân thute ka chhiarna aṭangin thlamuanna nasa tak ka nei a ni.—2 Samuela 11:1–12:13.

Ka harsatna dang leh chu, mi dangte hnêna ka rinna chungchâng hrilh tûra in tin kal rawngbâwlnaa tel hi a ni a. (Matthaia 28:19, 20) Tûn hmaa ka thil sual tihte avânga harsatna tâwktute ka tawn palh chu ka hlau hle! Mahse, zawi zawiin chu ka hlauhna chu ka hneh thei ta a. Englai pawha mite ngaihdam peih reng, hmangaihna nei tak kan Pa vâna mi chungchâng hre tûra mi dangte ṭanpuina aṭangin lungawina dik tak ka nei ṭan a ni.

KA HLAWKPUI DAN:

Jehova chanchin zirna chuan ka nun a chhanhim! Tûn hmaa ka ṭhian kawm ṭhinte zînga a tam zâwk chu an boral tawh a, ṭhenkhat chu tân ina khung an ni a; mahse, kei chuan nun lungawithlâk tak ka neih mai bâkah, nakin hun beiseina ka nei bawk a ni. Inngaitlâwm tûr te, thuâwih tûr te, leh ka thinchhiatna thunun thei tûrtein ka inzir a. Chutianga ka tih avângin, ka chhehvêla mite nên inlaichînna ṭha lehzual ka nei a ni. Ka nupui duh tak Carmen-i nên kan innei a. Kan pahnihin, Bible chungchâng hre tûra mi dangte ṭanpuina aṭangin hlimna nasa tak kan nei a ni.

Tûnah chuan hna pângngai tak, a châng chuan bank-ahte ka thawk ṭhîn a; mahse, rawk tawh lovin, ka tifai ṭhîn tawh zâwk a ni!