Hlim Taka Thawhrim Theih Dân

HNATHAWH CHUNGAH THLIR DAN DIK NEI RAWH

I hnathawh chu rilru hman ngai deuh vek a ni emaw, tharum thawh ngai deuh vek emaw, a nih loh leh hman kawp ngai ve ve emaw a nih pawhin, “thawhrimna zawng zawngah hian hlâwkna a awm” tih hria ang che. (Thufingte 14:23) Eng ang hlâwkna nge a awm? Pakhatnaah chuan, thawhrimna chuan kan tisa lam mamawhte nei thei tûrin min ṭanpui a. Pathian chuan tih tak zeta amah betute chu an mamawh pe tûrin a tiam ngei mai a. (Matthaia 6:31, 32) Mahse, keimahni lamah rinawm taka theih tâwp chhuaha thawk tûrin min beisei bawk a ni.—2 Thessalonika 3:10.

Chuvângin, kan hnathawh chu thiltum pakhat thlen theihna angin kan thlîr thei a. Hnathawh chu kan mawhphurhnate ṭha taka hlen chhuah theihna kawng zahawm tak a ni. Kum 25 mi Joshua chuan: “Mahni inenkawl theih chu hlawhtlinna pakhat a ni a. I mamawh thilte a pêk theih che chuan, i hnathawh chuan a tih tûr dik tak a ti a ni,” tiin a sawi a ni.

Chu bâkah, hna thawhrimna chuan mahni inrintâwkna min neitîr a. Tihah chuan, hna thawhrim chu a hming ang chiahin a hahthlâk a ni. Kan hnathawh hi ninawm leh harsa tak anga a lang chung pawha thawh rengna aṭangin lungâwina kan nei thei a ni. Thatchhiatna kan hneh tihna a ni si a. (Thufingte 26:14) Chutiang kawngah chuan, hnathawhna chuan lungâwina a thlen a ni. Thuziak hmasaa kan sawi tâk Aaron-a chuan: “Nilênga hna ka thawh hnua ka awm dân chu nuam ka ti hle. Ka chau hle a—ka hnathawh chu mi dangin min hriatpui lo pawh a ni mai thei bawk—mahse, thil engemaw ka hlen chhuak tih ka hria a ni,” tiin a sawi a ni.

I HNAAH INPE RAWH

Bible chuan mipa “a hnathawha taima,” a nih loh leh thiam tak leh hmeichhia ‘a kuta lungâwi taka thawktu’ chu a fak hle a. (Thufingte 22:29; 31:13) Mahse, mi chu a hnathawhah a thiam nghâl mai thei lo. Chu bâkah, kan zîngah mahni thiam lohzâwng hnathawh nuam ti kan awm meuh lo vang. Chu chu, mi tam takin an hnathawha hlimna an hmuh loh chhan a ni ang; an hnathawha thiam tûr khawpin ṭan an la lo tihna a ni.

A nihna takah chuan, miin rilru dik tak—thawh thiam dân tûr zir tumna—nêna a thawh chuan eng hna pawh hlim takin a thawk thei a ni. Kum 24 mi William-a chuan: “Theih tâwp chhuaha i thawh a, a rahchhuahte i hmuh hian a lungâwithlâk hle. Zawmthaw taka thawhna aṭangin chutiang lungâwina chu i hmu ngai lo vang,” tiin a sawi a ni.

I HNATHAWH MI DANGTE’N AN ṬANGKAIPUI DAN NGAIHTUAH RAWH

I hlawh zât tûr chauh ngaihtuahna thang chu pumpelh rawh. Chu ai chuan, hetiang zawhnate hi inzâwt zâwk ang che: ‘Engvângin nge he hna hi ka thawh a ngaih? Chu chu thawk lo ta ila—a nih loh leh, thawk ṭha lo ta ila—eng thil nge thleng ang? Ka hnathawh chu min dangte’n engtin nge an ṭangkaipui?’ tiin.

Kan hnathawh mi dangte’n an ṭangkaipui dân kan hmuh hunah lungâwina nasa tak kan neih ṭhin avângin, zawhna hnuhnûng ber chu ngaihtuah atân a ṭha zual bîk a ni. Isua ngei chuan: “Englo lâk aiin pêkin lukhâwng a nei zâwk,” tiin a sawi a. (Tirhkohte 20:35) Kan hnathawh ṭangkaipuitute—min dâwrtute leh hnathawka kan rawihte—bâkah, kan thawhrimna ṭangkaipuitu mi dang pawh an awm a. Chutah chuan kan chhûngkaw zînga mite leh ṭanpui ngai mi dangte pawh an tel a ni.

Kan chhûngkaw zînga mite. Chhûngkaw lû bêrin a chhûngte châwm nâna theih tâwp chhuaha hna a thawh hian, a chhûngkaw zînga mite chuan a lo berah kawng hnihin an hlâwkpui a. A hmasain, a chhûngte tisa lam mamawh—ei leh bâr te, silh leh fên te, leh chênna in te a pe a. Pathian pêk “mahni chhûngkhat lainate ngaihsak” tûra a mawhphurhna chu a hlen a ni. (1 Timothea 5:8) A pahnihnaah, ei zawngtu taima tak chuan hna thawhrim a pawimawhzia entîrnain a zirtîr a ni. Thuziak hmasaa kan târ lan tâk Shane-a chuan: “Ka pa chu hnathawh ṭhat dân chungchângah entawn tûr ṭha tak a ni. A dam chhûng zawnga hna thawkrim ṭhîn mi rinawm tak a ni a, a hun tam zâwk chu thing mistiri hna a thawk a. A entawn tûr siam aṭangin, mi dangte hman ṭangkai theih tûr thilte mahni kut ngeia siam a hlutna chu ka zir a ni,” tiin a sawi a ni.

Ṭanpui ngaite. Tirhkoh Paula chuan Kristiante chu ‘tlachham hnêna pêk tûr an neih theih nân thawkrim’ tûrin a hrilh a. (Ephesi 4:28) Dik tak chuan, keimahni leh kan chhûngte châwm nâna kan thawhrim hian, mi dang ṭanpui ngaite ṭanpui thei dinhmunah kan ding thei bawk ang. (Thufingte 3:27) Chuvângin, hna thawhrimna chuan pêk chhuahna aṭanga lo awm hlimna nei lehzual tûrin min ṭanpui thei a ni.

PHUT CHIN AIA TAM THAWK RAWH

Isua chuan Tlâng Chunga Thusawi hmingthang takah: “Mêl khat kala phût luitu apiang che hnênah chuan mêl hnih kal rawh,” tih a sawi tel a. (Matthaia 5:41) Engtin nge i hnathawhnaah a thute phêna awm a thu bul chu i nunpui ang? A tlêm thêi ang bera thawh tum ai chuan, phût chin aia tam thawh theih dân kawng dap ang che. Mi mal thiltum insiam la; i hna thawh chu beisei aia ṭha zâwk leh rang zâwka thawh tum rawh. I hnathawh zawh chu têtham tak a nih pawhin chhuang ang che.

Phût chin aia tam i thawh chuan, i hnathawhah i hlim lehzual ang. Engvângin nge? I thiltihte i thunun theih vâng a nih bâkah, tihluih vâng ni lo va, mahni duh thua thawk tam lehzual i nih avângin. (Philemona 14) He mi chungchângah hian, Thufingte 12:24 thu: “Mi taima kut chuan rorêlna a keng ang a, mi thatchhia erawh chu hna rim tak thawk tûra tih a ni ang,” tih hi kan hre chhuak thei a ni. Kan zîngah hian chhiahhlawh anga thawhtîr, a nih loh leh hna thawhluihtîr chu kan awm mang meuh lo vang. Nimahsela, a rûn dâl chauhva thawktu chu mi dangte phût anga thihsak ṭhîn chhiahhlawh angin a inngai thei a. Mahse, phût chin aia tam thawktu—ama duh thlannaa thawk tamtu—chuan a nun pawh thunun thei nia inhriatna a nei a ni. A thiltihte a thu hnuaia a dah reng avângin.

HNATHAWH CHU A HMUN TUR DIK TAKAH DAH RAWH

Hna thawhrim hi ngaihsânawm tak a ni a; mahse, nunah hian hnathawh aia pawimawh zâwk a awm tih kan hre reng tûr a ni. Bible chuan taima tûrin min fuih ngei mai a. (Thufingte 13:4) Mahse, hnathawh âtchhîlh tûr chuan mi fuih lo. Thuhriltu bung 4:6 chuan: “A dik thei e, hahdamna veikhat neih pawh hi buai phîlîa thawka veihnih neih ai chuan a ṭha,” tiin a sawi. A sawi tum chu eng nge ni? Hnathawh âtchhîlhtu chuan a hun leh tha zawng zawng chu hnathawhnaah a hman ral avângin, a hnathawh rah a chên ngai lo va. A nihna takah chuan, a hnathawh chu awmze nei lo, ‘buai phîlîa thawhna’ a ni ta a ni.

Bible chuan hnathawh chungchângah thlîr dân inbûk tâwk nei tûrin min ṭanpui thei a. Hnathawhnaah taihmâk chhuah tûrin min hrilh mah se, “thil pawimawh zâwkte chu fiah” tûrin min fuih bawk a ni. (Philippi 1:10, New World Translation) Thil pawimawh zâwkte chu engte nge ni? Chutah chuan chhûngte leh ṭhiante nêna hun hman a tel thei ang a. Chu aia pawimawh zâwk chu thlarau lam thiltihte a ni a, chutah chuan Pathian Thu chhiara chhûtngunna ang chite a tel a ni.

Nun inbûk tâwk neitute chuan an hnathawhah hlimna an nei lehzual dâwn niin a lang. Atîr lama kan sawi tâk William-a chuan: “Tûn hmaa ka hna thawhna pu pakhat chu hnathawh ṭhat dân chungchângah entawn tlâk tak a ni. Hna a thawhrim bâkah, a hnathawh a ṭhat avângin dâwrtute nên pawh inlaichînna ṭha a nei a. Mahse, hnathawh bân hnu tlai lamah chuan, a hnate chu hnuchhawnin a chhûngkuate leh a Pathian biakna ngaihsak dân a hria a. Ani hi zawng, ka hriat tawhte zînga a hlim ber pâwl a ni!” tiin a sawi a ni. (w15-E 02/01)