Isua Inngaihtlâwmna leh Khawngaihna Entawn Rawh

1. Engvângin nge Isua entawna chuan Jehova min hnaihtîr ang?

KAN mi ngaihsânte mizia leh awm dân chu kan entawn ṭhîn a. Leia awm tawh mihring zawng zawngah hian Isua Krista aia entawn tlâk zâwk an awm lo. Engvângin nge? Ṭum khat chu Isua chuan: “Tupawh mi hmu chu Pa hmu a ni,” tiin a sawi a. (Joh. 14:9) A Pa mizia ṭha famkima a lantîr avângin Fapa kan hmuh chuan Pa hmu ang kan ni. Chuvângin, Isua kan entawn hian lei leh vâna ropui ber, Pathian Jehova kan hnaih tihna a ni. A Fapa mizia leh nun kawng entawn chu a va manhla tak êm!

2, 3. (a) Engvângin nge Jehova chuan a Fapa mizia dik tak ziakna min pêk a, Jehova chuan eng ti tûrin nge min duh? (b) He thuziakah leh a dawta thuziakah eng nge kan sawiho vang?

² Mahse, Isua chu mi eng ang nge a nih engtin nge kan hriat theih? Isua chungchâng ziakna Bible kan nei chu a lâwmawm hle. Pathian Jehova chuan a Fapa kan entawn theihna tûra kan hriat chian a duh avângin, a chanchin chu Kristian Grik Pathian Lehkha Thu-ah min pe a ni. (1 Petera 2:21 chhiar rawh.) Bible-a Isua min hnutchhiah a entawn tûr siam chu ‘ke hniak’ nêna khaihkhin a ni a. A nihna takah chuan, Jehova chuan Isua hnunga kal a, a hniak hnung chiah chiaha rah tum tûrin min hrilh tihna a ni. Isua chuan kan tân entawn tûr ṭha famkim min hnutchhiah ngei mai a; keini lah kan ṭha famkim si lo. Mahse, Jehova chuan Isua hniak hnung ṭha famkima zui tûrin min beisei lo. Chu aimahin, Jehova chuan mihring ṭha famkim lote tâna a theih ang tâwka a Fapa entawn tûrin min beisei zâwk a ni.

³ Chuti chu, Isua mize duhawm takte zînga ṭhenkhat chu i lo ngaihtuah ang u. He thuziakah hian, a inngaihtlâwmna leh a khawngaihna kan sawiho vang a, a dawtah chuan a huaisenna leh a hriat thiam theihna kan bih chiang ang. Chûng mize tinte chungchângah zawhna pathumte chu chhân a ni ang: Chu mi awmzia chu eng nge ni? Engtin nge Isua’n chu chu a târ lan? Engtin nge kan entawn theih ang? tihte hi.

ISUA CHU A INNGAITLAWM

4. Engtin nge inngaihtlâwmna chu i hrilhfiah ang?

⁴ Inngaihtlâwmna chu eng nge ni? He chapona khawvêlah hian mi ṭhenkhat chuan inngaihtlâwmna chu chak lohna, a nih loh leh inrintâwk lohna angin an ngai mai thei a. Mahse, a kalh chiah chu a ni zâwk fo ṭhîn. Inngaihtlâwmna lantîr tûr chuan chakna leh huaisenna neih a ngai a. Inngaihtlâwmna chu “chapona leh intihveina kalh chiah mizia” tia hrilhfiah a ni bawk. Inngaitlâwmna chu mahni kan inngaihtuah dân aṭanga inṭan a ni. Bible dictionary pakhat chuan: “Inngaihtlâwmna chu Pathian hmaa kan tlâwm tak zet dân hriatna a ni,” tiin a sawi. Pathian hmaa kan inngaihtlâwm tak zet chuan kan mihringpuite chunga lêngah kan indah lo vang. (Rom 12:3) Inngaihtlâwmna neih reng chu mi ṭha famkim lote tân chuan thil awlsam a ni lo. Mahse, Pathian hmaa kan tlâwmzia kan ngaihtuah a, a Fapa hniaka kan zui reng chuan inngaihtlâwmna neih dân kan zir ang.

5, 6. (a) Vântirhkoh chungnung ber Mikaela chu tu nge ni? (b) Engtin nge Mikaela chuan inngaihtlâwmna rilru put hmang a lantîr?

⁵ Engtin nge Isua’n inngaihtlâwmna a lantîr? Pathian Fapa chuan a inngaihtlâwmna chu hun rei tak chhûng, vâna thlarau thil siam thiltithei tak a nih lai leh leia mi ṭha famkim a nih chhûng zawngin a lantîr ve ve a ni. Entîrna ṭhenkhat lo ngaihtuah ta ila.

⁶ A rilru put hmang. Bible ziaktu Juda chuan Isua leia mihring anga a rawn kal hmaa a entawn tûr siam pakhat a târ lang a. (Juda 9 chhiar rawh.) Vântirhkoh chungnung ber Mikaela a nih angin Isua chu ‘Diabola nên inbeiin,’ chu misual nên chuan “an inhnial” a ni. Chu chu “Mosia ruang” chungchângah a ni a. Mosia thih hnuah Jehova chuan a ruang chu an hriat theih lohna tûr hmunah a phûm tih hre chhuak leh la. (Deut. 34:5, 6) Diabola chuan Mosia ruang chu biakna dik lo chawisân nân a hmang duh a ni mai thei. Diabola thiltum ṭha lo chu eng pawh ni se, Mikaela chuan huaisen takin a do va. Lehkhabu pakhat chuan, ‘inbei’ leh “inhnial” tia leh chhuah Grik thu mal chu “dân lam thila inkhînna atân pawh hman theih a ni,” tih a sawi a; chu chu “Mikaela’n Mosia ruang la tûra ‘Diabola dikna neih’ a cho” tihna a ni thei ang. Mahse, Vântirhkoh Chungnungber chuan Diabola chunga rorêlna thlentu tûr a ni lo tih a hria a. Chuvângin, Rorêltu Lû Ber, Jehova kutah thu buai chu a hlân ta zâwk a ni. Chutiang chuan, Mikaela chuan a thinur hunah pawh a thu neihna piah lamin thil a ti lo. Inngaihtlâwmna rilru put hmang a va ni tak êm!

7. Engtin nge Isua’n a thusawiah leh a thiltihah inngaihtlâwmna a lantîr?

⁷ Leia a rawngbâwl chhûng khân, Isua chuan a thu sawiah leh thiltihah inngaihtlâwmna dik tak a lantîr. A thusawiah. Ani chu a inchawimawi ngai lo. Chu ai chuan, chawimawina zawng zawng chu a Pa hnênah a hlân zâwk a ni. (Mk. 10:17, 18; Joh. 7:16.) A zirtîrte hmusit zâwngin thu a sawi ngai lo va, a nih loh leh hnuaihnung zâwk nia inhriatna a neihtîr ngai lo. Chu aimah chuan, ani chuan a chawimawi a, an ṭhatna lai a hmuhte chu fakin, a rinzia a târ lang bawk. (Lk. 22:31, 32; Joh. 1:47) A thiltihah. Isua chuan khawvêl thil tam takin a tihbuai loh dinhmun tlâwm taka nun chu a thlang a. (Mt. 8:20) Hna hnuaihnung ber thawh pawh inhuam takin a thawk a. (Joh. 13:3-15) A thuâwihna hmangin inngaihtlâwmna nasa tak a lantîr a ni. (Philippi 2:5-8 chhiar rawh.) Thu âwihna ngainêp ṭhîn mi intiveite ang lo takin, Isua chu a tâna Pathian duhzâwngah inngaihtlâwm takin a intulût a, “thi khawp hiala thu zâwmin a lo awm ta” a ni. Mihring Fapa, Isua chu “rilrua inngaihtlâwm tak” a ni tih a chiang hle a ni lâwm ni?—Mt. 11:29.

ISUA INNGAIHTLAWMNA CHU ENTAWN RAWH

8, 9. Engtin nge inngaihtlâwmna kan lantîr theih?

⁸ Engtin nge inngaihtlâwmna lantîrna kawngah Isua kan entawn theih? Kan rilru put hmangah. Inngaihtlâwmna chuan kan thu neihna piah lama thil ti lo tûrin min thunun a. Rorêlnaa ṭhu tûr kan ni lo tih kan hriat chuan, mi dangte dik lohna emaw, an rilru put hmang emaw kan sawisêl nghâl mai lo vang. (Lk. 6:37; Jak. 4:12) Inngaihtlâwmna chuan kan neih ang thiltihtheihna emaw, chanvo emaw nei lote hmusit a, “kherkhiap lutuk,” a nih loh leh a lutuka intifel lo tûrin min ṭanpui a ni. (Thur. 7:16) Upa inngaitlâwm takte chu an Kristian unaute aia chungnung zâwkah an indah ngai lo. Chu ai chuan, chutiang berâmpute chuan ‘mi dang ṭha zâwkah ruatin’ a tê ber angin an awm zâwk a ni.—Phil. 2:3; Lk. 9:48.

⁹ Kum 1894 aṭanga bial tlawhtu, a nih loh leh bial kantu anga rawngbâwl tawh ṭhîn W.J. Thorn-a entawn tûr siam hi ngaihtuah ta ila. Kum tam tak rawng a bâwl hnu chuan New York hmâr lama awm Ran vulhna hmuna ar vulhnaah hna thawk tûra sâwm a ni ta a. Ani chuan: “Ropui intih châng ka neih apiang hian, kil khatah kalin: ‘Nang vaivut them. Chhuan tûr eng nge maw i neih le?’ tiin ka inzâwt ṭhîn,” tiin a sawi a ni. (Isaia 40:12-15 chhiar rawh.) Inngaihtlâwmna rilru put hmang a va ni êm!

10. Engtin nge kan thusawiah leh kan thiltihah inngaihtlâwmna kan lantîr theih?

¹⁰ Kan thusawiah. Thinlunga thuhnuairawlhna dik tak kan neih chuan kan ṭawngkam chhuakah inngaihtlâwmna a lang chhuak ang. (Lk 6:45) Mi dangte nêna kan inbiak hian, kan thil tihhlawhtlinte leh chanvote ringhawt kan sawi lo vang. (Thuf. 27:2) Chu ai chuan, kan unaute ṭhatna lai kan zawng ang a, an mize ṭhate, an theihnate, leh an thil hlenchhuahte avângin kan fak zâwk ang. (Thuf. 15:23) Kan thiltihah. Kristian inngaitlâwmte chuan he khawvêla challanna an zawng lo. A tam thei ang bera Jehova rawng an bâwl theih nân, khawvêl mite ngaiha hna hnuaihnung takte thawkin, an nun an tisamkhai zâwk mah a ni. (1 Tim. 6:6, 8) A pawimawh ber chu, thuâwihna hmanga inngaihtlâwmna kan lantîr thei hi a ni a. Kohhrana “hotute thu âwih” leh Jehova inawpna pâwl aṭanga kaihhruaina kan dawnte pawma zâwm tûr chuan inngaihtlâwmna kan neih a ngai a ni.—Heb. 13:17.

ISUA CHUAN KHAWNGAIHNA A NEI

11. Kawngaihna tih awmzia chu hrilhfiah rawh.

¹¹ Khawngaihna chu hmanngaihna pêng pakhat a ni a, lainatna nên inanna lai a nei a ni. Bible chuan Pathian leh Isua’n khawngaihna leh lainatna an lantîr tih a sawi a. (Lk. 1:77, 78; 2 Kor. 1:3; Phil. 1:8) Khawngaihna lantîr chungchângah, Bible hrilhfiahna pakhat chuan: “Khawngaihna lantîr tûra sâwmna chu ṭanpui ngaite tawrhpui tûra insâwmna mai a ni lo. Mi dangte nun kawng thara an kal theih nâna hma min lâktîr thei khawpa anmahni ngaihsakna lantîr tûra insâwmna a ni,” tiin a sawi a.” Khawngaihna chu mi chêttîrtu ber a ni a. Khawngaihna neitu chu mi dangte nuna danglamna thlentîr tûra chêttîrin a awm ṭhîn a ni.

12. Isua’n mi dangte a khawngaih tih engin nge târ lang a, a khawngaihna chuan eng ti tûrin nge a chêttîr?

¹² Engtin nge Isua’n khawngaihna a lantîr? A khawngaihna rilru put hmang leh thiltihte. Isua chuan mi dangte khawngaihna a nei a. A ṭhian Mari leh mi dangte’n a unaupa Lazara thi an ṭah lai a hmuh chuan, mipui hmaah “a ṭap ta a.” (Johana 11:32-35 chhiar rawh.) Tichuan, thinlung taka a khawngaihna avângin—hmeithai fapa a khaihthawh ang bawkin—Lazara chu a kaitho va. (Lk. 7:11-15; Joh. 11:38-44) Chu khawngaihna thiltih avângin, Isua chuan Lazara chu vân lam nun beiseina neite zîngah a dah ngei a rinawm a ni. Chu mi hma pawhin, Isua chuan a hnêna lo kal mipuite chu ‘a khawngaih êm êm a ni.’ Chuvângin, “thu tam tak a zirtîr ta a.” (Mk. 6:34) A zirtîrna pawmtu apiangte tân chu chu nun thlâkthlengtu thiltawn a va ni tak êm! Isua khawngaihna chu rilrua khawngaihna mai a ni lo va; chu chuan mi dangte ṭapui tûrin a chêttîr tih chhinchhiah ang che.—Mt. 15:32-38; 20:29-34; Mk. 1:40-42.

13. Eng kawngin nge Isua’n mi dangte chu khawngaihna nei taka a biak? (A thupui chunga milem en rawh.)

¹³ A khawngaihna ṭawngkamte. Isua khawngaihna thinlung chuan mi dangte chu khawngaihna nêna thu hrilh tûrin a chêttîr a, a bîk takin hnehchhiaha awmte hnênah a ni lehzual a ni. Tirhkoh Matthaia chuan he Isaia thute hi Isua chungchâng sawi nân a hmang a ni: “Luang sâwp a titliak fithla lo vang a, la khu pawh a timit lo vang,” tiin. (Is. 42:3; Mt. 12:20) Isua thusawi dân chuan luang sâwp ang mite emaw, sahriak khâwnvâr phita alh mit ṭêp tawh ang mite emaw chu a tichak a. ‘Thinlung lungchhiate tuam tûrin’ beiseina thuchah a hrilh a ni. (Is. 61:1) ‘Thawk rim leh phurrit phurte’ chu amah pan tûrin a sâwm a, “chawlhna an hmu ang” tih a tiam bawk. (Mt. 11:28-30) A hnungzuite hnênah Pathian chuan “mi tête”—khawvêl thlîrna aṭanga mi pawimawh lote—tiamin, Amah betu tawh phawt chu a ngaihsak tih a tiam a ni.—Mt. 18:12-14; Lk. 12:6, 7.

ISUA KHAWNGAIHNA CHU ENTAWN RAWH

14. Engtin nge mi dangte tâna khawngaihna rilru put hmang kan neih theih?

¹⁴ Khawngaihna lantîrna kawngah engtin nge Isua kan entawn theih? Kan khawngaihna rilru put hmang. Hetiang rilru put hmang hi kan pianpui ni lêm lo mah se, Bible chuan nei chho tûrin min fuih a. Khawngaihna chu Kristian zawng zawngte inthuam tûra beisei mihring thar zînga mi a ni a. (Kol. 3:9, 10, 12) Engtin nge mi dangte khawngaihna rilru put hmang chu i neih theih ang? I thinlung hawng zau rawh. (2 Kor. 6:11-13) Mi tuemawin a rilru vei zâwng leh lungkham zâwngte a hrilh hunah che ngun takin ngaihthlâksak ang che. (Jak. 1:19) I suangtuah theihna hmangin heti hian inzâwt rawh: ‘A dinhmunah hian ding ta ila, engtin nge kan awm ang? Eng nge ka mamawh ang?’ tiin.—1 Pet. 3:8.

15. Luang sâwp ang leh la khu mit ṭêp tawh ang mite ṭanpui tûrin eng nge kan tih theih?

¹⁵ Kan khawngaihna thiltihte. Khawngaihna chuan mi dangte nuna danglamna thlentîr duhna nei tûrin min chêttîr a, a bîk takin luang sâwp ang leh la khu mit ṭêp tawh ang mite chunga danglamna thlentîr duhna min neihtîr a ni. Engtin nge anni chu kan ṭanpui theih? Rom 12:15 chuan: “Ṭapte chu ṭahpui rawh u,” tiin a sawi a. Lungngaite chuan tihvensakna aiin tawrhpuina an mamawh zâwk mai thei. A fanu a boral hnua unaute thlamuanna dawngtu unaunu pakhat chuan: “Ka ṭhiante’n min rawn tlawh a, min ṭahpui hian ka lâwm hle,” tiin a sawi. Ngilneihna thilte tiin khawngaihna kan lantîr thei bawk. A in siam ṭha tûra ṭanpui ngai hmeithai hriat i nei em? Inkhâwm kalna tûr, rawngbâwla kal chhuahna tûr, a nih loh leh doctor panna tûra ṭanpui ngai Kristian tar lam tawh an awm em? Khawngaihna thiltih chhe tê pakhat pawhin ṭanpui ngai unaute nunah danglamna nasa tak a thlen thei a ni. (1 Joh. 3:17, 18) A pawimawh berah chuan, rawngbâwlnaa theih tâwp chhuaha telna hmangin, mi dangte chungah khawngaihna kan lantîr thei a ni. Mi rilru ṭhate nun tihdanglam theih nân kawng ṭha zâwk a awm si lo va!

16. Lungngaite fuih nân eng nge kan sawi theih?

¹⁶ Kan khawnghaihna ṭawngkamte. Mi dangte kan khawngaihna chuan “rilru tête chu fuih” tûrin min chêttîr a. (1 Thes. 5:14) Chutiang mite fuih tûrin eng nge kan sawi theih? Tih tak zeta kan ngaihsakna leh kan ngaihtuahzia lantîrna chuan an rilru a tihahdam thei a. An mize ṭhate leh an theihnate an hmuh thiam theih nân tih tak zetin kan fak thei bawk a. Anni chu Jehova chuan a Fapa lamah a hîp avângin Pathian mithmuhah an hlu hle a ni tih kan hriattîr thei bawk. (Joh. 6:44) Tin, Jehova chuan “thinlunga lungchhiate” leh “rilrua inchhîr” a chhiahhlawhte chu a ngaihsak tak zet tih kan tiam nawn thei bawk. (Sâm 34:18) Kan khawngaihna ṭawngkam chuan thlamuanna mamawhte chungah damna a thlen thei a ni.—Thuf. 16:24.

17, 18. (a) Jehova chuan upate chu a berâmte eng anga cheibâwl tûrin nge a beisei? (b) A dawta thuziakah eng nge kan sawiho vang?

¹⁷ Upate u, Jehova chuan a berâmte khawngaihna nêna enkawl tûrin a beisei a che u. (Tirh. 20:28, 29) A berâmte châwm a, fuih bawk a, tihhahdam chu in mawhphurhna a ni tih hre reng ang che u. (Is. 32:1, 2; 1 Pet. 5:2-4) Hei vâng hian, khawngaihna nei upa chuan dânte siamin leh an dinhmunin a tlin lo chung pawha rawngbâwlnaa thawk tam lehzual tûra inthiam lohna neihtîrna hmangin berâmte chu a thunun lo. Chu aimah chuan, Jehova an hmangaihna chuan theih tâwp chhuaha a rawng bâwl tûrin a chêttîr ang tih ring tlat chungin anmahni tihhlim chu a tum zâwk a ni.—Mt. 22:37.

¹⁸ Isua inngaihtlâwmna leh khawngaihna kan ngaihtuah hian, a hniaka zui zêl tûra chêttîrin kan awm tak meuh a ni. A dawta thuziakah chuan Isua mize duhawm tak pahnih—huaisenna leh hriat thiam theihna—chu kan sawiho vang. (w15-E 02/15)