BIBLE ṬANCHHANA ZAWHNATE CHHANNA
Khawi aṭangin nge sual a lo awm?
Tuin Nge Isua chu thil sual ti tûra thlêm?—Matthaia 4:8-10
A tlângpui thuin, mite chuan remna siamtu nih te, mi rinawm tak nih te, leh ngilnei tak nihte chu an duh ṭhîn a. A nih leh, engvângin nge tharum thawhna te, rorêl dik lohna te, leh nunrâwnnate chu kan hmuh fo ṭhin? Chanchin thar râpthlâk tak takte hi kan hre zing ta hle a. Thil sual ti tûra mite thununtu tuemaw a awm a ni thei ang em?—1 Johana 5:19 chhiar rawh.
Pathianin thil sual tih châkna neiin mihringte hi a siam em? Siam lo ve, Pathian Jehova chuan mihringte chu ama anpui, a hmangaihna entawn duhna nei tûrin a siam a. (Genesis 1:27; Joba 34:10) Mahse, mihringte chu zalên taka duh thlan theihna pawh pein a chawimawi bawk a ni. Kan nu leh pa hmasa berte’n thil sual tih an thlan khân, Pathian entawn tûr siam chu hnâwlin, an lo ṭha famkim ta lo va. An hnên aṭangin sual tih châkna kan rochun ta a ni.—Deuteronomy 32:4, 5 chhiar rawh.
Sual kan nei reng ang em?
Pathian chuan thil sual tih châkna kan neih chu do tûrin min duh a. (Thufingte 27:11) Chuvângin, thil sual tih pumpelh dân leh hlimna dik tak neih theih dân min zirtîr a. Mahse, tûnah chuan, Pathian hmangaihna chu ṭha famkimin kan la entawn thei rih lo a ni.—Sâm 32:8 chhiar rawh.
Tûnah chuan suahsualna tam hle tawh mah se, Pathian chuan a rah chhuah râpthlâk takte mi zawng zawngin an hmuh theih nân rei lo te chhûng a la awm zêl chu a phal a. (2 Petera 3:7-9) Mahse, nakin lawkah Pathian thu âwihtutein leilung hi a la khat ang.—Sâm 37:9-11 chhiar rawh. (wp15-E 07/01)