Bible Zirna Hmasâwn Tak Kaihhruaina—Zir Zât Tûr Bituk Chin Siamin
1 Isua’n a hnungzuitute a zirtîr khân, an tlin tâwk ang zêl, “an hriat theih tâwk tâwkin” a zirtîr a. (Mk. 4:33; Joh. 16:12) Chutiang bawkin, tûn laia Pathian Thu zirtîrtute chuan an zir chak dân tûr an teh a ngai a ni. An zir zât tûr bituk chin siam chu a zirtîrtu leh zirlai theihna leh dinhmunte azir a ni ang.
2 Rinna Nghet Tak Siam Rawh: Zirlai ṭhenkhat tân chuan mi dangin ṭum khata an zir zawh theihte pawh ṭum hnih ṭum thum vêl zir a ngai mai thei a. Rei lo te chhûnga thu tam tak zir zawh aiin, a thu zirte hre thiam tûra ṭanpui chu a pawimawh zâwk a ni. Zirlai tinte chuan an rinna chhar thar atâna Pathian Thu nghahchhan nghet tak an mamawh a ni.—Thuf. 4:7; Rom 12:2.
3 Chawlhkâr tina i zirpui hian, zirlaiin Pathian Thu aṭanga a thu zirte a hriatthiam nân leh a pawm theih nâna a mamawh ang hun chu hmanpui rawh. A thutak zirte hlutna a hlâwkpuina tûr tibuai khawpin hmanhmawh suh. A thu pawimawh laite leh zirlaia tel Bible châng pawimawh zualte ngaihtuah nân a hun mamawh tâwk pe rawh.—2 Tim. 3:16, 17.
4 Thu Zirlai Pênsan Suh: Hmanhmawh taka zirpui pumpelh kan duh laiin, zirlai pênsanna pawh pumpelh kan duh bawk a ni. Zirlai chuan mi mal chungchâng sawi vak a duh chuan, zir zawha sawiho tûrin ruahmanna i siam pawh a ngai mai thei a ni.—Thur. 3:1.
5 Kawng leh lamah chuan, thutak atâna kan phûrna chuan zirna neih laia ṭawng hnem lutuk lo tûra insûm chu a tiharsa mai thei a. (Sâm 145:6, 7) A châng chânga thu belhnate emaw, thiltawnte emaw chuan zirna a tichangtlung thei a; mahse, chûngte chu zirlaiin Bible zirtîrna thu bul hriatna dik a neihna dang tûr khawpa tam lutuk emaw, sei lutuk emaw nihtîr chu kan duh lo vang.
6 Zirna neih apianga a âwm tâwk thu sawihona neihpuiin, kan Bible zirpuite chu ‘LALPA ênga lêng’ tûrin kan ṭanpui a ni.—Is. 2:5.