Bible Zirna Hmasâwn Tak Kaihhruaina—Zirlaiin Zawhna A Siam Hunah
1 Bible zirna ṭha taka neih a nih tawh chuan, a thu pakhat aṭanga a danga pakai ṭhin aiin Bible zirtîrna a indawt ang zêla zir chu a ṭha ber ṭhîn a. Hei hian zirlai chu hriatna dik nghahchhan ṭha nei tûr leh thlarau lama hmasâwn tûrin a ṭanpui a ni. (Kol. 1:9, 10) Mahse, zirna neih laiin zirlaite chuan thu dang dang chungchângah zawhnate an siam ṭhîn a. Chûngte chu engtia tih tûr nge?
2 Fing Thiam Rawh: Zirlai thu nêna inkûngkaihna nei zawhnate chu chhân nghâl theih a ni ṭhîn a. Zawhna chu thu leh hla chhuah kan zirlaia tel a hnua la zir tûr a nih chuan, chutiang a nih thu hrilh mai chu a tâwk thei a ni. Amaherawhchu, a zawhna chu zir tûra tel lo emaw, ṭha taka chhân theih nâna zir bingna neih ngai ang chi emaw a nih chuan, chu mi chungchâng chu zir zawh hnuah emaw, hun dangah emaw ngaihtuah chu a ṭha zâwk thei ang. Ṭhenkhat chuan zirlai zawhna siam ziak chhuah a nih hian chu chuan ngaih pawimawhsak a nihzia a hriattîr bâkah, zirna la pêng lo tûrin a ṭanpui bawk tih an hmu chhuak a ni.
3 Bible zirtîrna thu tam takte chu kan thu leh hla chhuah zirlai mêkahte hian tawi tê chauhva târ lan a ni a. Zirlaiin zirtîrna engemaw chu pawm harsa a ti emaw, thurin dik lo a vuan tlat emaw a nih chuan engtia tih tûr nge? Chu mi chungchânga Bible sawi dân kimchang taka sawihona lehkhabu dang ngaihtuah chu a ṭangkai mai thei a. Zirlai chuan a la rin theih loh cheu chuan, hun danga sawiho atâna dahin, a zirlai pângngai chu chhunzawmpui rawh. (Joh. 16:12) Bible hriatna a neih tam a, thlarau lama hma a sâwn zêl hian, atîra a rin theih loh chu Bible zirtîrna chu a lo hre thiam thei ang.
4 Thuhnuairawlh Rawh: A zawhna chhânna i hriat chian loh chuan, mahni ngaih dân sawi mai suh. (2 Tim. 2:15; 1 Pet. 4:11) Chu mi chungchâng zir bingna i neih hnua i chhânsak tûr thu hrilh rawh. Chu chu zirlai hnêna zir bingna neih dân zirtîrna hun remchângah i hmang hial thei a ni. Zawi zawiin, Jehova inawpna pâwl pêk zir bingna hmanrua chi hrang hrangte hman dân chu kawhhmuh rawh. Hetiang kawng hian, a tâwpah ama zawhna siam chu amah vêkin a chhâng thei tawh ang.—Tirh. 17:11.