‘Hun Ṭhat Loh’ Laia Rawngbâwl Tûrin Zirtîrna Kan Dawng
1 ‘Hun ṭha lo’ kâra a thleng tlâk âwm mi zawng chhuak tûra min zirtîrtu Kan Lalram Rawngbâwlna kalta ṭhenkhata kaihhruaina a hun taka kan hmuhte chu kan hlut hle a ni lâwm ni? (2 Tim. 4:2, C.L. Re-edited) Chûng kaihhruainate zînga ṭhenkhat chu i hmang chhin tawh em? Bible aṭanga chanchin ṭha kan sawite ngaithla tûr emaw, hnar tûr emawa in neitu dikna neih chu zahsak tûra zirtîr kan ni a. Sakhaw hrang hrang vuantute inah an sâwm pawh ni si lova lêng lût kan nih avângin, chu dikna zahsak chu a finthlâk a ni. Thu kan sawi hmain in neituin ngaihthlâk a duh leh duh loh kan chian phawt a. Chutiang chuan a duh zâwng kan zahsak tih hre thiam tûrin kan ṭanpui a ni.
2 Fîmkhur tak, fing thiam tak leh remhre tak niin, buaina pumpelh chu kan tum a. Remhriatnaah chuan kan sawi loh tûr hriat pawh a tel a ni. (Joh. 16:12) Kan hriat ṭheuh angin, tihluihna emaw, thlêmna emaw hmanga mi dangte sakhaw vawn lai thlâksak tum kan ni hauh lo. Krista zirtîrte chuan remna leh thlamuanna chanchin chu an keng a. Mahse, thu hrilhna bial chhûnga awm zawng zawngte chuan an pawm duh vek lo va, an tâna thil ṭha kan duhsakna lah an hre thiam hek lo. Chuvângin, Kristiante chuan anmahni tithinurtute, a nih loh leh ‘tiduhdahtute chu an tlânsan’ tûr a ni. (Mt. 10:23; Tirh. 14:5-7) Tûn hnaia dodâlna tâwk unaute chuan chutiang thu hrilhna bial chu kalsanin, a ngaithla duhte awmna lamah thu an hril a. Chu chuan rah ṭha tak a chhuah tih an hmu a ni. Chutih rual chuan, tûn hmaa dodâltute pawhin chhan eng engemawte avângin tûnah chuan an ngaithla duh tawh mai thei tih kan hriat reng a ngai bawk.
3 Upate’n kohhran thu hrilhna bial chhûnga sakhaw lama mite rilru nat hmana hmachhawn dân tûr thuziak chhuah tawhte ṭanchhana a khât tâwka an hriatnawntîr chu unaute chuan an ngaihlu hle ṭhîn. (2 Pet. 3:1, 2) January aṭanga May thla leh August 2008 chhuak Kan Lalram Rawngbâwlna-a thuziak ṭhenkhat chu rawngbâwl tûra kal chhuah hmaa inkhâwmnaah sawi chhuah theih a ni a. Chu chuan kan tih dân hlui leh rawngbâwlnaa mite hriat sual theih ṭawngkamte hmang tawh lo tûra min ṭanpui bâkah, ruahmanna thar nêna inmila thuhnuairawlh taka rawngbâwl tûrin min ṭanpui bawk a ni. Kaihhruainate hrilhnawn fo an nih chuan, vântlâng hmuna inhmukhâwm group-te chu ring taka ṭawng emaw, mipui mit la tûr zâwng emawa awm lo tûrin an fîmkhur lehzual ang.
4 A pawimawh berah chuan, harsatna kan tawh hmain nî tina Pathian Thu zirna leh ṭawngṭaina hmangin kan thinlung kan buatsaih tûr a ni. Huaisen taka thil min tihtîr thei rinna nung kan neih a ngai si a. (Ezr. 7:10; Sâm 78:8; Jak. 2:17; w09 9/1, phêk 13-17 en rawh.) Pathian Jehova kan rinchhanna chuan mipui pungkhâwmin min hualvêl laia mangang phili lo tûr leh police thuneitute hnêna kan rawngbâwl dân zah thiam taka sawi thei tûrin min ṭanpui ang.
5 Hlauhna avânga rawngbâwl ṭha thei lova awm i nih chuan, lungngai suh. Isua tirhkoh zawng zawngte pawh Isua thih hnu hun engemawti chhûng chu thu hril lovin an awm a; mahse, a hnu lawkah thu hrilin an buai leh nghâl a ni tih hre reng ang che. (Mt. 26:56; Tirh. 5:28) A bîk takin kan thusawi hnâwl a nih hunah, Tirhkohte 18:9, 10-a Isua thu min tiam hi kan hre reng tûr a ni. Chanchin ṭha hril zêl thei tûrin Pathian Jehova hnênah huaisenna dîl rawh. (Tirh. 4:29) I thusawi ngaithlatute thinlung hneh theih dân kawng dap rawh. Pathian Jehova chuan thinlung a hre thei a, mi rilru ṭhate chu a lamah a hîp tih theihnghilh ngai suh ang che.—1 Sam. 16:7; Joh. 6:44.