Kristian Rawngbâwltute Chu An Ṭawngṭai A Ngai
1. Kan rawngbâwlna hlen tûrin eng nge ngai?
1 Mahni mai chuan rawngbâwlna chu kan hlen chhuak thei lo. Pathian Jehova chuan kan mamawh chakna min pe a ni. (Phil. 4:13) Berâm ang mite kan zawnna kawnga min ṭanpui tûrin a vântirhkohte chu a hmang a. (Thup. 14:6, 7) Kan phun a, tuia kan châwm thutak chi ṭhantîrtu chu Pathian Jehova hi a ni. (1 Kor. 3:6, 9) Kristian rawngbâwltute tân ṭawngṭaia kan Pa vâna mi rinchhan chu a va pawimawh tak êm!
2. Ṭawngṭainaa kan dîl tûr ṭhenkhat chu eng nge ni?
2 Mahni Tân: Thu kan hril apiang hian kan ṭawngṭai tûr a ni a. (Eph. 6:18) Ṭawngṭainaa kan dîl tûr ṭhenkhat chu eng nge ni? Kan thu hrilna bial chunga rilru put hmang dik leh huaisenna nei tûrin kan dîl thei a ni. (Tirh. 4:29) Bible kan zirpui theih tûr mi rilru ṭhate min kawhhmuh tûrin Pathian Jehova hnênah kan dîl thei a. In neituin zawhna min zâwt a nih chuan, ṭha taka chhâng thei tûra min ṭanpui tûrin rilruin kan ṭawngṭai zawk thei bawk. (Neh. 2:4) Dinhmun ṭha lo kâra thu kan hril zawm zêl hian remhriatna leh huaisenna min pe tûrin kan dîl thei a ni. (Mt. 10:16; Tirh. 4:29) Tin, kan rawngbâwlna dah pawimawh ber tûrin finna kan dîl thei bawk. (Jak. 1:5) Chu bâkah, a rawngbâwltu nih theihna chanvo avânga lâwmthu kan sawi hian Pathian Jehova chu a lâwm a ni.—Kol. 3:15.
3. Engtin nge mi dangte tâna ṭawngṭaisakna chuan thu hrilhna a ṭanpui?
3 Mi Dangte Tân: “Inṭawngṭaisak tawn ṭhîn” tûr kan ni a, tihâwm a nih chuan kan rawngbâwlpuite tân hming hmerhin kan ṭawngṭai tûr a ni. (Jak. 5:16; Tirh. 12:5) Hrisêl lohna avângin thu hrilh rawngbâwlnaah i tel ṭha thei lo vem? Chutiang i nih chuan, i rawngbâwlpui hrisêl ṭhate tân ṭawngṭaisak rawh. Mi dang tâna i ṭawngṭainain thil a tih theihzia chu ngainêp ngai suh! Kan unaute chu ‘inrema thlamuanga an khawsak theih nâna’ kan thu hrilhna do lo tûrin, sawrkâr thuneitute tâna ṭawngṭaisak pawh thil inâwm tak a ni bawk.—1 Tim. 2:1, 2.
4. Engvângin nge kan ṭawngṭai fan fan ang?
4 Chanchin ṭha khawvêl zawng zawnga hril chu hna hautak tak a ni a. Kan “ṭawngṭai fan fan” chuan, Pathian Jehova ṭanpuinain kan rawngbâwlna chu kan hlen chhuak thei ang.—Rom 12:12.