Hna Hlimawm Ber Chu
1. Tûn lai hian eng ang thlarau lama tihdamna hna nge thawh mêk a nih?
1 Kum zabi khatnaa tisa lama tihdamna hmutute chu nasa takin an hlim a. (Lk. 5:24-26) Tûn lai hian, thlarau lama tihdamna chu kan hlimpui thung a ni. (Thup. 22:1, 2, 17) Pathian Jehova Thu leh thlarau thianghlimin mite nun a thlâk danglam dân chanchinte chhiar chu a va phûrawm tak êm! Mahse, chu aia manhla zâwk chu Bible zirna hmasâwn tak kaihhruaina hmanga chu hnaa tel ve chu a ni.
2. Tuemaw thutak kan zirtîrna aṭangin eng hlimna nge kan neih theih?
2 Pathian hming chu eng nge ni? Engvângin nge hrehawm tawrhna awm a phal? Pathian Ramin mihringte tân eng nge a rawn thlen dâwn? Chutiang zawhnate chhân chu nuam kan ti mai ni lovin, thutak a hriat avânga zirlai hmêla hlimna lo lang hmuh pawh nuam kan ti hle bawk. (Thuf. 15:23; Lk. 24:32) Zirlaiin hma a han sâwn chuan Pathian Jehova hming chu a hmang ṭan ang a, a silhfên leh inchei dân chu thlâkin, a thil chîn ṭha lote a bânsan bâkah, mi dangte hnênah pawh thu a hrilh ṭan ngei ang. Inpumpêk leh baptisma chang thei khawpa hma a sâwn chuan ani chu kan unau leh kan rawngbâwlpui a lo ni ang. Hetianga hma a sâwn chhohna tinrêngte hi hlim chhan tûr a tling a ni.—1 Thes. 2:19, 20.
3. Bible zirpui nei tûrin engtin nge hma kan lâk theih?
3 I Tel Thei Ang Em? He hna hlimawm berah hian tel ve i duh chuan, Jehova hnênah Bible zirpui nei tûrin a ṭanpuina dîl la, i ṭawngṭaina mil chuan thawk bawk ang che. (1 Joh. 5:14) Mite awmna hmunah leh hmuh theih an nih hun tûrah thu hril la. A remchân apiangin Bible zirpui-ah sâwm rawh. (Thur. 11:6) Tuina neite i hmuha thutak chi i tuh tawh chuan, tuia châwm tûrin tlawhkîr ang che.—1 Kor. 3:6-9.
4. Engvângin nge hun hmâwr tawhzia hriatna nên mite chu Bible zirpui-ah kan sâwm ang?
4 Felnaa rilṭâm leh tuihâl mi tam tak an la awm a. Tuin nge anni chu Bible zirpuiin, an thlarau lam mamawh phuhrûksak ang? (Mt. 5:3, 6) Buh seng hun a tâwp hmaa thu hrilh leh zirtîr siam rawngbâwlna hlen tûrin inphal takin i inpe ṭheuh vang u.—Is. 6:8.