I Fate Chu Rawngbâwltu Ni Tûrin Zirtîr Rawh
1. Sâm 148:12, 13 chuan Kristian nu leh pate chu eng ti tûrin nge a phût?
1 Pathian Jehova chuan naupangte chu amah chawimawi tûrin a sâwm a. (Sâm 148:12, 13) Chuvângin, Kristian nu leh pate chuan an fate chu Bible thutak leh nungchang lama Pathian dânte zirtîr aia tam tiin, chanchin ṭha rawngbâwltu ni tûrin an zirtîr a ni. Chu chu eng anga tihchhoh tial tial theih nge ni?
2. Engtin nge nu leh pa entawn tûr siam ṭha tak chuan a fate chu a nghawng theih?
2 Entawn Tûr Ṭha: Rorêltu Gideona chuan a mi 300-te hnênah chuan: “Mi en ula, ka tih angin ti ve zêl ang che u,” a ti a. (Ro. 7:17) Naupangte chuan an nu leh pate chu enin, an thil tih angin an ti ve ṭhîn. Pa pakhat chuan zânah hna a thawk a; Inrinni zînga a hnathawhna ata a lo hâwn hian chau hle ṭhîn mah se, mut zai rêl aiin a fate chu rawngbâwlnaah a hruai chhuak ṭhîn a. Ṭawngkam tel lovin a fate chu rawngbâwlna pawimawhzia a zirtîr a ni. (Mt. 6:33) I fate chuan Pathian biakna chi hrang hrang, ṭawngṭai te, Bible chhiar te, inkhâwma chhânna pêk te, leh thu hrilhna ang chi te-a hlim taka i tel lai an hmu che em? Entawn tûr ṭha famkim erawh i ni thei lo ngei ang a. Mahse, i fate chuan Pathian Jehova rawngbâwlna kawnga i taihmâkna an hmuh chuan amah be tûra zirtîr i tumna chu an dawng sawng ṭha lehzual ang.—Deut. 6:6, 7; Rom 2:21, 22.
3. Nu leh pate chuan an fate chu eng ang thlarau lam thiltumte siam tûr leh tlin tûrin nge an ṭanpui ang?
3 Thiltum Sâng Chho Zêlte: Nu leh pate chuan an fate chu kal dân te, ṭawng dân te, thawmhnaw hâk dân te, leh thil dang dangte chu hah pawh hre lovin an zirtîr ṭhîn. Naupangte’n an ṭhan chhohna kawnga rahbi pawimawh takte an thlen hnu hian, thiltum tharte chu an hmaa chhawp chhuahsak an ni a. Kristian nu leh pa an nih chuan, an fate chu an kum leh an theihna azirin thlarau lam thiltumte siam tûr leh chûng thiltumte tlin tûrin an ṭanpui bawk. (1 Kor. 9:26) I fate chu mahni irâwm chhuaka chhânna pe tûr leh Theocratic Rawngbâwlna School-a an chanvo dawnte mahnia inbuatsaih tûrin i zirtîr em? (Sâm 35:18) Rawngbâwlna chi hrang hranga tel tûrin i zirtîr em? Baptisma chan leh hunbi kima rawngbâwl chu an thiltumah i siamsak em? Hlim tak leh phûr taka chanchin ṭha hril, anmahni fuih thei tûrte nêna inkâwm tûrin i ṭanpui em?—Thuf. 13:20.
4. Engtin nge naupangte chuan rawngbâwlnaa an naupan têt aṭanga zirtîrtu nu leh pa neih chu an hlâwkpui?
4 Fakna hla phuahtu chuan: “Aw Pathian, ka naupan têt ata chu nangin mi zirtîr a; tûn thlengin i thilmak tihte chu ka hriattîr ṭhîn,” tiin a sawi a. (Sâm 71:17) I fate chu rawngbâwltu ni tûrin an naupan têt aṭangin zirtîr rawh. Thlarau lam lungphûm siam tûra i ṭanpuina chu an upat thlengin an hlâwkpui ang!—Thuf. 22:6.