Rawngbâwlnaah Dodâlna Tâwk Tûrin Inbuatsaih Rawh
1. Kristian rawngbâwltute chuan eng nge an beisei a, eng zawhnate nge lo chhuak?
1 Isua chuan a hnungzuitute chu tihduhdah an nih tûr thu a sawi lâwk a. (Joh. 15:20) Ni hnuhnûnga kan luh thûk telh telh a, Setana chu tûn hma zawng aia a thawpik tâkah chuan, dodâlna a pun chhoh chu kan beisei a ni. (Thup. 12:12) Rawngbâwlnaa kan tel laiin, engtin nge kan invênhim theih? Ṭanpui kan mamawh chuan, police koh hi thil tihâwm a ni em? Min beitute kan khing lêt tûr a ni em?
2. Engvângin nge Kristiante chuan mi kut tawrh loh nâna invênghim tûrin a âwm tâwka hma an lâk a ngaih?
2 Nunna Hi A Hlu: Jehova chuan nunna hi thil hlu tak angin a thlîr a. Chuvângin, Israel hnam hnêna Dân a pêk khân, nunna leh hrisêlna humhim nâna siam thupêkte chu a telh a ni. (Ex. 21:22-29) Pathian chhiahhlawhte tân Mosia Dân zawm chu ngai tawh lo mah se, thilthlâwmpêk nunna an hlutzia chu an lantîr chho zêl a. Chuvângin, tiduhdahtute kut tawrh a hlauhawm hunah, Kristiante chuan invênghim tûrin hma an la a ni.
3. Thu hrilhna bialah dinhmun hlauhawm a lo awm chuan eng nge kan tih ang?
3 Kan Invênhim Theih Dân: Isua chuan ṭum khat aia tam chu dodâltu thinur takte a tawh hunah a tlân chhiatsan a. (Lk. 4:28-30; Joh. 8:59) Chutiang bawkin, kan thu hrilhna bialah dinhmun hlauhawm a lo awm hian, chu mi bial kalsan chu a finthlâk fo a ni. Dodâlna a daih leh hma zawnga bial danga thu hrilh hrih chu thil ṭha ber a ni thei ang.—Mt. 10:23.
4. Dodâltu chuan tihluihnain min kawl tum ta se eng nge kan tih theih?
4 Dodâltu chuan tihluihnain min kawl a tum emaw, a in chhûngah min khârkhum a tum emaw a nih chuan engtin nge ni ang? Chhân lêt dân tûr chungchângah, mi tinin an dinhmun ṭheuh an ngaihtuah a ngai ang. Nimahsela, Kristian tân chutiang dân lo anga thiltihte pâwngpaw dawh ngawt a ngai lo. Tisa lama tihnatna chu dodâltu nam kianga tlân chhiatsanna ang chi do lêtna hmangin kan pumpelh thei a. Kristianin tisa lama tihnat emaw, a nunna hial atâna hlauhawm thei emaw nia a hriat chuan, a lo indang theiin, a beitu chu a lo man bet thei ang a, a nih loh leh rei lo te chhûng engmah ti thei lova siam nân kut pawh a thlâk hial thei ang.—June 2008 chhuak Awake! magazine, phêk 10 leh 11-naa “Bible Thlîr Dân: Eng Hunah Nge Mahni Invênna Hi Thiam Chantîr A Nih?” tih thuziak chu en rawh.
5. Sawrkâr thu neitute zam eng dânte nge kan rawngbâwlna hlen nân kan hman ṭangkai theih?
5 Police Kan Ko Ang Em? Tirhkoh Paula chuan rawng a bâwl laiin, a hun laia hman Romho dân neih chu a hmang ṭangkai a. Entîr nân, dodâltute’n dik lo taka an puh khân a thu buai Kaisara hnênah thlen theihna dân chu a hmang ṭangkai a ni. (Tirh. 25:11) Chu mi hma pawh chuan, Paula chuan Rom ram mi a nihna chu mipui kut tuar loh nân a lo hmang tawh bawk. (Tirh. 22:25, 29) Chuvângin, Kristiante chuan ‘kan ṭhatna tûra Pathian rawngbâwltu’ sawrkâr thu neitute vênhimna an zawng thei a ni.—Rom 13:4.
6. Kan tlân chhiatsan theih loh dinhmun hlauhawm kan tawh chuan eng nge kan tih ang?
6 Kan sawi tâk dinhmunte ngaihtuahin, rawngbâwla kan chhuah laiin tlân chhiatsan theih loh dinhmun hlauhawm kan tâwk a nih chuan, police kan ko nghâl vat tûr a ni. Ṭhenkhat chuan buaina lo chhuak tûr dinhmun an hmuh veleh police an koh nghâl theih nân, police station hnai ber phone number chu an mobile-ah an kawl tlat a, chu chu a finthlâk hle. Thlawhhma rawngbâwlna atâna inhmuh khâwmna inkhâwm kaihruaitu unaupate chuan an ruala rawngbâwla chhuakte chu an vêngru tlat tûr a ni.—1 Pet. 5:2, 3.
7. Rawngbâwlnaah mi kut kan tawrh chuan engvângin nge khin lêt chu a ṭhat?
7 Kan Khing Lêt Tûr A Ni Em? Rawngbâwlnaa kan tel laiin, in neituin kut min thlâk chuan kan khing lêt tûr a ni em? Ṭhenkhat chuan harsatna an tawh belh an hlauh vâng emaw, ring lotu an chhûngte leh tualchhûnga an nihna hloh an hlauh vâng emawin khin lêt chu an duh lo mai thei. Amaherawhchu, kan khin lêt loh chuan, chu chuan dodâltute chu hremna tuar si lova Jehova Thuhretute sawisak theih a ni tih ngaih dân a neihtîr ang em? Khin lêt lohna chuan mipui pungkhâwmte chu unaute bei zêl tûrin a tihuaisen sauh thei hial ang. (Thur. 8:11) Kan han khin lêt chuan “chanchin ṭha thiamna thu” sawinaah kan tel thei ang a, chu chuan kan unaute’n chu mi hmuna rawng an bâwl leh huna dodâlna an tawhna tûr chu a tiziaawm thei bawk ang.—Phil. 1:7.
8. Engvângin nge tihduhdahna a hlauhawm chung pawhin hlau lova thu kan hrilh theih?
8 Dodâltute Chu An Hlawhtling Lo Vang: Kristiante chuan tihduhdahna tawh chu inbeisei mah se, an hlauh erawh a ngai lo. Lei leh vâna Ropuibera chuan min ṭanpui si a. (Is. 41:10; Heb. 13:6) Jehova chuan dodâltute’n chanchin ṭha hrilhna an tihtâwp chu a phal lo vang. (Is. 54:17) Dodâlna tâwk reng chunga rawngbâwlnaa kan tel hrâm hrâm chu “Pathian lâwmzâwng” a ni a, ani chuan a chhiahhlawhte chunga dodâltute thlentîr chhiatna engpawh chu a tâwpah chuan a sût lêt vek ang. (1 Pet. 2:19, 20) Jehova inawpna pâwl chuan min thlâwp tlat a ni. Chuvângin, rawngbâwlnaa kan tel laiin kut kan tuar emaw, thu neitute’n kan rawngbâwlnain dân bawhchhia nia an ngaih emaw chuan, upate hrilh nghâl la, anni chuan branch office an hriattîr ang. Hêng ni hnuhnûng hun khirh takah hian, bâng lova chanchin ṭha kan hrilh pahin fîmkhurna leh remhriatna kan hmang tûr a ni.—Tirh. 5:41, 42.