‘In Eng Chu Eng Rawh Se’
1. Eng tih theihna chanvo nge kan neih?
1 Vârṭian aṭanga thimhlim thlenga kan hmuh khaw êng mawi tak hian Pathian Jehova a chawimawi a. Mahse, Isua’n a zirtîrte nei tûra a tih êng erawh chu êng dang daih—“nunna êng”—a ni. (Joh. 8:12) He thlarau lam êng neih hi mawhphurhna pawimawh tak telna chanvo hlu tak a ni a. Isua chuan mi dangte hlâwkpui atân: “In êng chu mi mit hmuhin êng rawh se,” a ti a ni. (Mt. 5:16) Tûn laia thlarau lam thim mupna kârah hian, he êng hi sem darh tûr a ni a, tûn hi sem darh a ngaih hun lai ber a ni! Chuti chu, Krista angin engtin nge kan êng chu kan ên chhuahtîr ve theih ang?
2. Engtin nge Isua’n thlarau lam êng mite hnêna hrilh a pawimawhzia a târ lan?
2 Thu Hrilhna Hmangin: Isua chuan mite’n thutak êng chu an inah te, kawng ṭhuampuiah te, tlâng chungah te—an awmna apianga—an hriat theih nân a hun te, a tha leh zungte, leh a thil neih dangte chu a hmang a. Thlarau lam êng dik tak pêk chhuahnain hlutna tluantling a neihzia chu a hria a ni. (Joh. 12:46) Mi tam zâwkte hnêna a pêk chhuah theih nân, Isua chuan a zirtîrte chu “khawvêl êng” ni tûrin a buatsaih a. (Mt. 5:14) Anni chuan an vêngte chunga thil ṭha tiin leh thlarau lam thutak hrilhin, an êng chu an ên chhuahtîr a ni.
3. Engtin nge thutak êng kan hlut tak zetzia kan lantîr theih?
3 Pathian mite chuan ‘êng fate anga awm’ tûra an mawhphurhna chu an la urhsûn hle a, mite an awmna apiangah thu an hrilh a ni. (Eph. 5:8-10) Hna thawhna emaw, school emawa chhun chawlh laia mi dangte hmuh theihna hmuna Bible leh Kristian thu leh hla chhuah dangte chhiarna mai pawh chuan Pathian thu sawiho theihna kawng a hawng thei a ni. Hetiang kawng hian, unaunu tleirâwl pakhat chuan Bible zirna pakhat nei ṭanin, a school kalpuite hnênah thu leh hla chhuah 12 lai a sem chhuak thei a ni.
4. Engvângin nge ‘kan êng ên chhuahtîrnaah’ nungchang entawn tlâk a tel?
4 Thiltih Ṭhate Hmangin: Kan êng ên chhuahtîrnaah chuan nî tin nuna kan thiltih pawh a tel a. (Eph. 5:8-10) Hnathawhnaah te, school-ah te, leh vântlâng hmun dangah te hian Kristian nungchang chu mi hmuhah a lang chhuak ṭhîn a, chu chuan Bible thutak hrilh theihna hun remchâng a siam ṭhîn a ni. (1 Pet. 2:12) Entîr nân, mipa naupang kum nga mi nungchang ṭhatna chuan zirtîrtu chu a nu leh pate kova an hnêna, “Hetiang khawpa chhia leh ṭha fiah thei naupang ka la hmu ngai lo!” ti tûrin a chêttîr hial a ni. Ni e, kan rawngbâwlna leh nungchang entawn tlâk chuan mite chu “nunna êng” lama a hîp bâkah, Pathian chawimawina a thlen a ni.