I Rawngbâwlna Chanvo Chu Hlut Rawh
1. Engtin nge khawvêla mi tam takin kan thu hrilh rawngbâwlna hi an thlîr?
1 Setana khawvêla mi tam tak chuan kan thu hrilh rawngbâwlna hi “âtna” niin an ngai a. (1 Kor. 1:18-21) Kan fîmkhur loh chuan, chu ngaih dân veiherh tak chuan min tilunghnual theiin, kan ṭhahnemngaihna a tihniam thei a ni. (Thuf. 24:10; Is. 5:20) Jehova Thuhretute zînga mi kan nihna chanvo kan hlut chhan tûr engte nge awm?—Is. 43:10.
2. Engvângin nge rawngbâwlna hi hna thianghlim a nih?
2 Hna Thianghlim: Tirhkoh Paula chuan rawngbâwlna chu puithiam hna anga sawiin, Pathian tâna kan thiltih hna thianghlim angin a sawi a. (Rom 15:15,16) Engtin nge rawngbâwlna chu hna thianghlim a nih? Rawngbâwlnaa telna chuan ‘Mi Thianghlim,’ Jehova “hnathawhpuite” min nihtîr bâkah, a hming tihthianghlimnaa min teltîr vâng a ni. (1 Kor. 3:9; 1 Pet. 1:15) Jehova chuan kan thu hrilhna hi “faka inthawina” angin a thlîr a; chuvângin, rawngbâwlna hi kan biakna pêng pawimawh tak a ni.—Heb. 13:15.
3. Engin nge chanchin ṭha hrilhna chu chawimawina sâng tak nihtîr?
3 Chanchin ṭha hrilhna hi mi tlêm tê chauhvin an chan chawimawina sâng tak a ni a. Vântirhkohte chuan chutiang chanvo chan chu an lâwmin, an thawk ṭha hle ang tih rinhlelh rual a ni lo. (1 Pet. 1:12) Mahse, Jehova chuan he chanvo ropui tak chang tûr hian keini mi ṭha famkim lo, “hlum bêl” anga sawi theihte hi min thlang a ni.—2 Kor. 4:7.
4. Engtin nge rawngbâwlna kan hlutzia kan târ lan theih?
4 Thil Pawimawh: Kan chanvo chu kan hlut êm avângin, kan rawngbâwlna chu kan nuna ‘thil ṭha bîk,’ a nih loh leh thil pawimawh berte zînga pakhat angin kan thlîr a. (Phil. 1:10, 11) Chuvângin, chawlhkâr tina thu hrilh rawngbâwlnaa tel ziah tûrin hun kan insiam a ni. Khawvêla hmingthang tak rimawi tumtute zînga a tel theihna chanvo hluttu mi thiam chuan a tum dâwn apianga inbuatsaihin, a thiamna pawh a chher chho zêl ngei ang. Chutiang bawkin, ‘thutak thu fel taka kan hman’ theih nân rawngbâwla kan chhuah hmain kan inbuatsaih lâwk ang a, “zirtîr thiamna” neih belh zêl tûrin ṭan kan la bawk ang.—2 Tim. 2:15; 4:2, NW.
5. Kan rawngbâwlna chu tuin nge ngaihlu?
5 Mi tam zâwkin an chhân lêt ṭhat loh avângin lunghnual mai lo la. Kan bial chhûngah hian kan va tlawhna ngaihlutu mi tam tak an la awm tih hre reng zâwk ang che. Amaherawhchu, mihringte duhsak hlawh hi kan tum a ni lo. Chu aia pawimawh zâwk chu Jehova min ngaih dân hi a ni a, ani chuan kan taihmâk chhuahna chu a ngaihlu hle a ni.—Is. 52:7.