Jehova Chuan He Hna Thawk Tûrin Min Zirtîr
1. Pathian Jehova’n mihringte chanvo a pêk hian eng nge a pêk tel ṭhin?
1 Pathian Jehova’n mihringte chanvo a pêk hian an hlen chhuah theih nân an mamawh ṭanpuina pawh a pe ṭhîn a. Entîr nân, Nova hnênah tûn hmaa a la tih ngai miah loh lawng tuk tûra a hrilh khân, a tuk dân tûr pawh a hrilh tel a ni. (Gen. 6:14-16) Berâm vêngtu inngaitlâwm tak Mosia chu Israel upaho leh Pharaoa hmachhawn tûra a tirh pawh khân, Jehova chuan: “I kâ chu keiman ka awmpui zêl ang a, i sawi tûr chu ka hrilh zêl ang che,” tiin a tiam a ni. (Ex. 4:12) Chanchin ṭha hril tûra kan chanvo dawn chungchângah pawh Jehova chuan a tih dân tûr min hrilh a. Theocratic Rawngbâwlna School leh Rawngbâwlna Inkhâwmte hmangin he hna thawk tûr hian min zirtîr a ni. Engtin nge he zirtîrna hi kan hlâwkpui theih?
2. Engtin nge Theocratic Rawngbâwlna School chu i hlâwkpui theih?
2 Theocratic Rawngbâwlna School: Inkhâwm tina zir tûrte chu inkhâwm hmaa lo chhiarin, lo zir lâwk ṭhîn la. A hnua zirlaite’n an thusawinaa an hman dân i han hmuh chuan zirtîr dân tûr i thiam phah sawt ang. (Thuf. 27:17) Ministry bu chu inkhâwmnaah keng ziah la, chhinchhiah ngaite chhinchhiahin, hmang ṭangkai ang che. School enkawltuin zirlai thusawi zawha fuihna a pêk apiangin, i hman ṭangkai duh tûr thu pawimawh laite lo rînin, a sîr hmun âwlah chuan lo chhinchhiah ve ṭhîn ang che. He School hlâwkpui theih dân kawng ṭha ber chu a tela tel ve hi a ni. School-ah chuan i inziak lût tawh em? Thusawi tûr chanvo i neih hunah ṭha taka inbuatsaihin, thurâwn i dawnte chu zâwm ṭhîn la. I thu zirte chu rawngbâwlnaah hmang ṭangkai ang che.
3. Engin nge Rawngbâwlna Inkhâwm hlâwkpui tûrin min ṭanpui ang?
3 Rawngbâwlna Inkhâwm: He inkhâwmnaa thu zir tûrte kan lo chhiar lâwk a, chhânnate pe tûra kan lo inbuatsaih lâwk chuan inkhâwm chhûnga kan dawn thurâwn ṭha tak takte hriat reng chu a awlsam lehzual ang. Chhânna pawh tâwi fel taka kan pêk chuan mi tam zâwkin chhân vena hun an nei thei bawk ang. Lemchan tâwite chu ngun taka enin, ngaithla la, rawtna engpawh i rawngbâwlna atâna ṭangkai thei nia i rinte chu hmang ve ang che. Kan Lalram Rawngbâwlna-a chhuak thuziak pawimawh bîkte chu nakina râwn leh atân i dah ṭha dawn nia.
4. Engvângin eng theocratic zirtîrna chu kan hman ṭangkai ang?
4 Nova leh Mosia chanvo dawn a awlsam loh ang bawkin, khawvêl zawng zawnga chanchin ṭha hril tûra kan chanvo dawn pawh chu a awlsam lo. (Mt. 24:14) Mahse, min Zirtîrtu Ropui Jehova kan rinchhan tlat a, zirtîrna min pêkte kan hman ṭangkai zêl chuan kan hlawhtling ngei ang.—Is. 30:20.