Dâr Tangka Dere Pahnih

Lalram hmasâwnna tûra kan ṭanpui theih dân kawng pawimawh tak pakhat chu khawvêl pum huap thu hrilh rawngbâwlna atâna thawhlâwm thawh hi a ni. Mahse, mi rethei tak kan nih chuan engtin nge ni ta ang?

Ṭum khat chu Isua’n biak in thawhlâwm bâwma hmeithai rethei tak pakhatin dâr tangka dere pahnih a thlâk lai a hmu a. Jehova a hmangaihna chuan ani chu “a duh lai tak, a neih chhun tak, a intunnunna tûr zawng zawng” pe tûrin a chêttîr a ni. (Mk. 12:41-44) Chu mi chungchâng Isua sawi chhuahna chuan hmeithai thawhlâwm thawh chu Pathian tân a hlu hle tih a târ lang a. Chutiang bawkin, kum zabi khatnaa Kristiante chuan rawngbâwlna chhawmdâwl nâna sum leh pai thawh chu Kristian hausa zâwkte tih tûrah an dah ngawt lo. Tirhkoh Paula chuan ‘an pachhe hle chung pawha thilphal êm êm . . . chhawmdâwlna tûr rawngbâwl hnaa tel ve dîl chiamtu’ Makedonia mite entawn tûr siam chu a târ lang a ni.—2 Kor. 8:1-4, C.L. Re-edited.

Chuvângin, ‘dâr tangka dere pahnih’ chauh kan thawh thei a nih chuan, chutiang thawhlâwm tlêm têtê tling khâwm chu sum tam tak a lo ni chho thei tih kan hre reng tûr a ni. “Pathian chuan hlim taka petu . . . a hmangaih” avângin, thinlung aṭanga phal taka kan pêkna chuan mi thilphal tak, kan Pa vâna mi a tilâwm dâwn a ni.—2 Kor. 9:7.